Ka Nupepa Kuokoa, Volume XXVII, Number 38, 22 September 1888 — Page 3
| This text was transcribed by: | Iasona Ellinwood |
| This work is dedicated to: | Nā hanauna e hiki mai ana |
Ka Nupepa Kuokoa
KE KILOHANA POOKELA NO KA LAHUI HAWAII.
MA KE KAUOHA.
Ahaolelo o ke Kau o 1888.
HE KANAWAI
E PILI ANA I KA OIHANA KOA O KE AUPUNI.
E hooholoia e ka Moi a me ka Ahaolelo o ko Hawaii Paeaina.
PAUKU 1. O ka Oihana Koa o ke Aupuni oia no keia mau puali mahope nei:
1. O na Koa Kiai o ka Moi he Puali Kumau e like me ka mea i hoomaopopo ia mahope iho nei.
2. O na puali pualu i hai ia na inoa malalo iho nei :
Ka Honolulu Rifles . . . 4 puali.
King's Own . . . 1 "
Queen's Own . . . 1 "
Prince's Own . . . 1 "
Leleiohoku Guards . . . 1 "
PAUKU 2. O na Koa Kiai o ka Moi he puali ia i oi ole ae mamua o 65 kanaka ka nui o na kulana a pau. O na Aliikoa Hookohu ia o na Koa Kiai o ka Moi he hookahi Kapena a me kona mau Lutanela elua a aole e oi ae, i koho a i hookohu ia e ka Moi a e kakau pu ia ko lakou mau palapala hookohu e ke Kuhina o ko na Aina E.
E kepa ia na Koa o ka Puali Kiai o ka Moi e lawelawe ma ia hana no kekahi manawa i oi ole aku mamua o ekolu makahiki a e hoohiki a kakau inoa lakou i kekahi olelo hoohiki imua o kekahi Lunakanawai Apana a Hoomalu paha ma ke ano e like me keia mahope iho nei :
Owau o . . . ke hoohiki paa nei au e hana no au ma ke ano he koa iloko o ka Puai Koa Kiai o ka Moi no ka manawa he . . . makahiki, ina pela ka loihi o ka manawa e makemake ai ke Aupuni Hawaii ia'u e hana ai ; e hana no au me ka pololei a e kupaa mahope o ka Moi Kalakaua me Kona mau Hooilina a Hope : a e kokua no au me ka oiaio a me ka pololei mamuli o ke Kumukanawai o ke Aupuni Hawaii.
Pela ke Akua e kokua mai ai ia'u.
Inoa . . .
Ua kakau inoa o . . . i olelo ia maluna a ua hoohiki i ka olelo hoohiki maluna ae imua o'u i keia la . . . o . . . 18 . . .
PAUKU 3. O kela a me keia koa i hoohiki pono ia nana i mahuka aku mahope o ia hoohiki ia ana ina e ku ka hewa ia ia imua o kekahi Lunakanawai Hoomalu a Apana paha e kau ia maluna ona ka hoopai hoopaahao ia ma ka hana oolea no kekahi manawa aole i oi mamua o 12 malama.
PAUKU 4. O ke Alii ka Moi ka Alihikaua Nui o na Puali Koa a pau o ke Aupuni.
PAUKU 5. O na Puali Koa Pualu i hai ia na inoa maluna ae aole e oi aku mamua o 65 kanaka o na kulana a pau ma kela a me keia puali, a na kela a me keia puali e koho ma ka balota, aole e emi malalo o hookahi manawa iloko o kela a me keia makahiki ma na manawa i hoakaka ia ma ko lakou mau kanawai, i Kapena a me elua Lutenela. O na luna i koho ia pela e hookohu ia no e ka Moi, a e kakauinoa pu ia ko lakou mau palapala hookohu e ke Kuhina o ko na Aina E.
PAUKU 6. O na puali eha o ka Honolulu Rifles oia no ka Bataliona Mua o na Koa Pualu Hawaii. O na puali pualu eha i ae ia ma keia Kanawai oia no ka Bataliona Elua o na Koa Pualu Hawaii. Na na Aliikoa i hookohu ia o kela me keia Bataliona, ma ka la mua o Feberuari a mamua ae paha o ia la o kela me keia makahiki, e koho ma ka balota i kekahi poe e lawelawe ma ke ano Mekia, Akukana, Luna Puuku, Luna Nana Pu a me Kauka o ka Bataliona i olelo ia, a na ka Moi e hookohu aku ia poe me ka ae pu ana o Kona Aha Kuhina i mau Mekia a mau Kapena no na Bataliona pakahi i olelo ia, a e kakauinoa pu ia ko lakou mau palapala hookohu e ke Kuhina o na Aina e. O na Aliikoa a pau e noho nei i keia manawa ma kela a me keia Bataliona, e mau no ko lakou noho ana ma ia oihana a hiki i ka manawa e koho ia ai ko lakou mau hope mai ma ka oihana e like me ka mea i olelo ia ae nei.
PAUKU 7. Iloko o kanakolu la mahope iho o ka apono ia ana o keia Kanawai, na ka Mekia o ka Bataliona Mua i olelo ia e kahea i halawai o na aliikoa i hookohu ia o na Puali Koa Pualu Hawaii no ka noono ana i ka inoa o kekahi mea kupono e hookohu ia i Konela no ia mau Puali Pualu. Na ka Mekia, a ina ua kaawale oia ma kahi e, na ke aliikoa malalo iho ona ma ke kulana e hoomalu ia halawai ana, a e hoomaka ka halawai e koho ma ka balota i kekahi mea kupono e waiho ia aku kona inoa imua o ka Aha Kuhina no ka Oihana Konela. O ka mea e loaa ana ia ia ka hapa nui o na balota a pau loa oia ka mea e hoike ia aku iloko o ekolu la mahope iho i ke Kuhina o ko na Aina E e ka luna koa e noho lunahoomalu ana ma ia halawai, a ina aole i loaa i kekahi mea mahope o ke koho ana no ekolu manawa, ka hapa nui o na balota a pau loa, alaila, o ka mea i loaa ia ia na balota i oi ae mamua o kekahi mea e ae ke hoike ia aku pela, a ina ua loaa i na mea elua a oi ae paha na balota i like ka nui, a aole mea e ae i oi, alaila, e hoike ia aku no ia mau mea pakahi pela i ke Kuhina o ko na Aina e. Ua hiki no i ka Luna Koa e noho hoomalu ana ma kekahi halawai e koho ma na koho ana a pau i ae ia ma keia pauku.
PAUKU 8. Iloko o ka manawa kupono mahope iho o ka hoike ia ana aku o ia inoa a mau inoa paha i ke Kuhina i olelo ia, nana no, ina aole i kue ka hapa nui o ka Aha Kuhina no ke kupono ole o ka mea i hoike ia aku ai pela, (ina he hookahi wale no), i ka Moi, a nana no e hookohu ae ia ia i Konela no na Puali Pualu Hawaii. Ina ua oi ae mamua o hookahi inoa i hoike ia aku, na ke Kuhina i olelo ia, me ka ae ana o ka Aha Kuhina, e koho i kekahi o ia poe, a o kona inoa ke waiho ia aku imua o ka Moi a nana e hookohu ae ia ia e like me ka mea i olelo mua ia.
Pauku 9. Ina aole i apono ia kekahi mea i hoike ia ae i ke Kuhina i olelo ia a hoike ia aku i ka Moi e like me ka mea i hoakaka mua ia ae nei, na ke Kuhina i olelo ia iloko o elua pule mahope iho o ka loaa ana ia ia o ia hoike, e hoike aku i ka luna koa kahiko o na Puali Pualu i olelo ia e waiho hou mai i inoa hou no ia oihana, a e hana ia ke koho ana me ka hoike ana e like me ia i hoakaka ia ma ka Pauku 7 o keia Kanawai.
Pauku 10. Ina e apono ole ia ka inoa a mau inoa paha i hoike ia aku mahope o ia halawai elua ana e ka hapa nui o ka Aha Kuhina, ua hiki i ke Kuhina i olelo ia, me ka apono ana o ka Aha Kuhina, e waiho aku i ka inoa o kekahi mea kupono e ae i ka Moi, a nana no e hookohu ae i ua mau mea nei i Konela no na Puali Pualu Hawaii. E kakauinoa pu ia ka palapala hookohu o ke Konela e ke Kuhina o ko na Aina E.
Pauku 11. O ke Konela i hookohu ia pela oia no ke Alii Koa o na Bataliona a elua o na Puali Pualu Hawaii, a e loaa ia ia no kana hana he uku o hookahi haneri dala o ka malama
Ua hiki i ua Konela nei i olelo ia e koho aku e lawelawe ma ke ano he ukali nona i kekahi luna koa me ke kulana Kapena, a oia ka Akukana o na Puali Koa Pualu Hawaii, a e hookohu ia oia e ka Moi, a e kakauinoa pu ia kona palapala hookohu e ke Kuhina o ko na Aina E.
Pauku 12. O na Puali Koa a pau o keia Aupuni, a me na waiwai a pau o ka lehulehu i lawelawe ia no ia mau puali a e pili ana paha ia lakou, a me ka hoolilo ana o na dala a pau i hookaawale ia no na hana koa, a me ka bona, na hae a me na ki pu ana, malalo no ia o na kauoha a me ka hooponopono ana a mana o ke Kuhina o ko na Aina E, a e loaa ia ia ka mana me ka ae pu ana o ka Aha Kuhina e hoopau i kekahi Alii Koa o na Koa Kiai o ka Moi, a i ole ia na Puali Koa Pualu Hawaii, e hoemi mai a hoopau loa i ka oihana koa, a e hooponopono hou i ua oihana koa nei ina e hoopau ia a haalele paha kekahi o na puali i ae ia ma keia Kanawai.
Pauku 13. E noho no kekahi Konela i hookohu ia malalo o keia Kanawai ma kona oihana a hiki i ka hookohu ia ana o kona hope. Eia nae, ina e ulu ae he hakahaka ma ia oihana mamuli o ka make ana, haalele ana a hoopau ia ana o ka mea e noho ana, na ke Kuhina o ko na Aina E e kauoha aku iloko o elua pule mahope iho o ia hakahaka ana e koho hou ia kekahi mea e hoouna ia ia ia ka inoa o na Alii Koa o ka Bateliona i olelo ia, i pani ma ia oihana, a e hookohu ia oia e like me ka mea i hoakaka ia ma ka Pauku 8 o keia Kanawai. E waiho ia ae ka inoa o ka mea e lilo i Konela ma ka pule elua o Feberuari o kela a me keia elua makahiki mahope iho o ka hookohu ia ana o ke Konela mua malalo o keia Kanawai, a e hana ia kela a me keia waiho ana ae e like me ka mea i hoakaka ia ma ka Pauku 8 o keia Kanawai.
Pauku 14. Ua hiki i ke Kuhina o ko na Aina E i kela a me keia manawa me ke apono ana o ka Aha Kuhina, e hoopuka a hoolaha i mau rula i kupono i kue ole me kekahi Kanawai o keia Aupuni no ke alakai a hooponopono ana o ka oihana koa, a e mana ia mau rula maluna o ia oihana koa.
Pauku 15. Aole e lilo kekahi mea maloko o keia Kanawai i mea e manao ia aole i hiki ke hookohu ia kekahi poe e ka Moi ana i manao ai he pono e noho me ka uku ole ma ke ano he poe ukali ponoi nona, me na kulana hanohano ana i manao ai he pono.
Pauku 16. E lilo keia i Kanawai mai kona la aku e apono ia ana, a ma ia manawa o na Kanawai a me na hapa Kanawai a pau a me na Kanawai e ae a pau e kue ana i keia Kanawai e hoopau ia a ma keia ke hoopau loa ia nei, oia hoi keia: O kela wahi o ke Kanawai mua o Kamehameha III, hoonohonoho i na hana i haawi ia i na Kuhina o ko Hawaii Paeaina e pili ana i na hana a na Kiaaina, e pili ana i na koa ma na Mokupuni a me na lako kaua.
Na Pauku 3, 4, 5, 6 a me 7, Haawina V, Mokuna IV, hapa mua o ke Kanawai Hoonohonoho i hana i haawi ia i na Kuhina o ko Hawaii Paeaina.
Na Pauku 3 me 4 Mahele 6, Mokuna 4 o ia Kanawai no. Pauku 4 o ka Mokuna II., mahele elua o ia kanawai e pili ana i ke Kuhina Kaua me na Manuwa.
Mokuna 22 o na Kanawai o 1886, i kapa ia "He Kanawai e kukulu a e hooponopono ai i ka Oihana Koa o ke Aupuni."
Ke hoike aku nei au o ka Bila Kanawai mamua ae nei, ua waiho ia aku imua o ka Moi no kona apono ana, a ua hoihoi ia mai e ia i ka Ahaolelo me ka apono ole ia, me kona kumu kue, ma ka la umikumamaha o Iulai, 1888, a ua kakau ia ua mau kumu kue nei iloko o ka moolelo o ka Ahaolelo, a ua noonoo hou ia ua Bila Kanawai nei, a ua kakau ia na ae me na hoole ma ka la Iwakaluakumamaha o Iulai i olelo ia, a ua lilo ia i Kanawai ma ke koho ae ana o ka elua-hapakolu a oi ae o na lala koho o ka Ahaolelo.
WILLIAM R. CASTLE,
Peresidena o ka Ahaolelo.
Hoike :
J. ALPRED MAGOON,
Kakauolelo.
KELA ME KEIA
E heluhelu i ke Kanawai Koa.
Ma ke Kinau o ka Poalua nei, ua holo aku ke Alii ka Moi no Kawaihae.
O ke poo ohule ke kahiko o keia mau la, ua hele a niania.
E alawa ae i ka makou leta mea hou o na aina e mai.
Ua waiho aku o C. P. Iaukea i kona ku'ana pili oihana Puuku o ke aloalii.
He pauahi nui ma Kapalakiko ma ka la 9 nei.
Auhea la o Masanui? Ua pouli a palase. Hu ta ataata.
Ua lilo ae nei ia Messrs F. M. Hatch, C. P. Iaukea me C. Brown, ka mokukiakahi Healani o ka Moi.
Inehinei i hoomaha ai ka Bana no hookahi mahina a hiki i ka la 21 o Okatoba.
Eia ke hoolala ia nei ke kahua kuai ia o makeke hou o Honolulu nei ma kai aku o Halekauwila.
Ua kipoka pahu ia aku kekahi kauhale o Zanzibar na kekahi mokukaua Geremania.
Ua loaa mai nei na kukui hou o ka luakini o Kaumakapili, ma ka mokuahi Australia mai.
I keia Poalua ae i ke awakea, e haalele mai ai ka Australia no ka Ipuka Gula.
O ke alanui hou no ka luapele o Kilauea, e hoomaka koke ia aku ana kona ana ia iloko o keia mau pule iho.
Ua hiki mai nei ma ka Australia o ka Poalua nei, o Mr. A. V. Gear, he kumukula hou no ke kula o alanui Papu.
He 66 mau mea kahiko o Hawaii nei i hoouna ia aku ma ka mokuahi Alameda e ke aupuni, no ka hoikeike nui o Melebona.
Ma ka haalele ana mai o ka Vandalia ia kakou, ua hoemi ia ka ikaika kaua moana o ke awa o Honolulu nei a i ka elua wale mokukaua.
He elua mau mokukaua e ku mai ana i keia mahina ae, oia ka moku Adimarala Pelekane Swiftsure a me ke Komorana mai Kolumabia Beritania mai.
I ke ahiahi Poakai nei i holo aku ai ka moku Beritania Haiakina no na awa o na mokupuni o kakou, a o ka moku Amerika Vandalia hoi, ua heo aku nei oia no Kapalakiko.
O ka loihi o ke ku ana o Vandalia i ke awa o Honolulu nei, he hookahi makahiki me 23 la. O ko Lakawana hoi, he hookahi makahiki me elima mahina.
I ke kakahiaka Poalua nei, i haawi ae ai ka Bana no ka manawa mua loa, he anaina puhi ohe hoolaulea no ka kanaka pili oihana o ke kulanakauhale nei ma ka nanai o ka Hale Leta.
E koho balota hou aku ana na mokupuni o Oahu nei me Hawaii mamuli o ke kipaku ia ana o ke Alii Luhiau a me na Lunamakaainana Kauhi me Kamauoha.
Ua loaa mai ia makou he manao pale mai a S. C. Luhiau mai no kela kipe dala, aka, no ka piha loa o ka kakou pepa, ua hookaulua iki makou a keia pule ae.
He nui na leta mai na makamaka mai na makou, a no ka piha o ka pepa me ke Kanawai e puka mau nei i na pule a pau, ua waiho iki makou a loaa ke kowa kaawale.
I ka Poaha nei i kalewa ae ai ka mokuahi Kulanakauhale o Nu Ioka iwaho o ke awa, me 385 Pake me na palapala huikau a me 52 Iapana no keia awa.
Ua loaa mai nei he leta i ke Kanikela Amerika, e ku mai ana i keia awa ka mokukaua Burukalana mai Iapana mai malalo o ka pea. Ua haki ia kona hao hookaa o ka huila.
I ke ahiahi Poaha nei, ua hipuu paa loa ia ma ka berita o ka mare, o Mr. E. O. White me Miss A. C. Austin, kaikamahine a ke Kuhina o ko na Aina E, na ka Rev. W. B. Oleson i hoohui ia laua.
E haalele ana ka ahahui kinipopo o Kikako i keia mahina ae ma ka lakou huakai no Auseteralia, me ke kipa ana i ko kakou nei awa he hookahi la e hoikeike i ka hei o ko lakou mau lima i ka apo popo.
HE MOOLELO HOU.
E hoopuka aku ana makou i ka moolelo hoonanea o Hapa-i-ka-La-Hapa-i-ka-Mahina i keia pule ae, a oia kekahi o na moolelo maikai i hoopuka ia ma ke aupuni Hawaii, a o ka hoa hoi e kohu ai ka olelo haaheo—ka ukli o Robine Lo a me ka Eke Kalena.
Ua unuhi ia mai keia moolelo mai na olelo like eha, mai ka olelo Helena a ka olelo Farani, a mai ka olelo Farani a ka olelo Latina, a mai ka Latina a ka olelo Beritania, a mai ka Beritania a ka olelo Hawaii. He lana ko makou manao, e ohihia nui ana na poe heluhelu o ka NUPEPA KUOKOA, e pono e lawe nui o lohe pepeiao aunei i kona nani.
$6 Makana
I ka mea e loaa ai kuu lio kane hauliuli, i hoailona ia i ka haokuni A C ma ka uha hope akau.
E loaa no au ma Mokauea, Kalihiwaena.
2199 3t* AKAU.
OLELO HOOLAHA.
Ua hookohu aku au ia J. A. MAGOON nana e lawelawe ka'u mau hana pili oihana a pau, oiai au e kaawale ana mai Hawaii aku nei. W. A. KINNEY.
Honolulu, Aug. 27, 1888. 2196-1m
AHA HOOKOLOKOLO APANA EHA o ko Hawaii Pae Aina. Ma ka hooponopono waiwai. Ma ka hana o ka waiwai o na keiki a HIRAM KOLOMOKU PAHAU o Honolulu, Oahu, i make.
Ma ka waiho ia ana mai o ka palapala noi a me ka papa hoike a Sandford B. Dole, Kahu Malama Waiwai o na keiki i hai ia ae la maluna, e noi ana e apono ia na hoolilo he $3,665.98, a e hoike ana, o na mea i loaa mai iaia he $3,321, a e noi ana e nana a e apono ia kela mau mea, a e kauoha ia e mahele ia na waiwai e waiho ana ma kona lima i na mea i kuleana malaila a e hookuu ia oia mai kona noho ana ma ia ano.
Ua kauoha ia, o ka POAKAHI, ka la 15 o OKATOBA, 1888, ma ka hora 10 kakahiaka, ma ke keena ma ka Hale Hookolokolo ma Aliiolani Hale, Honolulu, oia kahi a me ka manawa i koho ia no ka hoolohe ana i ua noi la, a me na papa hoike i olelo ia, a o ka poe a pau i pili malaila e hele mai a e hoike i ke kumu, ina he kumu io ko lakou e ae ole ia ai ua noi la, a malaila e hoike mai ai na hoike o na mea i kuleana maloko o ka waiwai i olelo ia. A e hoolaha ia keia kauoha ma ka olelo Hawaii, maloko o ke KUOKOA, he nupepa i pai a i hoolaha ia ma Honolulu, i ekolu pule mamua ae o ka manawa i olelo ia no ka hoolohe ana.
Kakau ia ma Honolulu, Sepatemaba 4, 1888.
Na ka Aha :
HENRY SMITH,
Hope Kakauolelo.
2197-3t.
HOOLAHA PAPA HOOPII AUHAU.
Ke hoolaha ia aku nei, e noho ana na Papa Hoopii Auhau o ka Apana Hookolokolo Elua ma ko lakou mau apana no ka hoolohe ana i na hihia hoohalalahala auhau ma kahi a me ka manawa e like me keia hoolaha:
Okatoba 9, 10, 1888, Hale Hookolokolo ma Wailuku, hora 10 a. m.
Okatoba 12, 13, Hale Hookolokolo ma Makawao, hora 10 a. m.
Okatoba 17, 18, Hale Hookolokolo ma Hana, hora 10 a. m.
Okatoba 23, 24, Hale Hookolokolo ma Lahaina, hora 10 a. m.
Okatoba 27, 29, Hale Hookolokolo ma Pukoo, Molokai, hora 10 a. m.
GEO. E. RICHARDSON,
Peresidena o na Papa Hoopii Auhau o ka Apana Hookolokolo Elua.
Wailuku, Maui, Sept. 12, 1888.
2198-3t
HOOLAHA LUNAHOOPONOPONO WAIWAI.
E IKE auanei na kanaka a pau, owau o ka mea nona ka inoa malalo iho nei, ua hookohu ia i Lunahooponopono no ka waiwai o J. L. Kapakahi i make no Lahaina, Maui. Ke hai ia aku nei ka lohe i na mea a pau i aie i ka mea make e hookaa mai i ka mea nona ka inoa malalo iho nei, a o ka poe a ka mea make i aie ai, e hoike mai i ko lakou mau Bila i hooia ia; a o ka poe e paa ana i kahi mau waiwai o ka mea make e hoihoi mai ia'u.
E hana ia na mea a pau iloko o na mahina eono mai keia la aku. E loaa no wau ma kuu keena Loio ma Wailuku, Maui.
JNO. W. KALUA
Lunahooponopono waiwai o J. L. Kapahi i make.
Lahaina Sepatemaba 3, 1888.
2198-4t
HOOLAHA HOOKO MORAKI.
Mamuli o kekahi mana kuai i hoike ia maloko o kekahi palapala moraki i hana ia mawaena o Kale Kauakai a me kana kane mare o ka aoao mua, a me William Dean o ka aoao elua, ma ka la 25 o Iune 1884, i kakau kope ia ma ka buke 87 aoao 284, a mamuli o ka uhaki ia ana o na kumu aelike o kela moraki, oia hoi ka hookaa ole ia o ka uku panee, nolaila, ke hoolaha ia aku nei e ka mea nona ka aoao elua o ua moraki nei, e hooko ana oia ia mana kuai.
A ke hoolaha hou ia nei, aia mahope aku o na pule ekolu mai keia la aku, alaila, e hoolaha ia aku ana na aina i hoike ia ma ia moraki no ke kudala ana, ma ke keena kudala o J. Morgan ma Honolulu, ma ka la 8 o Okatoba 1888, hora 12 o ia la.
Aia ma kahi o W. R. Kakela na olelo hoakaka no keia mea.
WILLIAM DEAN,
Mea Moraki Mai.
Hana ia i keia la 8 o Sepatemaba 1888.
Penei na aina i moraki ia :
Kela mau aina ma Kalihi.
1 20-100 eka o ka aina kalo maikai loa he hapa o ke Kila Nui 3287 ia Kale w.
2 62-100 eka kekahi hapa o ke Kila Nui 3270 ia Kale i olelo ia.
HALEKUAI BIBI HONOLULU
(Hope o Wm. McCandles.)
HELU 6 ALNAUI MOIWAHINE, MAKEKE MA ULAKOHEO.
Na Bibi momona, Hipa, Puaa me Ia, na lako ai ulu & co.
O na kauoha a na ohana a me na moku mai e hooko koke ia no me ka eleu a me ka hikiwawe.
O na holoholona ola no na moku e hiki no ke hooko koke ia.
Telepone Helu 212. 2185-1
W R. KAKELA.
LOIO A HE KOKUA MA KE KANAWAI
He Luna Hooiaio Palapala.
tf.
HOOLAHA HOU
HOOLAHA.
E noho ana ka Lunakanawai Kaapuni o ka Apana Ekolu o ko Hawaii Pae Aina ma ke Keena penei:
Ma Hamakua, Okatoba 9, 1888, hora 9 a. m. ma ka Hale Hookolokolo.
Kohala Hema, Okatoba 12, hora 9 a. m. ma ka Hale Hookolokolo.
Kohala Akau, Okatoba 16, 17, 18, hora 9 a. m. ma ka Hale Hookolokolo.
Kona Akau, Okatoba 23, 24, 25, hora 9 a. m. ma ka Hale Hookolokolo.
Kona Hema, Okatoba 30, 31, hora 9 a. m. ma ka Hale Hookolokolo.
S. L. AUSTIN,
Lunakanawai Kaapuni.
Sepatemaba 10, 1888.
2198-tf
HOOLAHA.
E noho ana ka Aha Hoopii Auhau no Hamakua, Kohala Akau, Kohala Hema, Kona Akau, a me Kona Hema, ma na la i kuhikuhi ia malalo iho:
No Hamakua, Okatoba 8, 1888, ma ka Hale Hookolokolo o Honokaa, hora 9 a. m.
Kohala Hema, Okatoba 11, ma ka Hale Hookolokolo o Waimea, hora 9 a. m.
Kohala Akau, Okatoba 15, ma ka Hale Hookolokolo o Kapaau, hora 9 a. m.
Kona Akau, Okatoba 2@, ma ka hale Hookolokolo o Kailua, hora 9 a. m.
Kona Hema, Okatoba 29, ma ka hale Hookolokolo o Hookena, hora 9 a. m.
S. L. AUSTIN,
Peresidena Aha Hoopii Auhau.
Sept. 10, 1888.
2198-tf
HOOLAHA KUAI KUDALA MORAKI.
MAMULI o ke kauoha a A. Rosa a i kulike ai me ka manawa iloko o kekahi moraki i hana ia e S. Napahukapu a me Kahale (w.) kana wahine mare o Honolulu, Oahu, ia A. Rosa, kahu malama waiwai, i kope ia ma ke Keena Kope ma Honolulu ma ka Buke 84 aoao 479 a me 480.
Ke hoike ia aku nei ma keia, E kuai kudala aku ana ka mea nona ka inoa malalo iho, ma kona Keena Kuai ma alanui Moiwahine ma Honolulu i oleloia ma ka Poakahi la 1 o Okatoba A. D. 1888, ma ka hora 12 awakea o ia la, i ka aina a pau i hoakaka ia malalo iho (oiai ua hoolaha mua aku ka mea moraki i kona manao e hooko i keia moraki.)
Eia ka Aina: O ka aina a pau loa ma ka Palapala Sila Nui 1503 Kuleana 1080 ia Kaui, nona ka ili he 62-100 eka, e waiho la ma Kalaepohaku, Kapalama, Honolulu i oleloia.
JAMES F. MORGAN,
Luna Kudala.
Honolulu, Sepatemaba 14, 1888
2198-3t
HOOLAHA HOOKO MORAKI.
I KULIKE ai me ka mana kuai iloko o kekahi moraki mai a Joseph Po@er Green ame H. F. Green kana wahine mare ia Stephen Spencer, i hana ia ma ka la 20 o Aperila 1875, a i kope ia ma ke Keena Kope Hawaii ma Honolulu, buke 41, aoao 410, 411.
Ke hoike ia aku nei ua makemake ka mea moraki e hooko i ua moraki nei, no ka uhaki ia o na kumu aelike, oia hoi, ka uki ole ia o ke kumupaa a me ka ukupanee, i ka wa e hookaa ia ai, a ma ia hooko ana e kuai aku ana ma ke kudala akea ma Honolulu i ka waiwai paa i hoike ia malalo iho i kekahi la a hora e hoike ia aku ai ma ka hoolaha.
No na mea i koe e niniau aku ia A. Rosa, Loio no ka mea Moraki.
STEPHEN SPENCER,
Mea Moraki.
Ma o kona Hope,
H. A. WIDEMANN.
Hana ia Honolulu, Sept. 10, 1888.
Penei ka hoakaka ana o ka waiwai paa e kuai ia ana:
1 O kela apana e waiho la ma ke alanui Kauka ma Honolulu oia ka aina i hooholoia ia J. P. Green i oleloia e David Pauloa ma kekahi Palapala Kuai i hanaia Aperila 20, 1875 i kopeia ma ke Keena Kope i oleloia Buke 41 aoao 408 a me 409.
2 A me kela apana aina a pau loa e pili ana i ka apana aina i hoikeia maluna ae a i hoakaka ia ma ka Palapala Sila Nui Helu 1630 a oia ka aina i hoolilo ia ia J. P. Green i oleloia e David Pauloa ma o kekahi palapala kuai i hana ia 20 Aperila 1875 a i kopeia ma ka Buke i hoike ia maluna ae.
2198-4t
HOOLAHA HOOKAPU.
Ke papa loa ia aku nei na kanaka a pau, aole e hele wale maluna o kela wahi o ke Ahupuaa o Honouliuli Ewa, Oahu, e waiho la mawaena o Kalaeloa a me Pili o Kaha, a aole hoi e hopu a lawe wale i ka i'a mai ia mau wahi o hoopii ia ma ke Kanawai.
CECIL BROWN,
Luna Aina Nui o James Campabell.
Honolulu, Sepatemaba 15, 1888.
2198-2t
HOOLAHA HOOKO MORAKI.
I kulike ai me kekahi mana kuai i hoike ia maloko o kekahi palapala moraki i hana ia ma ka la 4 o Augate 1887, i hana ia mawaena o C. J. Makimo a ma kekahi inoa John Puhi, o Honolulu Oahu o ka aoao mua, ia J. M. Monsarrat o Honolulu i olelo ia o ka aoao elua, a i kakau ia ma ke Keena Aina ma ka b ke 105, aoao 232 233, a no ka uhaki ia ana o na kumu aelike i hoike ia ma ua moraki la, oia hoi no ka uku ole ia o ke kumupaa me ka ukupanee, nolaila, e kuai kudala ia aku ana mahope iho o ka pau ana o ka manawa i hoike ia ma ke kanawai, na aina, na hale, a me na mea a pau i hoike ia ma ua moraki la. J. M. MONSARRAT,
Mea Moraki.
Honolulu, Sept. 15, 1888.
O ka aina i hoike ia ma ka moraki, oia no kela e wa ho la ma Puunui, Honolulu, i olelo ia, a i hoakaka pono ia penei:
O na pono a me na kuleana a pau o C. J. Makino a ma kekahi inoa John Puhi i olelo ia, iloko o hookahi hapa kolu a mahele maloko o elua apana aina e waiho la ma Puunui i olelo ia, a oia no hoi ka Apana 3 me 4 o ka Palapala Sila Nui Helu 4535 L. C. Award Helu 2151, i haawi ia ia Puhi makuakane o C. J. Makino a ma kekahi inoa John Puhi.
2198-4t
AHA HOOKOLOKOLO KAAPUNI o ko Hawaii Pae Aina Apana Ekolu. Ma ka Hooponopono Waiwai. Ma ka waiwai o KEAKA (k) Imua o ka Lunakanawai F. S. Lyman. Olelo kauoha e hoolaha aku no ke noi ana mai e koho i Lunahooponopono Waiwai.
Ma ka heluhelu a me ka waiho ana mai o ka palapala noi a J. W. Nuhi, he mea a Keaka k. i aie aku ai, e hoike mai ana, o Keaka k. no Puna, Hawaii, ua make kauoha ole ma Puna, Hawaii, ma ka la 30 o Iulai, m. h. 1888, a e noi ana e haawi ia ka palapala hookohu Lunahooponopono Waiwai ia J. W. Nuhi me Kaluaikeone.
Ua kauoha ia, o ka POAKOLU, ka la 19 o SEPATEMABA, m. h. 1888, oia ka manawa i koho ia no ka hoolohe ana i ua noi la, imua o ua Lunakanawai la, ma ke Keena Hookolokolo o keia Aha ma Hilo, Hawaii, a ma ia manawa a ma ia wahi no e hele mai ai na mea a pau i pili e hoike mai i ke kumu, ina he kumu oiaio ko lakou e ae ole ia ai ua noi la. A o keia olelo kauoha e hoolaha ia ma ka olelo Hawaii, i ekolu pule ma ke KUOKOA, nupepa ma Honolulu.
Kakau ia ma Hilo, Hawaii, ko Hawaii Pae A na, Augate 20, 1888.
F. S. LYMAN,
Lunakanawai Aha Kaapuni Apana Ekolu.
2197-3t