Ka Nupepa Kuokoa, Volume LXI, Number 16, 21 April 1922 — HOLO MAKAIKAI MA MAUNALUA. [ARTICLE]

HOLO MAKAIKAI MA MAUNALUA.

Mr. Lunahooponopono o ka Nupepa Kuokoa; Aloha nui:—E oluolu mai kou ahonui i kekahi rumi kaawale no kela meahou e kau ae la, maluna. Ma ka la 2 o ka mahina o Maraki i kono mai ai o Aunty Makea, i kuu mama Mrs. James J. Fern ame kuu Aunty, Mrs. Joseph J. Fern e holo aku i kona wahi e makaikai ai, aia kona wahi e noho nei ma Maunalua. Ua hoouna mai o Aunty Makea i ke kaa mikini ame kana kaikamahine e kii i kuu mama me kuu aunty; a ua hookoia kona, no ka mea na ke kaa ka lawe ana ia laua. I ko laua hoea ana aku, ua hoomakaukau mua o Aunty Makea, i na meaai ono. No ka mea elua makahiki akahi no a hui hou kuu mama me Aunty Makea. Mahope aku o ia manawa ua noho lakou ma ka pakaukau e nuu ai i na mea ono; no ka mea ua hoea mai o Hanale. O ia hoonuu no ia o lakou, hookahi no puupuu a Keoni Bulu, uwoki oe e mama ana o Hanale i ka holo. Mahopo o ia manawa ua laweia aku kuu mama e hoomakaikai ma ia wahi apau. Ma ka hora ahiahi, ua huli mai laua ma kahi noho o kuu Aunty Mrs. Joseph J. Fern, ma Kaimuki nolaila ke haawi aku nei au i kou mahalo a nui ia oe e Aunty Makea. i ka hookipa ana i kuu mama ma kou home me kou puuwai hamama, a me ia pu kau kaikamahine oiai, ua hala kou pili, eia nau ke nana mai nei no oe ia makou! Na ke Akua e haawi i na pomaikai he nui ia oe, ame kau kaikamahine no ka olua hana maikai i kuu mama; ua nana mai olua elike me ka ohana ponoi. Mc ka mahalo a nui ia oe e ka Lunahooponopono o ke Kuokoa. Me ke aloha, MRS. A. K. LOUIB, .. .. . PEKING T G, Apr. 18.—Ua loaa ia Dr. Sun Yat Sen, ka peresidena o ke aupuni Canton ame ke Kenerala Chang Tsaolin, ke kiaaina kenerala o Manekuria, he olelo hooholo maapopo no ka hui a hana like ana no ka hoopio ana i ke Kencrala Wu Pci-fu, ke alakai o na pualikoa o Kina Waena, elike me ka lono i loaa ae i ke keena kanikela Amerika maanei.