Ka Nupepa Kuokoa, Volume LXI, Number 42, 19 October 1922 — Nuhou Kuloko [ARTICLE]

Nuhou Kuloko

Ua waihoia ae i ka aha kaapuni ka hihia ki-pu o Mrs. Helen Hewitt i ki ai i kana kane. O na moku e ku mai ana ianei me ka waiona e hopuia ana e ka lunakukeawa mahope aku o ka la 21 o Okatoba. He 10 makahiki hoopaahao ka hoopai o G. Kino, ke Kepani o Kapahulu, i ki ai ia Sagamine a make, i kauia mai e ka Lunakanawai Banks. Oia mau ka nalowale o ke kino o ka haole i hele ai e auau ma Waikiki ae nei ma kekahi po aku nei i hala nona ka inoa o W. A. Lippke. Ma nehinei i huli hoi aku ai ka Elele H. A. Baldwin no Maui, no ka hoomaka koke ana aku i kana mau hooikaika ana no ka moho elele John H. Wise. I kulike ai me ka hoakaka a ka Enekinia Kalana Fred Ohrt, e panikuia ana ke alanui holopuni Kamehameha, ma keia Sabati iho, no ka manawa o ekolu mahina. Mamuli o kekahi pilikia i ikeia i ka enekini o ka mokuahi Kilauea i hookaulua iki ia ai kona holo aku no na awa o Maui ame Kohala ma ke ahiahi o ka Poakahi nei. Ma ka Poaono, Okatoba 28, e wehe ai na moho Repubalika i ka lakou mau hana haiolelo malalo ae nei o Aala Paka, e hoomaka ana ma ka hora ehiku me ka hapa o ke ahiahi. Ehiku haneri mau kanaka o ka Pualikoa Kiai Lahui Hawaii i holo aku no kahi hoomoana o na koa ma Leilehua me ka lakou mau bana ma ke kakahiaka Poakahi nei no ka hoomaamaa kaua ana. Pinana he keiki Kepani iluna o ke kaa kalaka ma Kekele, Kaneohe, me ka ike ole mai o ke kalaiwa, a haule a palahe kekahi wawae i ka huila hope a laweia mai i ka halemaʻi Moiwahine ma ka auwina la Poalua nei. Ma ka hora eiwa me ka hapa o ke kakahiaka o ka Poakahi iho nei i pauaho mai ai o Mrs. Mary Nahakuelua Pua, ka makuahine o ka Makai Nui Sam Pua o Hawaii, i keia ola ana, i ke 95 o kona mau makahiki. Ma ka Mauna Kea o ka Poalua nei i hoea mai ai ka Makai Nui Sam Pua o Hawaii no keia kulanakauhale, no ke komo ana ma ka hoolewa o kona makuahine i pauaho mai i keia ola ana, oia o Mrs. Mary Nahakuelua Pua. E malama ae ana ke Kalapu Demokarata o ka Mahele 20, Apana Elima, he halawai, ma ka hora elua o ka auwina la o keia Sabati iho, ma ka halekula o Kaiulani; o na moho kekahi a na Demokarata i makemakeia e hoea ae ma ia halawai. He pule ae nei i hala ka hoomakaia ana e hana ka luakini o Kawaiahao mawaho ma ka hoopihapiha ana i na pukapuka o na pohaku akoakoa me ke kameki, a ua manaoia ina no ka pau pono o ka hana a ka mea iaia ka aelike e ku aku ana ia no hookahi kenekulia hou. Ma Hilo, Hawaii, ma ka Poakahi nei, i hoohuiia ae ai ma ka mare o Chas. S Crane, ka lunanui o ka Nupepa Kuokoa, me Mrs. Emma Thompson. E hala ana ia laua he elua pule, e hoohala ai i na la mahinameli ma ka Uakanilehua, mamua o ka huli hoi ana mai no keia kulanakauhale. Ma ka hoakaka a ka Lunakiai Jonah Kumalae imua o ka papa no ke kumu i pau ai o kona hale hana ukulele i ke ahi, aole ia mamuli o na hana hemahema a ka poe e malama ana i kona hale, aka he ahi kela na ka poe kolohe, oiai ua ikeia ka holo ana o kekahi mea, mamua koke iho o ka a ana o ke ahi.