Ka Nupepa Kuokoa, Volume LXI, Number 48, 30 November 1922 — KA MAKE IWAENA O NA BEBE MA HAWAII NEI [ARTICLE]

KA MAKE IWAENA O NA BEBE MA HAWAII NEI

He mea hookahaha i ko kakou noonoo, ka hoomaopopo ana, aia he heluna nui o na bebe malalo o hookahi makahiki, i make maloko nei o keia Teritore, i ka makahiki e.pau ana, ma ka la 30 o ka mahina o lune o keia makahiki, i kulike ai me ka hoike a ka papa ola Teritore, he huina make hoi, i loaa ole mai i na kulanakauhale nunui ma Amerika. He hookahi kumu i hoomaopopoia no keia heluna make kiekie loa iwaena o na bebe liilii, o ia no ka hemahema ame ka ike ole o na makua, i ka malama ana i ka wa liilii, me ka hoohemahema maoli ia o kekahi mau hana hoopakele i ko lakou mau ola. O ke kupono ole o na meaai i ke kulana o na bebe, kekahi kumu o ka pilikia, a hui pu iho no hoi me ka noho naaupo o na makua, me ka lawe ole i na kauka, a hanai ole i kekahi mau laau kupono, pela iho la i loaa ai keia make iwaena o kekahi mau bebe. Eia me kakou iloko o keia mau la, kekahi mea ike a makaukau i ke ano o oa meaai, ame ka malama ana i na bebe i ka wa liilii, e kau aku ko kakou manaolana, e lilo kona hoea ana mai, i mea e loaa ai ka naauao i ko kakou poe ma Hawaii nei, no na alahele apau e hoopakeleia ae ai ko kakou poe keiki liilii ma keia mua aku. Eia me kakou na komisina limahana i hoounaia mai e ka ahaolelo lahui, no k'a huli ame ka noii pono ana i ke kulana o ka ninau limahanā ma Hawaii nei. He mau lala wale no keia no kekahi mau hui uniona ma Amerika Huipuia; ke manao nei nae keia pepa, aole e lilo ko lakou pili ana me kela mau hui uniona, i kumu e kapae ae ai lakou i ke kupono o ka Hawaii nei koi, no na limahana maiwaho mai, ma o na mea, oiaio a lakou e noii pono aku ana no ko kakou mau mahiko. Ma na hoike i loaa mai i keia keena, ma na tikiki e hiki ai i ka lehulehu ke komo e ai, ma ka ahaaina a na Demokarata e haawi ana ma ka Poaono, ka la 9 o Dekemaba ae nei. He hana naauao kela, aole paha no ka manao e hoonele aku i kekahi poe, i ka pono e ai ma kela ahaaina, aka i ole ai e piha kela ahaaina, me ka poe o na lahui e, ka poe i kuleana ole i ka ahaaina i hoomakaukauia. *