Ka Makaainana, Volume IV, Number 13, 23 September 1895 — Page 3
HONOLULU, OAHU, POAKAHI, SEPATEMABA 23, 1895. 3
ANASALEMO
-KE-
Keikialii Ahonui o Italia.
-
He Nanea Walohia no Kela Au i
Hala Aku.
Helu 1. Iloko o na makahiki i koliu wale aku la i o ka lilo loa, na la i ikeia ai o na hana pahaohao he nui, e noho ana kekahi keikialii opipio ma Italia, o Anasalemo ka inoa; he mea i aloha nuiia e kona kaikuaana, malama pono ia no hoi. He milimili oia na kona kaikuaana, a ua pinepine no hoi ka hoopakele ana a kona kaikuaana iaia i na wa ana e loaa ai i ka pilikia. No ka hana aloha mau a kona kaikuaana iaia, ua hopu aku la oia ia aloha a hoopaa ma kona puuwai, a ma na hana hoi e like me ka ke kaikuaana, o ia kana hana i hana ai.
I ka make ana o ko laua makuakane, noho kokoolua wale iho la no laua me ke aloha no o kahi i kahi; a o na hana maikai a pau a ke kaikuaana i kauoha mai ai laia e hana, o ia ka Anasalemo i hana ai me ka hoolohe pono a hana oluolu aku hoi i ke kaikuana, a lilo iho la ia he mea nui loa iaia.
I kekahi la, hele aku la ke kaikuaana e like me ka mea maa mau iai, aka, aole oia i hoi iki mai i kauhale a loihi na la o ko laua kaawale ana. Kaumaha loa iho la ko Anasalemo manao no ka nalowale ana o kona kaikuaana, a aohe hoi he mea nana e hoolaukanaka kona noho mehameha ana, o na wale no.
Komo mai la ke aloha o ke kaikuaana a hele aku la ia e imi; kukala hele aku la ia e imi ma na alanui, pii ma na mauna, ha-lo ula na awawa, na kualono, a mawaena o kela ano kanaka keia ano kanaka o Italia, aole nae he mea nana i hai mai i kahi i hele ai, aohe hoi he mea nana e hoike mai i keia, - "Ua hala ka Puulena aia i Hilo, Ua imi aku la ia Papalauahi." Walohia wale oe, e like me kekahi poe.
Hoolohelohe aku la keia o ka wawa wale ia mai o kekahi mea e pili ana i kona kaikuaana, aole nae he wahi mea i loheia nona. Aloha wale!
I kekahi po, i ka wa a Anasalemo i huli hoi aku ai no ko laua hale, hoea ana kekahi kanaka i kahikoia me ka aahu ano e, a haawi mai la he palapala ma kona lima me no ka hawanawana pu mai i ka inoa o ua kaikuaana la. O ka wa ia o ka ahaaina ai i'o o na Katolika; a he mea mau i na kanaka ka aahu ana i na kapa ano e, aohe pahaohao o ka manao ke ike aku.
Anehe aku la o Anasalemo e hopu i ka mea nana i lawe mai ka palapala, aka, nalowale koke aku la kela iloko o ke aluka kanaka, a me ke pihoihoi oia i heluhelu iho ai i ka palapala, penei:
"E Anasalemo, kuu kaikaina; ke ola nei no au me ka maikai. Ke noi aku nei au ia oe, e like me kou aloha ia'u, mai hoopoina oe i ka hana ana mai no'u i ka mea a'u e kauoha aku nei ia oe. E iho mau ae oe i na po a pau ma kahi alanui oloi e moe la ma ka aoao hema o ka Pa Alii. He umi kapuai mai ka puka aniani hope loa aku, e loaa ia oe kahi noha o ka pa. E lawe mai oe i ipukukui, a ua wahi noha la o ka pa, malaila oe e kau aku ai i ka ipukukui, e hoohuli aku nae oe i ka a iloko i ike ole ia oe. E hiki mau ae oe malaila i na po a pau ma ka hora 12, a malaila oe e noho ai a kani ka hora ekahi o ka wati o Sana Ianuariusa, alaila, huli hoi aku oe. E hoomanao oe, mai poina, o ka pule noi kela a kou Kaikuaana, e hooholo pono oe i kau hana."
Ia po no, hoomaka aku la o Anasalemo e hooko i ke kauoha me ka iini nui o ka manao e hui pu me kona kaikuaana. Lawe pu no hoi oia i ka ipukukui, a hele aku la maikahi ala ololi i kuhikuhiia ma ka palapala.
He wahi anoano a eehia hoi ua wahi la, aohe puuluulu o na kanaka e like me kekahi mau wahi e ae o ke kulanakauhale, a na ka malamalama powehiwehi o ka mahina i kokua pu mai iaia i ka helu ana i na ipuka aniani, a loaa aku la kahi o ka pa i olokeaia me na amana hao ma kae kahawai.
Maloko o keia wahi noha o ka pa i wikiwiki ino iho ai oia i ka huna ana i ka ipukukui; alaalawa ae la oia ma o a maanei me ka ninau iho iloko ona, - "no keaha la kuu kaikuaana i koho ai i keia wahi, i wahi no maua e hui ai?"
Ma o iki aku o ua wahi nei ka muliwai, a lana mai la ka manao iloko ona, maloko mai paha o ka muliwai e au mai ai kona kaikuaana, no ka makau i ka hele ae ma ke alanui o ikeia mai paha e kanaka.
Iaia e ku ana i kana wati mehameha o ka po, e hoomanawanui ana hoi i ke anu me ke koekoe a ka makani kehau o ke aumoe, puiwa wale ae la no ia, me he mea la e pohapoha mai ana ka hoe ma ka iliwai, a hele aku la ia e nana, aohe ana mea i ike aku. Me he mea la hoi he halulu kapuai kana i lohe, a hele aku la no e nana, aohe no he kanaka, ua kuhihewa wale no ia.
[Aole i pau.]
-
Waiho na Iwi ma ka Aina Malihini.
E kuu MAKAAINANA,
He ukana nui ka'u e hooili aku nei nau e auamo a halihali aku ma na kaiaulu o Hawaii, i ike mai ai na kini a me na makamaka, ka wahine, na keiki, a me na moopuna a pau, o Daniela Kaninau, ua hala oia ma keia aoao o ka muliwai eehia o ka make ma ka hora 12 m. o ka Poaono, Sepatemaba 7, 1895, ma Kapalama-kai, Honolulu, Oahu, iloko o ka wiliau ikaika a ka ma'i kolera. Ua haalele aku o Daniela Kaninau mahope he wahine a me na keiki, a au mai mahope o ka laua keikikane muli loa ua loaa i ka ma'i hookaawale ohana ma ka la 16 o Augate me ke ola maikai no, a me ia ola maikai no a make aku la ma ka la 7 nei. He kanaka o Daniel Kaninau i kamaaina i na mea a pau o na Kona, he hookipa a heahea, a he makamaka maikai hoi ma na mea a pau, a he hoahanau oiaio hoi iloko o Iesu Karisto no ka Ekalesia o kekaha, ma Kona Akau, Hawaii. Nolaila, ke komo pu aku nei au me ka ohana o me ka wahine i hooneleia i ke kane ole, a me ua keiki i nele i ka makua ole, no ka u pu ana iloko o ke kumakena a me ka luuluu, a na ke Akua e hoomama mai na kaumaha. "Nana noi haawi mai, a Nana no i lawe aku, e hoomaikaiia Kona inoa ma na Lani Kiekie Loa, he malu ma ka honua, a he aloha i kanaka."
Aloha kakou a pau.
J.W.H.I. KIHE.
Puuhale, Honolulu, Sept 11, '95.
-
Ua hoole ae kekahi poe Pukiki aole keia ma'i e laha nei iwaena o na kanaka he kolera. A o ia ka ke kumu e hopohopo loa nei lakou.
Ma ka halekuai Waiona Kalepa e loaa ai ke SAKE maikai i paipai ole ia me ka wai, i like ole me ko kahi mau wahi aku ka paipaiia. He hapaha (25 keneta) ke kumukuai no ka omole hookahi. E kii nui ae!
Ua hooliloia ka aina o ke Aliiaimoku o waho o Kulaoka hua, Makiki, he 22 eka ka nui, i kekahi hui hoopukapuka aina, no $20,000. Eia keia aina kula ma ewa iho o Punahou.
Mai ko makou mea kakau e noho la i ka olu o Hanalei i ka Ua Loku i loaa mai ai keia mau wahi lono, penei. "Eia ke malania loa nei kekahi poe o Hanalei nei i na rula i hoolahaia mai nei ma KA MAKAAINANA. Ke ai nei i na mea mehana wale no, koe no nae ka poi, ke ai huihui nei no. Ke hoomaloka nei no kahi poe. Ke hoomaemae nei na hale a me na wahi pelapela, malalo o na kauoha a ka Hope Makai Nui o keia apana. He la ua a hoopoluluhi loa keia a'u e kakau nei ia oe. Aole mea hou e ae. B.W."
Mele Aloha Aina.
-
Leo, - aoao 272, Hoku Ao Nani.
Hoolulu ke aloha aina, pili paa ka manao me ka lahui, he-ha-he-ha;
Ua hue ka iini, ua kani uina ka wai o Namolokama, he-ha-he-ha;
A he pali nui aku ia a ka manao e uilani ae nei, he-ha-he-ha;
Mea ole i ke kono a ka manao a e hiu no a wela, he-ha-he-ha.
HUI:
O ka pukuniahi Auseturia kui lua i ke one o Kakuhihewa, he-ha-he-ha;
Ua wehe ka pili'na o ka ulu i ke alo a he bipi kuapuu hololua, he-ha-he-ha;
Elua poka ahi Helene kau e ka weli i ka muhee, he-ha-he-ha;
E nakulu, e nakolo i ka lewa e a e o a e Wilikoki, he-ha-he-ha.
E na pokii alo ehu poka o ka luna o Daimana Hila, he-ha-he-ha.
Aia i Waahila e ka upu, ka iini, ke lokahi ka manao, he-ha-he-ha;
He manao no ko'u a e kuilima pu me ke one o Kakuhihewa, he-ha-he-ha;
Okiaia mai e ke kai nui, kaawale mai o Lehua, he-ha-he-ha.
G W MAHIKOA.
Kilauea, Kauai.
-
Ma Ke Kauoha
-
KEENA O KA PAPA OLA,}
HONOLULU, Sept. 2, 1895.}
Oiai, aia na kauka i hoolimalimaia e ka Papa Ola ma ka Halemai Kolera kahi i noho ai no ka malama ana i na poe ma'i, ua hiki no i kela a me keia mea ma'i ke loaa kekahi kauka e ae i laikiniia ana e makemake ai e lawelawe aku iaia.
WILLIAM O. SMITH,
Peresidena o ka Papa Ola.
sep. 9-3mnw.
-
MAU RULA NO KA PAPA OLA.
KEENA O KA PAPA OLA,}
HONOLULU, Sept. 3, 1895.}
1- O ka lawe ana i ka i'a, i'a-iwi, a i ole ia, o kekahi mea ulu paha o ke kai a wai paha, mai ke kai, a i ole ia, kekahi awa, loko, muliwai a kahawai paha, mawaena o ka Lae o Makapuu a me Kalaeloa a mai na kuahiwi o ke kai, ua papa loa ia.
2- O na hale inu rama a pau a me na wahi e kuaiia ai o ka waiona ma ka Apana o Honolulu, ua kauohaia e paniia mai ka hora 6 P.M. a ka hora 6 A.M. o kela a me keia la.
Ma ke kauoha a ka Papa Ola,
WILLIAM O SMITH.
sep. 9-3mnw.
-
RULA O KA PAPA OLA.
KEENA O KA PAPA OLA}
HONOLULU, Sept. 4, 1895.}
Ua papaia ka akoakoa ana ae o na heluna nui o ka lehulehu ma kekahi wahi hookahi iloko nei o ka Apana o Honolulu. Ua pili no keia rula i na akoakoa anaina haipule, na aha puhiohe a me na wahi e ae o ka lehulehu i maa i ka puuluulu mai me na heluna nui.
Ma ke kauoha a ka Papa Ola,
WILLIAM O. SMITH,
Peresidena o ka Papa Ola.
sep. 9-3mnw.
-
KEENA O KA PAPA
HONOLULU, Sept. 7, 1895.
Aohe mokumahu, mokupea a waapa paha o kekahi ano e haalele mai i ke Awa o Honolulu no kekahi awa e aku o keia Paeaina me kekahi palapala ae ole mai ka Papa Ola aku.
Aohe mokumahu, mokupea a waapa paha o kekahi ano e haalele mai i ka Mokupuni o Oahu nei no kekahi Mokupuni e aku o keia Paeaina me kekahi palapala ae ole mai ka Papa Ola aku.
WILLIAM O. SMITH
Peresidena o ka Papa Ola.
sep. 9-3mnw.