Ka Nupepa Kuokoa, Volume LXIV, Number 10, 5 March 1925 — PAA AE I KA HOPUIA E KA MAKAI TAVARES. [ARTICLE]

PAA AE I KA HOPUIA E KA MAKAI TAVARES.

Ma ke ahiahi o ka Poalima aku la i hala i paa ae ai he kanaka lawai'a o Marcallino Kalapeso ka inoa i ka hopuia e Joseph Tavares, ka mea hoopakele a malama hoi i ka maluhia o na i'a ame na manu, ma ke alawai oki o Waikiki, a hoopiiia ae no ia hewa, a ua hookuuia aku nae oia mahope o ka bela ana ae $100. Ma kekahi halawai ma kekahi wahi oloko iho o ke kaona o Tavares ma ka manawa o ka loaa ana ae o ke kahea iaia e holo aku no Waikiki no ka ikeia ana o kekahi kanaka me ka upena e lawai'a ana maloko o ke alawai, a maluna oia o kana kaa motokaikala o ka holo ana a loaa aku ke kanaka iaia e ku ana mahai o ke alawai mauka iki mai o ke alahaka o ke alanui Ala Moana, a ua hoea aku no hoi oia i ka manawa i aneane o Kalapeso e hoomoe i kana upena maloko aku o ke alawai. Aole i'a i loaa ia Kalapeso ia manawa. Ua hopuia oia a laweia ae i ka halewai a malaila i hoopaa ae ai i ka $100 bela a hookuuia ae.