Ka Hae Hawaii, Volume 3, Number 49, 9 March 1859 — Ano Hoomana Kii. [ARTICLE]

Ano Hoomana Kii.

E ka Hae Hawaii; Aloha oe: — E mau ka pa ana aku o ka makani nahenahe nana e hoomau i kou pulelo ana aku imua o ka maka o ka poe nana i lawe i kou kino. Me ke aloha no ia lakou.

He wahi makana ka'u ia oe, a nau ia e hoopulelo aku ma kela wahi keia wahi o ke Aupuni Hawaii nei. l ike iho ka poe e lawe ana i kou kino, i ku hana lapuwale a kekahi mau kahuna lapaau o Hawaii nei.

Eia malalo iho nei kekahi mau akua o kekahi kahuna lapaau. A maluna iho o lakou kona paulele nui ana me ka i ana iho, "e ola ka mai nui o kekahi kanaka ia ia ” Aka, i kana hana ana, aole nae i ola, ua make, no laila, he lapuwale loa ka hana a keia kuhuna Hawaii, i kona manao nui ana, aia ke ola a me ka make i kona mau akua. E ike lea iho oukou e ka poe e heluhelu ana. Aole anei he hoomana kii ? He hoomana kii no. O ka nui o na akua, a me ka mohai o kela akua keia akua, oia keia malalo iho nei. Aole nae iloko o keia papa helu ka mohai o kekahi mau akua. Aia no paha i ua kahuna la. Kahoalii; Kanehekili; Kanemilohai; Kamapuaa ; Kuula ; Kahaea; Kaiona; Kaikapu; aole o lakou mohai.

Kaneikawaiola; Kaneikapohakaa ; Kaneopua; he puaa eleele ko lakou mohai. Keaweaku; puaa ehu ka mohai Keawemakaloa; puaa eleele ka mohai. Kapilikua; puaa eleele & keokeo. Kepauila; puaa eleele & ehu.

Kuhaimoana; puaa eleele & ehu. Kanakokai; Kane; Kanaloa; Kalamainuu; Keawenuikauohilo; Kealo; Kauwaiwahine; Puhiula; Pehu; Papio; Lonoikaoualii; puaa eleele ko lakou mohai.

Laka; puaa Iuahine ka mohai. Maui; puaa pukoa ka mohai Wahieloa; puaa eleele ka mohai. Pele ; Hiiaka ; Aimoku ; Wahineomao ; Hopoe; Luau ko lakou mohai. Laniwahine; ilio eleele ka mohai. Hinaopuhalakoa; ilio eleele & keokeo. Hinamalama; ilio eleele & ehu

Haumea; Opua; Kaahupahau; Lainui; Namakaewalu; Kuamu; Omumu; Okal no; Pokiikauana; Owaka; Popoaikea; Okapo; Aole o lakou mohai. H. F. KALUAPIHAOLE. Lahainaluna, lan. 18, 1859.