Ka Nupepa Kuokoa, Volume XXXIV, Number 7, 16 February 1895 — Page 3
| This text was transcribed by: | Kaui Sai-dudoit |
| This work is dedicated to: | Ia oe e kuu kaikamahine alua: Pulama Manono Goodhue |
Ka Nupepa Kuokoa
KE KILOHANA POOKELA NO KA LAHUI HAWAII.
KA HUI ALAHAO ME AINA O OAHU
MANAWA HOLO.
Mai a Mahope aku o Iune 1, 1893.
NA KAA AHI
HONOULIULI.
B B A D
A.M. P.M. P.M. P.M.
HAALELE IA HONOLULU 8:46 1:45 4:35 5:10
HAALELE IA MANANA 9:10 2:38 5:10 5:36
HIKI I HONOULIULI 9:57 3:37 3:26 6:22
NO HONOLULU.
C B B A
A.M. A.M. P.M. P.M.
HAALELE IA HONOULIULI 6:21 10:43 3:43 6:42
HAALELE IA MANANA 6:35 11:15 4:15 1:10
HIKI I HONOLULU 7:20 11:56 4:56 6:45
A. No na Poaono wale no.
B. No kela âme keia la.
C. Koe na la Sabati.
D. Koe na Poaono.
-----------------------------------
NU HOU HAWAII.
--------
Ua hoapau ia o Lionel Hart mai ka noho ana kakauolelo aku o ke Keena o ko na aina e, a ke haluku nei na noi a makena wale no ia makalua hakahaka.
--------
Ua hoopanee ia ka makana ana i ka puu dala manawalea a ka poe kuonoono o Honolulu i ka puali makai a kapae ia ke kanawai koa. O ke dala ua paa ma kahi e malu ai.
--------
I ka la 24 o Ianuari, ma Honolulu nei, ua hikiikii la ma ka mare e Rev. J. Walamuu o Mr. Alava Blake Jr. me Miss Louisa Kealoha ma ka hale noho o ke kane ma Leleo.
--------
Ma ka noho ana ma Feberuari 11 o ke kau kiure kaapuni o ka mokupuni o Oahu nei i hoopanee ia mai ka la 4 mai, a no ka pau ole o ke kanawai koa, nolaila ua hoopanee hou ia a noho hou ma Feberuari 18.
--------
I Honolulu iho nei ka Makai nui o "na Hono a Piilani" ma ka mokuahi "Waila" ia 1 o ka la Sabati iho nei, a ma ka hoi ana aku no o ia mokuahi ma ka Poalua mai, ua huli hoi aku ia no ke kahua o kana hana.
--------
Ua lawe keia poe i ka hoohiki malalo o ke Kumukanawai, R.N. Boyd, John Inch, J.L. Olohia, John Makahi, Kahoa James a me Hiram Kaaha, he poe i hopu ia ma ke ano hoohuoi ua komo i ko aluka kipi hohe wale a ua hookuu ia.
--------
Ke lawe la mai nei kekahi lohe, aia iloko o ka hui pipi a Achi me Nahale ma Holualoa Kona Akau Hawaii kekahi keiki pipi i hanau epaepa ia o ku ai i ke kupanaha. Malia ha he epaepa mai no ke kumu mai.
--------
Ua haule ia o John Kawi Nakuina mailuna mai o kahi kiekie loa e holo ai na balaka hoopaa moku o ke Alahuki Moku i ka Poaha nei, a ua pakele ke ola. ua olelo ia ua haule imua no ke kanaka ma keia wahi a ua make loa. "Aole e make he Maremona!"
--------
I keia la e upu la aku nei e ku mai ana ka mokuahi "Kalika" mai Honokuono a me Iokahama mai ma kona ala moana e huli hoi ana no Kapalakiko. Aole no ola e liuliu ke hekau mai ma Honolulu nei a ulau koke aku no kona pahu hopu.
--------
He mama maoli ka Luna Senate Balauwina i ka alo alo kai. No ka mea, ma ka Malulani o ka Poalua iho nei, ua pau iaia i ka holoholo ia mai na kai o Pailolo a me Kaiwi, a ma ia po iho no, ua alo ia aku ke kai o Kalelewaho a noho ana i Kauai. A me he mea la, e hoi mai ana no oia i keia la mai ka "moku kaili la" mai.
--------
O kekahi o na koa pualu o ke komopani A o ka Puali Kiai Lahui o Hawaii, o Frank Honeck kona luna, ua hopu la e Kapena Makai Scott i ke kakahiaka Poalua nei me ka paa no o kona aahu koa ma kona kino, oiai e ku wati ana. O ke kumu, ke kuhikuhi la nei ua komo pu oia iloko o ka poai ohumu lapuwale loa me na haole Cransten a me Muller i kipakuia ai ma ka mokuahi "Warrimoo" o ka hebedoma i hala no Amerika.
--------
Ma ka hora 6 paha o ke ahiahi o ka la 1 o Feberuari, ua hana la kekahi pepehi kanaka mainoino maluna o ke kino o kekahi paahana Iapana, o ka mahiko o Pahala ma Kau Hawaii, e kekahi limahana. Mahaia paulu o Charlie ka inoa, he kiai po no ka hale wili, ma o ko ka Malaila pakuikui ana ia Kichi me kekahi mea oukou, a i make ai ka Iapana. Ua ninaninau la kela hihia pepehi kanaka imua o Lunakanawai Apana Waipuilani, a ua waiho la aku la ka pepehi kanaka no ke kau kaapuni o Mei. Ua lawe loa ia mai ka Malaia i Honolulu nei e hoopaa ai, maluna mai o ke Malulani o ka Poalua nei, ahiki mai ka wa hookolokolo hoouna hou aku.
--------
Ua hele aenei o J.N. Kapahu e hoohiki malalo o ke kumukanawai a me kekahi kaau e ae o na kanaka o Kau imua o lunakanawai Waipuilani, me ka "pau pele pau manao" ana e kakoo i ka Repubalika mokupuni. Eia hoi ka hewa, o ko Mursta a me Sam hoopaukahua mai ia Kapahu. Malia o ka ino o kekahi la na wai ia nona iho, a i kela wa he Paulo o ua o Mr. Box i anapu ia ai e ka malamalama ma ka huakai a ka "wahine pahaohao me ka aahu keokeo."
--------
No ka hopu ia ana mai nei o ka Loio F.M. Wakefield o Hilo e ka Makai Nui Williams o Hawaii a me ka lawelaew hooponopono ole la ma ka hihia hoohuoi i lawe ia mai ai oia i Honolulu nei e ninaninau ai, nolaila ua nini loa na hoaloah o ka loio a no ia mea ke noi mai nei lakou e hoopau ia o Mr. William mai ka noho ana Makai Nui. Eia ka Makai nui o Hawaii i Honolulu nei i keia mau la maluna mai o ka Malulani, a me he mea la e ninaninau ia aku ana kana hoike ma kona aoao no keia hoopii e hoopau.
--------
Ua pepehiia kekahi Iapana o Mori ka inoa i ka po Poakolu nei, e kekahi mau Iapana ponoi no o kona lahui no laua na inoa Hoshina a me Arai, he mau mea hoopuka nupepa Iapana. Ua pepehi inoino loa ia o Mori e kela mau Iapana, a o ke kumu me he mea la, no ka aie o ka Iapana i pepehiia iho la i keia mau Iapana. Ua mokumoku na papalina a me na lima o Mori i keia mau Iapana. Ua hopuia mai laua a hoopaaia ma Kuapapanui. O Hoshino, he limahana oia e hoohana ia nei ma ka Hale Dute, a ua hookuuia mai ma ka bela he $500.
--------
Hu ka Luawai Aniani Repubalika.
----------------
I ka Poaha nei, Feberuari 14, ua puka mai ka wai o ka luawai aniani o ke Aupuni e eli ia nei e na Hoahanau McCandless ma ke kihi o na alanui Beritania a me Alapai ma kahi o ka 515 mau kapuai ka hohonu. He wahi wai uuku kai hu mai, aka ua manao ia e nui mai ana ka pii o ka wai e lawa ai ke hiki aku ka hohonu i ke kakahiku kumamalima mau kapuai hou aku e eli ai. O ka wai keia a ke Aupuni i manao ai e hoolawa i ke kulanakauhale. Ke pau ka hana no keia lua, alaila e eli hou ia aku ana ka lua o na luawai i manao ia ma ia wahi kokoke no.
--------
Hoahewaia ka Cleveland Kahua Hana.
-------------
Maloko o ka Hale Ahaolelo Lunamakaainana o ka mokuaina o Inidiana, i ke kakahiaka o ka la 22 o Ianuari, ua ku mai o Lunamakaainana Stutesman a heluhelu he olelo hooholo e hoahewa loa ana i ke kahua hana kuwaho a Kalivalana a e kokua ana i ka hoohui mai i na Pae Aina o Hawaii malalo o na olelo o ke kuikahi i apono ia e ka mana hooko o Peresidena Harrison. Ua kuehu mai oia mahope o ka olelo hooholo me ka leo kakana pakike e kuekaa ana i ka Cleveland kahua hana. Ua noi ia mai e waiho i ka olelo hooholo ma ka papa, aka ua hoohoka ia aku ma ke umi la ana iho a make loa a ua hooholo loa ia aku ka olelo hooholo e 79 poe ae ia 15 wale iho no mailuilu kue, o na poe Democarata a pau o ka hale ua koho wale no ma ka aoao e kue ana.
--------------------------
Hookuewa ia i na Aina e.
----------
Ua ae kekahi poe pio e paa mai nei ma ka halepaahao o Kawa, a i hookolokolo ole ia i keia wa, e haalele i na kaiulu o Hawaii a e hookuewa ia i na aina e me ka hookolokolo ole ia. A aole hoi lakou e hoi hou mai i Hawaii nei me ka ae ole o ke Kuhina o ko na aina e. Mawaena o keia poe, o Fred. Wundenberg, he Hawaii ma ka hanau ana; George Ritman, he Beritania ma ka lahu ia he on a o ke kulena hapalua o ka Hale Hana Hao Union; Jim Brown, he hookele kaa lio halihali ohua; F.H. Redward a me Fred H. Harrison, he mau Beritania ko laua lahui a he kukulu hale ka laua hanalima ike. He mau waiwai ko Harrison ma Hawaii nei, a he ohana.
He põe e ae kekahi i hoopa ia aku i ka manao hookuewa i na aina a me ka huli ole mai o na maka i hope nei, a i ole ia e noho a e aa i ka hookolokolo e lulumi ia mai ai. Mawaena o ka poe i hoole i keia manao hookuewa, o Manuela Reis a me Nick Peterson, he mau hookele kaa hoolimalima nae ana no a i elua. O ka mea nona ka inoa mua, he on a kaa lio, he mau aina a he ohana Hawaii.
Ke olelo ia mai nei, mawaena o ka poe e hookuu koke ia mai ana, ke ae lakou i ka hookuewa ia, o A.P. Peterson, C. Creighton, Edmund Norrie, J.C. White.
---------------------
HE MAU HAAWI MAKANA HANOHANO IA WAIPA A ME BROWN.
--------
He Makana Hiwahiwa Nui no ka Laua Mau Hana.
-------
Ma ka Poalua iho nei, Feberuari 12, he elua mau haawi makana hoohanohano i pepehiia i na luna aupuni hoomalu maluhia o keia kulanakauhale, oiai ke Kapena Makai Nui Robt. P. Waipa, mai na lede kuonoono mai, a la Hope Ilamuku A.M. Brown, mai na keonimana mai, ma ke ano he hoike ana i na mahalo kiekie i keia mau luna aupuni no ka laua mau hookauwa wiwo ole a me ke kilakila iloko o ka wa hoehu kaua kipi iho nei i pau ai na au o ke kolohe i ka pokopoko a lilo he mau pio na ke kanawai e waiho mokaki mai nei ma na halepaahao ma Kawa, ma ka Halekoa kahiko a ma Kuapapanui. Eia na moolelo pokole o keia panee makana ana.
Ma ka hora 1:30 o ka auina la poni moi, ua hoakoakoa ia ae ka puali makai o Honolulu nei maloko o ke Keena Hookolokolo o ka Aha Apana, e lawe pu ana i na mea kaua a i hoouiui iho hoi na helehelena ma kela anaina kamahao o na wahine. O ka manao o keia hoakoakoa ana, oia hoi no ka makaikai ana i ka haawi makana, me ko ka Ilamuku lilo ana i mea hookipa i ke komite wahine.
Na Mrs. E.D. Tenney i papahi mai ia Kapena Waipa me kela mau huaolelo kanaenae ma ka olelo Enelani:
E Kapena Robert Parker Waipa--
Ua hele mai nei makou ianei ma ka inoa o na lede o Honolulu nei, e papahi aku ia oe i keia mea hoomanao a me ke eke dala, ma ke ano he wahi mea pananaiki wale no e panee ia aku nei ia oe no ko makou mahalo nui loa i kau mau hana kilakila a wiwo ole iloko iho nei ko makou manao, e ae mai ana oe e lawe aku i keia mau hoailona o ko makou "Aloha Nui" a me na manao maikai no kou holomua a me ka oluolu.
I ka pua ana o kela mau olelo, ua omau mai la o Mrs. Tenney i ke pihi gula makana ma ka umauma o ke kuka o ke kapena.
Ua eehia loa la o Kapena Waipa no kela hana maikai a na wahine a pane aku la penei:
E na Lede--Ua nele ia au i na huaolelo kupono ole e panai akua i o ko hoomaikai wale no ia oukou no keia pihi nani. Me he mea la, no'u ihe, aole au i kupono e hoohanohano ia mai me keia makana waiwai nui, no ka mea ko'u ano he makai, ua lawelawe
[HE KII O KAPENA R.P. WAIPA.]
wale no au i ka'u hana me ke kupaa malalo o ke aupuni a'u i hoohiki ai o kakoo. Aka, ke hoomaikai aku nei au ia oukou a me ka poe a pau i hui i ka hookupu ana i kela mau makana, a e hoomomoa oi loa aku ana au mawaena o ka'u mau mea hoomanao a pau.
I ka pau ana o ka Kapena Waipa mau olelo hoomaikai i na lede, ua ku mai la ka Ilamuku a haiolelo mai la imua o ka puali, e hoolana ana ia lakou i kona mahalo nui i ko ka puali makai kulana wiwo ole iloko iho nei o ka wa kaua kipi.
I ka pau ana o na olelo a ka Ilamuku, alaila ua ku mai la o Mrs. Hatch a haawi mai la i ke eke dala he $375 dala gula ka nui o loko.
Aole no hoi o Mrs. R.P. Waipa i hoopoina la, no ka mea, ua makana ia aku oia me kekahi palapala hoomanao i kakau poepoe a kakauinoa ia e na lede he 130 o Honolulu nei. Penei ka heluhelu ana:
"Ma ka manawa o na ola a me na waiwai o na kamaaina o Honolulu nei e hooweliweli la ana, ua kokua nui loa ka Kapena Waipa mau hana i ka hoopau ana i ka pilikia. Nolaila o na lede o Honolulu no lakou na inoa malalo iho, mamuli o ko lakou anoi nui e hoike i ko lakou mahalo kulo no ka lawelawe pono la ana o ka hana, ua hookupu iho lakou i keia mea hoomanao a me ke eke dala ma ke ano he hoike ana i ko lakou mahalo kiekie." Alaila, ua hoomaka ke kakauinoa ana me ko Mrs. S.B. Dole ma ke poo.
E haawiia ka mahalo ia Miss Helen Wilder no ka hookumu ana i keia hana a me ka hele ana e ohi dala.
O ka põe i akoakoa ae ma ka wa i lawelawe ia ai ka haawi makana ana, oia o Mrs. F.M. Hatch, Mrs. C.A. Brown, Mrs. E.D. Tenney, Mrs. A.T. Atkinson, Mrs. Edward Hammer, Mrs. R.P. Waipa, H.P. Baldwin, H. Waterhouse, E.D. Tenney, C.A. Brown, W.H. Rice, W.R. Castle, A. Brown a me kekahi poe e ae.
Ma ka hora 2:30 o ia auina la hookahi no, maloko o ka Hale Oihana o Mr. P.C. Jones, ua lawelawe ia kekahi hana haawi makana e ko ka Hope Ilamuku mau hoaloha, oia he wati a me ke kaula gula, me ka palapala i kakauia penei:
Hope Ilamuku A.M. Brown--Aloha oe--Ma ka inoa o kekahi he
[HE KII O KA HOPE ILAMUKU A.M. BROWN.]
luna o kou mau hoaloha o ke kulanakauhale nei, a i hoike no ko lakou mahalo nui i ke ano o kau lawelawe ana i na hana pili i kou kulana iloko o na hebedoma i hala, ke makana aku nei au ia oe i keia wati a me ke kaula, me ka hilinai e lilo ana ia i mea hoomanao oluolu la ai e oe ko keia anaina hoike aloha ana nou. F.J. LOWREY,
Aia maloko o keia wati gula, ua kahakaha ia keia mau huaolelo penei: "Makana ia ia Arthur M. Brown, Feberuari 12, 1895, e kona poe hoaloha ma Honolulu i hoike no ko lakou mahalo i kana mau hana ma ke ano he Hope Ilamuku iloko o ka wa kaua kipi o 1895."
He wati gula maikai, kaula wati hiehie a he puuwai daimana, oia ka makana i ka Hope Ilamuku.
------------------
HE MAKANA HUI HANOHANO.
-----
Na ka Poe Haole Kalepa o ka Aina ka Puali Makai o Honolulu
no ko Lakou Kupaa a wiwo ole.
---------
Mamuli o ko Mr. Andrew Brown mahalo nui i ka Puali Makai Hawaii o ke kulanakauhale o Honolulu no ke kupaa a me ka wiwo ole i ke kakoo ana i ke aupuni iloko o na la kaua iho nei a na enemi hookahuli i ka Repubalika i hoao mai ai e pakaha, a ma ia wa i ike ia ai na makai Hawaii e hoolohe a hooko kuio ana i na kauoha a pau a na poo o ka oihana, e mohai an ai ko lakou pakahi i hoohiki ai, a i ku ai a eha kekahi mau makai mai na poka mai a ka enemi, eia aole nae lakou i kuemi a hoi hope, aka ua kupaa iho lakou me he pa pohaku la, no ka mea aole i lilo ka haule eha ana o kela mau hoa make o lakou i kumu nana e kumukaia i ka lakou hoohiki no ka mea ua hooi hou ia ae ko lakou makaala a me ka eleu ma ka lawelawe ana me ke kaniuhu ole i ka po a me ke ao. Ua hele aku o Mr. Brown mawaena o na haole kalepa kuonoono me keia manao ulumahiehie i na makai hookauwa kuio, a na makahehi mai na poe kuonoono malalo ae nei e wehe i ka hipuu o ko lakou manao maikai o hoike aku i ka puali i ko lakou mau mahalo nui a lokomaikai i ka oihana hoomalu maluhia, a e ike ia ko lakou mau manawalea puuwai hamama ma keia papa hookupu dala penei:
W.G. Irwin & Co. $100
H. Hackfield & Co. 100
Lewers & Cooke 100
Castle & Cooke 100
J.T. Waterhouse 100
I.I. Steam Navigation Co. 100
M.S. Grinbaum & Co. 100
F.A. Shaefer & CO. 100
C. Brewer & Co. 100
Bishop & Co. 100
M. Phillips & Co. 100
Wilder & Co. 100
Hyman Bros. 100
T.H. Davies & Co. 100
H.P. Baldwin 100
Hawaiian Hardware Co. 100
Allen & Robinson 50
Union Feed Co. 50
California Feed Co. 50
H.W. Schmidt & Son 50
E.O. Hall & Son 50
Lewis & Co. 50
Metropolitan Meat Co. 50
Benson Smith Co. 50
H.S. Wichman 25
W.C. Peacock 25
Hoffachlager & Co. 25
Hollister & Co. 25
Manufacterers Shoe Co. 25
Hobron Drug Co. 25
Bruce Cartwright 25
Hawaiian New's Co. 25
McChesney & Sons 25
Pacific Hardware Co. 25
Jas. A. Hooper 25
H.J. Nolte 25
M.P. Robinson 25
Jas. Steiner 10
A.S. Hartwell 10
$2,350
-------------------------
O keia puu dala makana, e kaana ia ana mawaena o ka puali makai holookoa, aka, e Kapena Waipa ana paha ka mea e hoei ia ana ma ke kai puu ana iaia me ka $500.
E nana ae i ka makana no ke kupaa e hookauwa no ka hana pono.
----------
HE MOOLELO KAAO
---NO---
Namakaokapaoo
------
KE AHIKANANA WIWO OLE O KULA
I MAUI.
----
Ke Koa Kaulana i ke Au o Imaikalani ka Moi o Kauai.
------------
KA MEA NANA I PULUMI PAU NA KAEAEA O KAUAI AIPUNI.
-------
KA OLALI AU MOANA O NA KAI EWALU O HAWAII NEI.---KA HIAPAIOLE O NA LA I
AU WALE AKU LA.
------
(Hoopukaia e John K. Ilihia, Lihue, Kauai.)
A o ua wahi akua nei, eia no ia ke lelele hele mai nei ma o a maanei, e kapalulu mai ai iloko o ka laau kohu pipi have no Halona, a iloko o kela wa, hoomaka aku nei ua whai kanaka nei e alualu, a no i ala hoi ka holo, a o na Makaula pu aku nei no.
Ia wa, ike mai nei ua whai akua nei i kahi kanaka e alualu aku ana iaia, o ko i ala huli hou mai la no ia i hope, a pane mai nei na Makaula; ea, hopua aku hoi, aole i pau aku ka huaolelo a na Makaula i pane aku ai, o ka lele aku la no ia o ua wahi kanaka nei a paa ana ka pu-ana-i o kahi akua i ka hopu ia, i keia owili ana no a ua wahi Keaalele nei, haki pu ka a-i o ua eepa la a nukee ana ihope, a haule pahu iho la i ka honua, a pane iho la ua whai taata nei: A, make oe ia'u aohe e ola, o ke keiki iho la no ia o na pali hulaana, a o ka iki hawae iho no ia o Milolii; eia ka hoi ihoa ua ikaika nei ou, i kaena iho nei hoi oe i ko ikaika, a nolaila me ia e hele kekee ai kou uhane a ma-ku-papau oe i ka po pau ole.
Ia manawa hookuu aku nei ua wahi kanaka nei i kahi akua me ka olelo ana aku, a--moe malie i ke kai o ko haku, imi ia kahi o ko ola, a no ke ano naenae o ua whai kanaka nei o ia mau kipona ai awahia oia ilikina ana iho la, ia wa haule iho nei keia noho ilalo puhipaka, a eia no hoi na Makaula ke noho mai nei, me ko ianei manao hoi aia a pau ke puhipaka ana, alaila auamo lakou i ke kino make o ua akua nei a komo iloko o ka heiau ia po, a oia ka na Makaula i ninau mai ai ia ianei; ea, pehea hou mai nei na Makaula, pepehi hou iho a make, o ka make oia ka maikai, he hana maalahi ia, o ke ola hou ae ea, he hana nui ia na kakou i keia po, a nolaila ea, pepehi hou ia ko hoa paio a make.
Ei no ka pano a ua wahi kanaka nei; he hookahi no hawae a kanaka ikaika, lauhihi lauhue ka moku, make ka hoa paio, hoi hou iho ea, he hana ia na kanaka ikaika ole, ei aku a o loa make ka hoa paio, hele aku auanei kahi uhane o ia nei a lalo i o Milu la, olelo aku i ka nui akua o lakou, elua no hoi o'u pepehi ia ana mai nei e Keaalele o ko'u make no ia.
Pane aku nei na Makaula: Kahaha, ea hana nui hoi, ola hou hoi ko hoa paio, he koae iho kena ia, he manu lele no ka pali kahako. I hou aku nei no ua whai kanaka nei, heaha ka mea e hana nui ai, ua make ia aohe e ola hou ae, e puhipaka hoi paha olua a hoi aku kakou i ka hale.
O keia wa a lakou e noho nei iloko o ka ululaau, ua aumoe, a eia lakou nei iloko o ka nahele o Kaipuhaa, kahi nona ia mau lalani mele e kahoahoa ia nei e ka poe puai olioli e keia au:
I alai ia ae la e Nounou,
Nalowale Kaipuhaa,
Ka laula mauka makai o Kapaa--e,
Mai paa i ka leo he ole ka hea mai.
A pau ae nei hoi ke puhipaka ana a ua mau elemakule nei, hoeu aku nei ua wahi kanaka la e hoi lakou, i mai nei na Makaula, nana ia iho ana ko hoa paio, pane aku nei ua wahi kanaka nei, i ke aha hoi, e nana hou iho hoi paha oe, wahi a lana la i pane hou mai ai, ia wa anehe iho nei na lima o ua wahi kanaka nei na lima o ua whai kanaka nei e hopu a hapai ae, i lalau iho ka hana, he neo ka mea i loa, ua pupuhi aku la ka i'a no uko'a, a ma kahi o ke kino make o ua akua nei i waiho ai, aia he pihaa nui e moe ana i ulu ia e ka limu a paa pono, a iloko o ia wa i pii ino ae ai ka huhu o ua wahi kanaka nei aole o kana mai. Pane mai nei na Makaula, auhea iho la ua enemi nei ou, hoole aku nei keia, aole la, he pihaa keia e moe nei; a pane hou mai nei na Makaula, o ka maua no hoi paha ia e olelo aku ana la oe, e pepehi hou iho oe i ko hoa paio a make, aole nae ou wahi mea a hooloha mai i ka maua olelo, kahaha---a laa ka pakele la, aole maua e kala i ike aku nei i ka hala ana, ia maua no i puhipaka iho nei, o ka wa no ia i oili aku nei mamua pono ae la no ou.
A iloko o keia wa a lakou e kamailio nei, ike aku nei kekahi o na Makaula i keia mea nui eleele e lele pahaha la iluna o ka lau laau, ninau mai nei kona hoa, auhea; aia no hoi ia ke lele la i kai, a i aku nei kona hoa, oia no, aia la ke lele la.
------------------
Hoolaha Hou.
----------
AHA HOOKOLOKOLO KAAPUNI APANA Ekahi o ko Hawaii Pae Aina. Ma ka Hooponopono Waiwai. Ma ka hana o ka waiwai o Antono Pedro i make kauoha ole.
Ma ka heluhelu a me ka waiho ia ana mai o ka palapala noi a Pipiana ka whaine kanemake a Antone Pedro e olelo ana o ANtone Pedro o Ewa Oahu ua make kauoha ole ma Manana Ewa i olelo mua ia ma ka la 9 o Feberuari A.D. 1896, a e noi ana e hoopuka ia na palapala lunahooponopono waiwai ia Cecil Brown o Honolulu.
Ke kauoha ia nei o ka POALIMA la 15 o MARAKI A.D. 1896, oia ka la i koho ia no ka hoolohe ana i ua palapala noi la ma ke Keena Hookolokolo o keia Aha ma Honolulu, a ma ia manawa a ma ia wahi e hele mai ai na mea a pau i pili a e hoike mai in a he kumu ka lakou e ae ole ia ai ua palapala noi la.
Kakauia ma Honolulu Feb. 14, 1895.
Na ka Aha:
GEORGE LUCAS,
2533-3 Kakauolelo.
---------------------------
AHA HOOKOLOKOLO KAAPUNI APANA Elima o ko Hawaii Pae Aina. Imua o ka Hooponopono Waiwai. Ma ka hana o ka waiwai o KAUI (k) i make. Imua o Lunakanawai J. Hardy. Ma ka heluhelu a me ka waiho ana mai o ka palapala noi a me ka papa hoike helu waiwai a J. Kakina Lunahooponopono o ka waiwai o Kaui (k) o Hanalei Mokupuni o Kauai i make, e noi ana e apono ia na hoolilo he $6935, a e hoike ana o na mea i loaa iaia he $96.35, e nana a e apono ia keia mau mea, a e kauoha ia e mahele ia na waiwai e waiho ana ma kona lima, e hookuu ia oia a me kona mau hope mai ko lakou noho ana lunahooponopono waiwai.
Ke kauoha ia nei o ka POALUA la 19 o MARAKI A.D. 1895, hora 10 a.m. ma ke Keena Hookolokolo o keia Aha ma Lihue Mokupuni o Kauai, oia kahi a me ka manawa i koho ia no ka hoolohe ana i ua noi la a me ka papa hoike helu waiwai, a ma ia wahi a me ia manawa e hele mai ai ka poe a pau i kuleana a e hoike mai in a he kumu kekahi e ae ole ia ai a e hoike mai i ka poe i kuleana i ua waiwai la.
A e hoopukaia keia kauoha ma ka olelo Hawaii iloko o ke KUOKOA, he nupepa i pai a hoolaha ia ma Honolulu, no ekolu hebedoma nee papa, a o ka hoolaha hope loa ana aole e emi malalo o elua mau hebedoma mamua ae o ka manawa i koho ia no ka hoolohe ana.
Kakauia ma Lihue i keia la 8 o Feberuari 1895.
JACOB HARDY,
Lunakanawai Kaapuni Apana Elima.
2533-3
-------------------------------
Halawai Makahiki.
--------
E MALAMA IA ANA KA HALAWAI MAkahiki o ka HUI HAWAIIAN FRUIT a me TARO ma Wailuku Maui ma ka POAHA, MARAKI 1, 1895, hora 11 kakahiaka no ke koho ana i na luna o ka Hui no ka makahiki e hele aku nei.
A.N. KEPOIKAI.
Kakauolelo.
Wailuku Maui Feb. 9, 1895. 5533-3
---------------------------
Ka Edison Mekini Uwila Kupanaha.
UA HIKI MAI NEI KA MEKINI UILA Kupanaha a EDISON i Honolulu nei, a ke hoikeike ia nei ma ka HALEAI HAUPAA ONO O HART & CO., ma Alanui Hotele. No 1 kenikeni wale no ike oe i na mea kupanaha a pau. Hamama mai ka 9 A.M. a i ka 9 P.M.
2532-tf
---------------------------
Hoolaha Hou.
---------------------------
AHA HOOKOLOKOLO KAAPUNI APANA Elima o ko Hawaii Pae Aina. Ma ka Hooponopono Waiwai. Ma ka waiwai o JAMES GILMAN no Hanapepe Kauai i make kauoha ole. Imua o ka Lunakanawai Kaapuni ma ke Keena.
Ma ka heluhelu a me ka waiho ia ana mai o ka Palapala nei a Uha (w) Hattie Makaonaona, John a me Iulia Gilman, a hoike mai ana o James Gilman no Hanapepe i oleloia, ua make kauoha ole ma ia wahi ma ka la 25 o Maraki M.H. 1888, a e noi ana e haawi ia ka Palapala Hookohu Lunahooponopono Waiwai ia August Iketer no Eleele Kauai.
Ua kauoha la o ka POAHA, ka la 14 o MARAKI M.H. 1895. i ka hora 10 a.m., oia ka manawa i kohoia no ka hoolohe ana i ua noi ia, imua o na Lunakanawai la ma ko Keena Hookolokolo o keia Aha ma Lihue, a ma ia manawa a me ia wahi no e hele mai ai na mea a pau i pili e hoike mai i ke kumu, in a he kumu oiaio ko lakou, e ae ole ia ai ua noi la. A o keia olelo kauoha e hoolahaia ma ka olelo Hawaii i ekolu ple ma ke KUOKOA, nupepa ma Honolulu.
Kakauia ma Lihue, ko Hawaii Pae Aina Feberuari 3, M.H. 1895.
Na ka Aha.
R.W.T. PURVIS.
2532-3 Kakauolelo.
-------------------------------
AHA HOOKOLOKOLO KAAPUNI APANA Ekolu o ko Hawaii Pae Aina. Ma ka Hooponopono Waiwai. Ma ka hana o ka waiwai o D.N. HELELOA (k) o Kau Hawaii i make kauoha ole.
Ma ka heluhelu a me ka waiho ia ana mai o ka palapala noi a Charles Meineche o Waiohinu Kau Hawaii e hoike ana o D.N. Heleloa, RJ o Waiomau Kau Hawaii ua make kauoha ole ma Waiomao Kau Hawaii ma ka la 3 o Feberuari A.D. 1894, me ka waiho iho he waiwai ma ko Hawaii Pae Aina i kupono ke hooponopono ia, a e noi ana e hoopuka la na palapala lunahooponopono waiwai la Charles Meinelehe.
Ke kauoha ia nei, o ka POAKOLU la 3 o APERILA, A.D. 1895, ma ka hora 10 1.m. oia ka manawa i koho ia no ka hoolohe ana i ua palapala nui ia ma ke Keena Hookoloolo o keia Aha ma Waiohinu Kau Hawaii, a ma ia manawa a ma ia wahi e hele mai ai na poe a pau i pili a e h@@@ mai i ke kumu e ae ole ia ai ua noi ia.
Kakauia ma Hilo, Ianuari 21, M.H. 1895.
Na ka Aha.
DANIELA PORTER.
2532-3t Kakauolelo.
-----------------------------------------
No ke Kuai Lilo
--------------
HE KAA HEHIHEHI WAWAE
ma ke Kulana Maikai.
Kumukuai $50.00
E ninau ia
W.E. BROWN,
Koena h@@@@@
2530-tf
-----------------------
PAPA! PAPA!!
AIA MA KAHI O
Lewers & Cooke
(LUI MA)
Ma ke kahua hema o Alanui Papa me Moi.
E LOAA NO NA
PAPA NOUIKI
O keia a me keia ano.
Na Pani Puka, na Puka Aniani,
na Olepelepe, na Pou, na O'a,
na Papa Hele, na Papu Ku,
me na Papa Moe he nui loa
NA PILI HALE O NA ANO A PAU
A me na
WAI HOOHINUHINU NANI
O na ano a pau loa.
----------
Na Balaki o na Ano he Nui Wa
Ke hai ia aku nei oukou e na makamaka a pau, ua makaukau keia mau makamaka o oukou e hoolawa aku ma na mea a pau e ili ma ma ka laua oihana no ka
Uku Haahaa Loa,
E like me ka mea e holo ana mawaena o Laua a me ka Mea Kuai.
Hele Mai e Wae no Oukou iho,
2396-q
-------------------
H E A H A !!
No ka Hanai ana i Kau Keiki?
He hiki no anei ia oe ke malama iaia no $1.10 no ka pule hookahi (5 keneta) o ka ai ana. Ma KAMEHAMEHA e loaa no i kau Keiki ka
AI ANA "i oi ae mamua o ko ka Home."
HOONAAUAO
"o ka maikai e like me ka ke dala e hoolako ai"
AO HANA--7 hana ano like ole
HIMENI--Mele a me Mea Kani
Na Mea no a pau
NO $1.10 i ka pule, $2.09 i ka Halekula Pokii o ka pule.
Ua emi iho ke hoouna mai oe i kau Keiki. Kakauia e
THEODORE RICHARD.
Kumuluna.
A.E. KNAPP.
Kumuluna o ka Halekula o na Pokii.
E Hoomaka ana i Feberuari 12, 1895. 2531-4
----------------------------------
E Haawi i na keiki Ai Waiu
A ME NA POE OMAIMAI
MELLIN'S
FOR INFANTS AND INVALIDS.
TRADE MARK.
FOOD
I ka Mea Ai.
Ha Ai Hooulu Oi Loa.
No ka hooulu Kamalii
Ka Hoopohaia mai ana
Ka Mai Ake Pau
Na Opu Ai wali ole.
a me na elemakule loaa i na Nawaliwali.
------------
---HE---
AI MAIKAI LOA
No na Pokii Hanai Lima ia
BENSON, SMITH & CO.
Na Aina wale no ko Hawaii Pae Aina.