Ka Nupepa Kuokoa, Volume LVII, Number 33, 15 August 1919 — NA ITAMU O KA MAKANI KUEKU LEPO O EWA. [ARTICLE]

NA ITAMU O KA MAKANI KUEKU LEPO O EWA.

I ka puuwai lokomaikai ahonui Mr. Solomon Hanohano, Aloha oe: - E kaana iho i keia mau wahi itamu ma ka kaua kukini holo mama ma na aekai na keiki kolu waapa o kou halepa'i e u-o a paa i ka hilo pawalu me ka weliua hoi i na lima paahana o kou keena. Ma ka Poaono nei i ike aku ai au i ka mokuahi Amerika e holo ae ana ma ke awa o Ewa nei, no ke kukulu ana i na apahuhao no ka hoailona ana i ke awa, kahi e holo ai na mokuluu ame na mokuahi, no ke ana ana i kahi hohonu awe kahi papa'u, a ma ke ahiahi no o ia la i make ai kekahi keiki oluna o ke kaa ukana o ke kaaahi o Wahiawa, hemo aole i paa ke pine ana, huli ke kaa ukana, lele hookahi keiki o ia o Hawe Pele Kaio, kona hoa o ia o Daniel Kaimi, oia ka i make loa; no Hawe, ua haki ka lima me ka uha, aia i ka Halema'i Moiwahine kahi i lapaauia ai. O Daniel Kaimi no Kalauao nei oia. I keia pule ae e ku mai ai na aumoku kaua Amerika me ko lakou mau mokuluu, wawahi kopiko, me ko lakou alakai ka moku nui adimarala, no ka ho-au ana i kahi e kapiliia ai ka moku; ua hanaia a ua holopono, ua waihoia aia ahiki mai ka mea nana e hoapono, i na wahi i hana ia ai, ua hoopiha ia i ke kai ka moku nunui, ua hiki ke komo iloko, a pani ke pani, hiki ke lana a holo, nui ka ike o na keiki a kanaka, o na keiki i hoonaauaoia. O ka'u hoi e i ae nei, eia ka wa kupono loa i na keiki Hawaii o kakou e hopu i keia mau kalena ike, a ke kakoo nei au i ka ka Nupepa Kuokoa e a'o mau nei ia kakou, e hookuonoono hoomakaulii, hoopono, akahai, huli nui i ka hana me ka molowa ole, e a'o i na oihana like ole, i loaa ke kuonoono me ka lako, a waiwai no hoi. Elike me wai? Me ka lahui Kepani, Pukiki, Pake, Kolea a okipau hoi o makou ma, na ili keokeo no lakou ke kahua. He poe waiwai no kakou, eia nae, he uhauha, piha lealea, nolaila e ao kanaka kakou e pono ai. Eia no na mokulele ke lele mau nei i na la apau, a'u e noho nei ma Ewa nei; aole no i loaa ia lakou he poino, a he malie ke kulana o ka aina i kaulana nona ka hooheno ana, mai walaau ae kaua o makani auanei; i piha ka momi me ka momona. He mau la koe alaila piha ia'u ka elua mahina ia Ewa nei, ua ano hoohihi maoli i ka nui o na mea e pono ai ke kino, ua pakua na pali Koolau i ka pehia ia e ka ehukai, ame ka makani kaulana o kuu aina he kipu, a e hala hou ana no paha he mau la hou aku koe e hoonuu ai i ka momona o Puuloa Kaihuopalaai, kahi o Kaahupahau, ke kae'ae'a o Ewa.

O ka lawa iho la keia o na wahi hunahuna mea hou o ka aina kuehu lepo he Moae, a ke kaohi nei au i ka'u kakau ana, a ke hoomaikai nei au i na Kahikolu e hoomau ia aku ko kakou koa wiwoole ka Lunahooponopono o ka Nupepa Kuokoa ame na keiki oniu ulu o kou halepa'i me ka mahalo nui. Owau iho no ke kiu imi mea hou, W. K. APUKEHAU. Kalauao, Ewa, Augate 6, 1919.