Ka Leo o ka Lahui, Volume II, Number 690, 24 April 1893 — Page 1
| This text was transcribed by: | Kaui Sai-dudoit |
| This work is dedicated to: | Aunty Florence Kauluae Cummings |
KA LEO O KA LAHUI.
"E Mau ke Ea o ka Aina i ka Pono."
Buke II. HONOLULU APERILA 24, 1893. Helu 690.
KE ALOHA AINA.
---------
1st Kahiko ka ohu i Nuuanu
I ka holu a ka lau Kawelu
Ua lupea ia e ka moani
Hoope aala oia uka.
HUI: He halia he aloha keia
No kuu aina hanau
A'u e hiipoi mau nei
No ka Lanakila o Hawaii.
2nd Ua nani ka pua o ka Ilima
I pilia mai me ka Maile
I wehi hoohie no ke kino
Kahiko mau no Hawaii.
3rd Kamaho ka ike'na i ka nani
I ka wai Lehua a na manu
Manu inu wai pua Ohelo
Iiwipolena o ke Kuahiwi.
MISS KEKOAOHIWAIKALANI.
Honolulu, Mar. 25, 1893.
----------------------
HE MOOLELO KAILI PUUWAI
--NO--
SENIA LUTERA
------------
Ka Ui Puuwai Mabala
--:o:--
ENELANI KAHIKO.
-----
A I OLE
He Nanea Hooheno no kekahi Kauna Wahine Opio me kana mau Aloha Ekolu.
(Kaauia no Ka Leo.)
--------------
MOKUNA XXXVII.
------
Ua ko io no kana i noi ai. Ua hiki mai no ke aloha, a ua hiki pu mai no hoi me na kaumaha, a o keia mau haawina, ua hiki ke ike ia aku ma na helehelena o keia Senia a kakou e ike iho la ma na kukuna o ke kukui alanui.
Hele aku la oia a ku iho la imua o kekahi puka o kekahi hale uinihapa, kahi a na alahao e kaalo ae ai, a me ka hanu kaumaha, unuhi ae la oia i kekahi ki mailoko ae o kona pakeke a wehe ae la i ka ipuka a komo aku la hoi iloko o ua hale nei.
Komo aku la o Senia a pii aku la ma kekahi alapii, e ui ana no kona apulu iaia e pii la.
A hiki keia imua o kona rumi, hoao hou aku la oia i ke ki i ka ipuka a komo aku la hoi i kona rumi e noho ai, e ai ai, e kuke ai, a e hookipa ai. He maemae no na mea a pau o kona rumi, aka aole nae hoi he nui o na lako o loko; aole hoi i kupono e like me kona kulana a me ka mea i maa mau iaia i na la i hala.
Ke hoohalike ia kona home lewa me na kuewa me keia, me he la, ua oi aku no ia, oiai he noho ana no ia i kahi e loaa ai na la maikai, e hawanawana iho ana na ahi makani me he leo mele la e hoohiamoe ana o ka aluna ahiahi, a e sila iho ana hoi na lani maluna iho ona me ka hoomau ana a na kehau i pe ia e ke ala o na pua, a wahi aku hoi ke kino luhi i ka moe lealea a oluolu o ka po. Aole nae pela keia noho ana ona.
Wehe ae la oia i ka uhi maka mai kona helehelena aku, a me ka hanu haumaha, wehe pu ae la oia i kona wahi kihei, a noho iho la iluna o kahi noho luliluli hookahi o kona rumi, kulou iho la kona poo iluna o kona mau lima, a kulu iho la na waimaka.
---------------
Mai haohao e na makamaka ke loaa ole aku ka oukou pepa; e hoopaa ana makou i ka pepa o na inoa i hookaa ole mai i ka uku pule a mahina o ka kakou wahaolelo ma ka aoao o ka Lahui. E eleu mai i ka hookaa ana i ike pono ai i na mea hou o ka aina aloha iloko o ka nohona kupilikii o keia mau la.
Ma ke Kauoha.
-----------------
HOOLAHA A KA LUNA HOOKO KAUOHA I KA POE AIE.
Imua o ka Aha Kaapuni o ka Apana Kaapuni Akahi, ma ka Hooponopono Palapala Hooilina. Ma ka Palapala Hooilina a Maria O'Sullivan i make. O ka mea nona ka inoa malalo nei, ke hoolaha aku nei, ua hookohuia oia i Luna Hooko Kauoha no ka Palapala Hooilina a kauoha hope loa a Maria O'Sullivan i make ma Honolulu. A ma keia ke hoike aku nei oia i ka poe he mau aie ko Maria O'Sullivan ia lakou, e waiho koke mai iaia i ka lakou mau koi i hooiaioia ma na bila aie pololei ma ka Halekuai o E.O. Hall & Son (Mikaholo) iloko o eono malama mai keia la aku, a e hoole loa ia hoi na koi ke hala keia manawa.
ABERAHAM FERNANDEZ
Luna Hooko Kauoha o ka Palapala Hooilina o Maria O'Sullivan i make.
Hanaia i keia la 20 o Maraki, 1893.
mar27 3wked.
---------------------
HOOLAHA PAPA AINA.
E ike auanei na kanaka a pau ma keia; Owau o ka mea nona ka inoa malalo iho nei, ka papa aku nei au i na mea a pau loa, aole e puni wale a ae aku paha e hoolimalima a e kuai paha i keia mau Apana Aina a pau loa o kuu kupunakane i make, oia o S.W.B. Kahaumanu. Oia keia:
Hookahi Apana Aina ma Honouliuli Ewa, Oahu; Hookahi ma Waikele, Ewa. Hookahi ma Leleo, Honolulu.
Owau iho no,
S.W.B. KAMAUMANU-OPIO.
Maraki 9, 1893. mar17 1mw.
----------------
HE NANEA KAMAHAO
---NO---
MAIKA
-------
KE KEIKI
Hapa Ilikini a Hawaii hoi.
--------------
KE KANAKA MUA LOA NANA I PANA KE AKUA BEA A NA ILIKINI I MAKA'U
LOA AI---A O KA WELI HOI O NA ILI KEOKEO--A ME KA LUKU IA ANA O KELA HUI KEAKA A LI.
-----
E noho mai kaua e kuu aloha, ke halialia e wale mai nei no ia'u na hiohiona i kau ia maluna o kuu makuakane, auwe ka manaonao e--ua kohu io bipi hoi keia mea, elua poo kanaka manaonao iluna o kahi moe, o keia poo uuku o kuu keiki no ia, a no kuu aloha keia poo, ka hele ana o ke kino maoli o Maika ma ka moeuhane no ka Ilina o ka wahine, wi ka niho o ka poe hana hoomainoino pau i ke koli ola ia ka hui pepehi kanaka o Conegokena ma.
----------
HOOLAHA.
E ike ana anei na poe a pau e kaalo ana ma keia kula panoa kanaka ole. O keia poe a pau e lewalewa nei iluna o keia kumu laau, aole lakou he poe e aku, aka, o lakou no na hoa o ka puali powa a Conegokena, a oia pu no kekahi iwaena o keia poe e lewalewa nei. Aole he mea e ae nana i hana keia poe powa, na ka mea no nona ka inoa malalo iho nei. O ke kumu nui wale no i hana ai au i keia karaima eleele, mamuli no ia o ka ae pololei ana mai o Conegokena ia'u, na lakou no i pepehi hoomainoino i kuu whaine me kuu keiki. A o ke kumu i loaa ai keia poe ia'u mamuli no ia o ko lakou kii ana e hue i ka waiwai iloko o ka pahu kupapau o kuu wahine, oiai au ma keia wahi ia minute me ke oukou ike ole mai ia'u a ua kuhihewa lakou ia'u he akua lapu, a oia ke kumu i paa pio ai o keia poe powa ia'u, a o ka'u uku hoopai keia no ka lakou mea i hana ai maluna o ke kino hala ole o kuu wahine aloha.
Me ka mahalo,
MAIKA.
I ka paa ana o keia palapala hoolaha ua hoopili aku la oia ma kekahi kumu laau e like me ka kaua mea i ike mua ae nei maluna ae la, a huli ae la oia a komo hou aku la iloko o ka hale ilina o kana wahine a hooponopono iho la oia i na mea i hue ia e na powa, i ka pau pono ana o na mea a pau iloko o ka nahu ua puka aku la oia a pani mai la i ka puka a paa; a hoomaka hou aku la oia e hele auwana hou, ua huli aku la no oia a loaa kahi lio ona hooponopono iho la no oia i na wahi opeope ona a ku aku la no oia hele ma kana huakai auwana i maopopo ole iaia kana wahi e hele nei.
A ma keia wahi o ka kaua nanea e kuu makamaka heluhelu e aui ae hou ae ko kaua nana ana no keia mahele hou, no ka mea ua paupauaho mai keia mahele ia kaua e kuu makamaka heluhelu, nolaila, e kilohi ae kaua i kona mau kuhinia.
----------------------
Eia ka papa inoa o na Komite kakauinoa o "Ka Hui Hawaii Aloha Aina"
F.S. Keiki, Apana 1.
Chas. Keawe, Apana 2.
J.K. Prendergast Apana 3.
Kapamawaho)
A.K. Palekaluhi, Apana 4.
Wm. Mokimana, Apana 5.
---------------------
HE UMI (10) APANA AINA HOME MAIKAI NO KE KUAI.
Aia he Umi apana aina Home maikai loa no ke kuai aku e waiho la ma Kalia Waikiki, Oahu, mawaena o kahi o Hon. Chas. L. Hopkins a me Mr. Marcfarlane a i keia mamua o ka aina o G.W. Keawemahi.
A oia no na apana aina pa hale nani loa i koe iloko o ke kulana kauhale nei.
He oluolu loa ke kumukuai. He maikai ke kuleana. Na ka mea kani mai e uku no na Palapala.
No na mea i koe e ninau ia William C. Achi Honolulu Maraki 27, 1893. tf.
-----------
KAUKA
Yong Kam Pung
[APANA.]
Helu 81 Alanui Maunakea.
--------
KAUKA LOEA O KA AINA PUA
-------
Ua hiki ke hoola ia kela a ma keia ano ma'i, mai ko na kane wahine a me ko na keiki liilii. O na mai ha-no a me na ma'i e pili ana i ka maka, pau pu ia i ke ola. O na ma'i koko inoino a me ka hooulu hou ana i na wahi poino o ka puu wai a me ke kino, e hoola ia no me ka maalahi. Pela me na ma'i hu'i koko maloo, ua hiki ke hoola ia me ke oki ole. Ke hoike ia aku nei eia ke ola ianei me ka oluolu pu o kahi auhau.
E KIPA mai e ka poe i hooluuluuia me na haawina pilihua a ka ma'i, a na'u oukou e hooluolu uku.
KAUKA YONG KAM PUNG.
mar.29--2moned.
----------------------
HUI ALAHAO A ME AINA O OAHU.
Papa Manawa
Mai a Mahope o Okatoba 1, 1892
NA KAA
Haalele ia Honolulu 6:15 8:45 1:45 4:35
Hoea i Honouliuli 7:20 9:57 2:57 5:35
Haaleleia Honouliuli 7:30 10:13 3:45 5:42
Hoea i Honolulu 8:35 11:55 4:55 6:50
NO KULANAKAUHALE MOMI IHO.
Haalele ia Honolulu 5:10 P.M.
Hiki i Kulanakauhale Momi 5:48
Haalele ia Kulanakauhale Momi 6:55* A.M.
Poaono wale no
Koe ka Lapule
Koe ka Poaono
Sept. 28 tf-dly.
---------------------
E ike auanei na kanaka a pau ma keia Hoolaha, owau o S.K. Kila Opio, e noho ana ma Honolulu, Mokupuni o Oahu, ke hoike aku nei au ma ke akea owau wale no ka pilikoko pili loa i na aina o Kila (k) Kepola (w) a me Ku (k) i make e waiho la ma Kahuku Kau, Mokupuni o Hawaii. O ka mea a mau mea i kuai a hoolimalima paha keia mau aina, aole i mana ia hana ana, ina he mea a mau mea paha e paa nei i ua mau apana aina nei, e hoike koke mai ia'u, a i ole e kipaku no au ia lakou.
S.K. KILA OPIO.
Honolulu, Feb 17, 1893.
4ts-wkly.
----------------
Elia Kaululaau.
Kauka Hana Niho.
-------
Ua hiki ke huki ma Niho me ka eha ole iloko o ka manawa pokole loa. He loea me ka noeau ma ka Hoopiha ana i ka niho me ke Gula Kala a mea e ae paha. He akamai lua ole i ka Hana ana i na Niho Kui o na ano a pau.
He Mikioi ka Ho@@@@ Niho. He palanehe kona mau hana ma Kana mau mea, Hana Niho o na ano Hou loa i loaa mai nei. He oluolu no ke kukai olelo ana no kona ukuhana.
O ke kanaka Hawaii hookahi wale no keia mailoko ae o ka huina o 40,000 kanaka i loaa ka Laikini Kauka Hana Niho; mai ka Papa Kauka Hana Niho mai o ke Aupuni Hawaii, mamuli o ka ike ana o na Hoa o na Papa Ola i kona akamai maoli ma keia Oihana ano nui.
E ikeia kakou Hoa Kanaka o kipa hewa ke aloha ia lakou nei ae.
Keena Hana maluna ae o ka Hale Hana Pu i ke kihi o Alanui Moi a me Betela. Puka komo e pii ai iluna o ke Keena ma Alanui Moi.
mar.6--tfd