Ka Nupepa Kuokoa, Volume XI, Number 52, 28 December 1872 — Na mea Hou o ka moku o Hina. [ARTICLE]

Na mea Hou o ka moku o Hina.

O Molokai nui a Hina ka moku, o ke kaha Pili a Kaiakea ke kuli Pili o Kalaeloa ma ka nana ana a me ka hooponopono ana i ke ano o Molokai i keia manawa, a e like me ko na makahiki i hala ka uliuli maikai o ka aina, he ula pu wale la no i ka lepo a ka makani, ula loa a i ke kaha o Hilia.

HE KAONA O KAUNAKAKAI. O Kaunakakai ke kaona ma Kalaeloa, nona na hale laau o ka Moi e ku haaheo la me ko lakou nani, 1 hale kuai lole no E. C. Fountain, 1 Luakini, 1 hale Kula, me na pa aina e hoopuni ana elua ina mea kanu, a ma ka pili pa na hale o na kamaaina e hoopuni ana i na mea kanu, uala, ko. KA MAI KUNU. Maluna o na keiki eono makahiki a emi mai ka ikaika loa o ke kunu, hoomaka mai ke kunu a hala elua pule, pii mai ka maka ulaula, me ka uhi mawaho o na maka, a he mau la, puka mai ke koko ma ka waha me ka ihu, ina aole e malama pono ia, e make ana no. KA OIHANA HANA LIMA. O ke paniolo bipi, lio, kahu kaa bipi, malama hipa, kanu niu, hahau pa pohaku ka hana nui a na kanaka o Kaunakakai a me Palaau, malalo o ka hana a ka Moi, no ka ($10.00) no ka malama hookahi. KA PEPA PILIWAIWAI. O ka pepa piliwaiwai lepo pele kahi hana nui ma Kaunakakai nei, na kane me na wahine, a me na keiki aole no lakou i hoomaha iki ia hana uso ole mai Novemaba 6 1872 a keia la a'u e kakau nei, eia nae; ua ekeeke kapalili mai nei o J. M. Kamoa, me he mea la, aia pu oia ilaila, ke olelo nei au, he oiaio na mea a pau i hoolahaia e S. K. Peleleu, no ka pepa, a mai nana i na amuamu ino a J. M. Kamoa. PAKELE MAHUNEHUNE KE OLA. I ka Poaha, la 4 o Dekemaba nei, oiai na paniolo lawe bipi maluna o Pauahi no Lahaina, e hoi ana mai ke awa aku me ka lealea o ka holo o ka lio, kuia aku la oia me kekahi wahine, o Kaai kona inoa, a hai kona iwilei akau, a pehu ke poo, aole maopopo ke ola. S. K. POKEA. Kaunakakai, Dek. 4, 1872.