Ka Nupepa Kuokoa, Volume VII, Number 17, 25 April 1868 — Ka Nupepa Kuokoa. He mele no Kualii, Kulanipipili, Ku-LANIOAKA, KUNUIAKEA &c. [ARTICLE]

Ka Nupepa Kuokoa.

He mele no Kualii, Kulanipipili, KuLANIOAKA, KUNUIAKEA &c.

I haku ia e Kumahukia a me Kaiwiokaekaha, na kahu ponoi o Kualii; ma ke kaua i Kunia, ma Keahumoa i Lihue. Un hanau ia o Kualii ma Kalapawai, ma Kailua, Koolaupoko, i ka A. D. 1555. O Mahuluanuiokalani ka makuahine, a o Kauakahi a Kahoowahaokalani ka makuakane. Ua waiho aku au i ke Kumuuli me Kumulipo no ka mohai ole ka ! Pela paha oukou. S. M. KAMAKAU. 14. He a'u, he koi, he pale ka aha, E kii e hoa, e lanalana, E kua i kumu o Kahiki—e— A ua mai Hilo— A ua mai Hilo ke kuee nei Na opua ua o Maheleana, Ilaila ka ua malie, He la la loa i ka makani, Haiki ka make a ka ua, Hakeke hakoko ana Mahiki, I ka puka ua, Aia mahiki ke ka mai la, O Pukahonualani ke kane, O Mahiolana ka wahine, Hoao o Wakea ia Papa, Hanau ka naupaka ku i kahakai, O Ohikimakaloa ka wahine, Hooipo o Hulumanailani, Ku i ka ena anaiia ilalo, O Mehepalaoa a Malena, Me he kai olohia a Manua, Ka la kaihonua, o Kulanipipili, O Lanipipili o Lanioaka, O Lanikahuli o Omealani, O Lonohekili—Kaakau, O Nakoloilani ka iloli moana, O Waia, o Hikapoloa, O ka po i muliwaa, O Kane, o Ahulukaaala, O Kaneikamakaukau, o Ahulu, Alua anahulu au ia oe e Ku—e. E Ku—e e Kualii—

15. Eia ka pa ia ai o Kapaau, Kanaka o Wawaka i Kapua, Ke keiki kea pua hako o Hawi, Eia ke puhi kukui o Kukuipahu, Ka wahine waha ula Ke ai i ka ina o Makakuku; Eia ke kanaka pii pali, Haka ulili o Nualolo, Keiki kia–kia manu–e– Kau kia–kia manu o Lehua, O Kuku o Aa–e— O Ku no ke Alii— 16. O Haulanuiaiakea ke kai a Hinaimanua, O Paepaemanua kea luna, Aia o Makanalii kana wahine, Hanau ka naenae ku mauna, Ka hinihini kani kuaola, Hanaina iho i ka wae mua o ka waa, O Molokai la ua naha, Ke naha, lele apana a Kana—la— Make holouka holokai, Hoonalulu nua Luukia, Hoopailua i ka iloli, Ke kauhua o ke kamaiki, Aia ka ieie hanau i ka nahele, Hanau ka lupua me lulana, Ku i ke opu o Lono, O Kapoiolei ka wahine, Ku ka inaina, i hope ka lanalana, Ku kona iho–a— O Ku no ke Alii— 17. O Ku ke kai malimali, Me he kai ea–na o Ku a na Ku, Eia ke kai kui hala, Kui-kui hala o Keaau, Ka umeke hoowalina lepo, Me he hokeo la ke ala, Eia ka huakai hele alanui kanaka, Wali ai ka lepo o Mahiki, I ka paalaia e ka wawae, O Kapapaiakea ka nalu o ka inaina, O Kaihiihi kana wahine, Hanau koa waa ku i ka mulehua, Kalai ia ka ipu i ke kai aleale, Kalai ia e Hinakapeau, Loaa mai o Ukinohunohu—la. O Ukinaopiopio o Moakuu a Lono.

O Kalei o Kaelekoha, O ke'kua makahalo o ke hau, Iluna ka hualewa o ka lipo, O Kanamuakea, o Kekaiakea, O Kamoanakea, o Hulukeeaea, O Hauii, o Hauee, O Hauiinuinaholoholo, O Hauiinuikaiapokahi a Kai-la-e— Humea mai ko malo e Ku, No Ku ka malo i ke kaua haa oe, Oia luia ka umu, me he awai la, Eia ka uhuki hulu manu, Kau pua o Haili, Na keiki kiai pua, Ka lahui pua o lalo, Eia ka wahine ako pua, Kui pua, lei pua, Kahiko pua o Paiahaa, Ke uhai mai nei i ke'kua, A pau mehameha Apua, Kau ia ka makani hiamoe–la–e— Moe ua makani hiamoe la, Moe i ka papa o Kukalaula, O Ku no ke Alii— 18. O Uliuli o Maikea, O Kahakapolani ka wahine, O Kaukeano, o Mehameha ka wahine, O ka po ka lani i ka ino, He ino ka lani, ke poeleele nei luna, Ke wawa nei ka honua, I ka inaina o Kalani, Hoonaku, hoomamae, hookaahea, Ka hookokohi ana mai, Iloko o Hanaieleele, Hanau kamaua ku i ka nahele, Hanau ka auau kani kuaola, Hanau ke kamahele Ku i ke alo o Kaha oko, He pukaua na ke alii, He kaua, he wai kaua, O Ku no ke Alii— 19. He kaua na ke'lii na Ku, E uhau ana i Kawaluna I hea la kahua e paio ai o ke kaua? I kahua i Kalena, I manini, i hanini, I nini ia i ka wai akua, I Kahana, i Malamanui, I ka luna o Kakapa i Paupauwela, I ka hilinai i ke kalele, I ka hala o Halahalanuimaauea, I ke kula ohia ke Pulee, I ke kua o Lono o Makalii, I ka lala ala o Ukulonoku, No Kona paha no Lihue, No ka la i Maunauna, No ka wai i Paupauwela, I ulu Haalilo i nei pua, I ka hauna iho o Aui, Kikomo kahuna i kokualaau, Komo Ku i kona ahuula, Ua wela ka ua i ka lani, I ka la i Kauakahi Hale, Ula ka lau o ka mamane, I ke koaie o Kauai, He pili ka ihe ia Ku, I ke aloalo o ka maile, Ka nalu kakala o Maihiwa, Pania ka wai i Halapo, Ka naha ilalo o Eleu, Hukia ka ua amoa i ka lani, Me he hee nui no ke kuahiwi, Ku hee ana o Hilo ia Puua, Aia ma Hilo peahi, Ula ka wai i Puupauwela, Ke kilau o Malamanui, Ka moo kilau i Kakapa, Kui ka lono ia Haalilo, Haua aku la ko kama, Hahaki Haalilo i ka manawa, I kaimuku kahuna ia Ku, Ila ka manawa ia Ku, I ke keiki a Haalilo, Eia Malamaihaehae, Ke kama a Niihaukolohe, Ke pani wai o Kekuuna, He mee nei no ke kanaka, Ke pu nei i ka aahu, Ke olapa nei i ka laau, I ka laulau o ke kapa, Eia Haalilo, lilo—e— O Ku no ke Alii— (Aole i pau.)