Hawaii Holomua, 2 May 1891 — KE HOOIKAIKA LIKE NEI NO. [ARTICLE]

KE HOOIKAIKA LIKE NEI NO.

Ua lohe pono mai makou, mai kekahi lala Hawaii mai o ka Papa Ola, a he keonimana ia na makou i hilinai nui, eia no na hoa a pau o ka Papa ke hoao nei e like me ka hiki ia lakou ke hana no ka hooholomua ana'ku i na hana e pono ai ke ola o ka lehulehu. Ua liko no a like ka makee o na hoa ili-keokeo o ka Papa me ko na hoa Hawaii no ke ola o na kanaka Hawaii. Aole hoi he oiaio o na lono i laulaha ae nei he manao ino maoli ko na hoa haole o ka Papa Ola i na kanaka Hawaii. A wahi a nei hoa Hawaii oiaio a lala hoi o ka Papa i hoike mai ai ia makou: “Ma ko’u ike a me ka lohe aku i na olelo mai a ko'u mau hoa o ka Papa (oia na hoa ili-keokeo) ua like ko makou mau manao aloha a pau na hoa o ka Papa, no ka poe i loohia i ka ma’i lepera. A ke hoao like nei no makou a pau i ka noonoo ana i na mea e loaa'i ke ola, a i ole hoi ia, o ka oluolu a me ka maha o ia poe pilikia. A eia no makou ke hooikaika like nei.”