Ka Nupepa Kuokoa, Volume LVIII, Number 32, 6 August 1920 — HOLO KAAPUNI KE KUPUNAKANE ME NA MOOPUNA IA OAHU NEI. [ARTICLE]

HOLO KAAPUNI KE KUPUNAKANE ME NA MOOPUNA IA OAHU NEI.

Kuu Solomon Hanohano. aloha kaua: : —Eia hou mai no au ke hooluhi nei ia oe, aka e kala mai no oe. Ma ka la 4, o ia ka Pokiulai, o ka hora 7 a. m. ia i haalele iho ai makou i ka home o ka hunona, a kau aku la ua makamaka maikai nei ame na moopuna. Maikai keia la, kalae maikai na paemauna, o ka lilo mai la no ia, aia ka iho o ua mokukua nei ke auku n@i i ka makani, a ku iho la i ka nuku o Nuuanu, a eia ke nana nei, a mea aku la au, e Mr. Eddie Kahoa, o kou kamaaina i keia mau kaha au e kau ana maluna o kahi lio, pehea ke ano ame keia au e ike nei ou? E Mokumaia, ia au, he ololi kahi alanui ame ke ano apuupuu no ,eia nae o ka noho ana o na Hawaii ia manawa he lako maoli, ua makaukau maoli, a i ka nana ana i keia manawa, aole ia mau mahele, ua hoopiliia aku i ka paia. Ae, ua pololei ia au i kamailio mai la, o ka iho aku la no ia o ua mokukaa nei, nana aku oe la, he hi-o mai hoi kau, e hoi ana i ka akau, hoi i ka hema, a holu ana i Kaneohe, a e kauaheahe mai ana o Heeia. Eia no ua wahi kaaka ke pupue nei, a mea aku la au iaia: Ina paha o kou wa e kau ekake ana, ina ua maikai loa, no ka mea o ka luli ae nei keia a lohe mai i ke a'o, palokeloke paha ka iwi kikala? Hu ae la ka aka a ua kaikamahine nei ame kana mau olelo hoakaaka. E Mokumaia, ua nui no hoi kau mau olelo hoohenoheno e puka nei ma ka nupepa, o oe ka oi ma na olelo wahawai; ua nui maoli ka piha hauoli e keia huaka'i, no ka mea ke ike la au iaia, he pupue wale iho no, aole kahi iwi aoao, a hoomanao ae la au i keia mau wahi hua nioi a kamalii e uwa nei; Pupue iho au mawaho, Maloko mai oe o ka rumi; A kani e ka hora elima, Ahuwale o Haleakala; Ke laweia la ke aloha, E ka aeko kulu melemele; Ke laweia la e ka manu, E ka nunu makaonaona. E kala mai, ua pahee loa aku la. Eia no makou ke nee nei nomua, me ka maikai, e kilohi aua i ka nani o ka aina a kuu iho la ka heleuma o ua mokukaa nei o makou i Hauula i ka hora 12 m. me ka maikai o na mea apau, i ka home o Mr. Likeke ame kona makuahine puuwai hamama. Haliiia mai la ia papaaina maikai, ua huluiia mai la na ono o ua kaha nei, na manini, opelu, nenue, eia o Hanale ke hou hele nei ma o a maanei, a i ka olu pono ana iho o na kamahele, o ka iho like iho la no ia o na hoe, a i ka ea ana ae, e kau aheahe mai ana o Waialua, e haupa iho ai, ame na olelo hookaau ana, no na mea pili nupepa, a hoi mai la o ka hora 4 ia. Elua kaa keia e hoi nei, o ko Mr. John Ke ame kona ohana, o makou no hoi me ka piha hauoli, ahiki i ka home me ka pilikia ole, o ka hora 6:30 ia, me ka maikai o na mea apau ame ke aloha lululima ana me ka makamaka maikai, a hoi mai la a nonoi ae la ka'u leo pule e hoomau aku i ka ikaika i ka makua maikai, a hui hou ae i keia makahiki. Me oe e kuu kapena ahonui ko'u welina pau ole. Kou mau, J. K. MOKUMAIA.