Ka Hae Hawaii, Volume 2, Number 27, 30 September 1857 — He Mea Hou. [ARTICLE]

He Mea Hou.

Ua loaa ia Kauka Makaainana, (Dr. Hillebrand,) he elima mau RANA, mai Kaliponia mai, a ua hookomo ia maloko o kona loi, a oluolu lakou a pau. Kani mai lakou me ka leo ano e. O ke ano oia mau mea, he mau holoholona ola lua no ia. Ke ai nei lakou na mea kolo liilii, na nalo, na uhini, a me na mea like; nolaila, he mea maikai ia. E na kanaka o Honolulu nei, mai hoopino oukou i keia mau mea ano hou, ke ike oukou, no ka mea, he waiwai no ia.