Hawaii Holomua, 2 May 1891 — KA MOKU KUNA PAHAOHAO. [ARTICLE]

KA MOKU KUNA PAHAOHAO.

— KA ILAMUKU WILS0N MA KONA MEHEU. Maloko o kekahi o na nupepa o Kapalakiko i loaa mai nei ia makou ma keia mokuahi Australia mai nei, i ike iho ai makou i keia itamu: "Mamua o ke ku ana aku o ka mokuahi Gaelic ma ke awa o Iokohama, ua holo mai la ka moku kuna heihei (yacht) Halcyon, no Victoria (Kolumebia) me ka opiuma i hiki aku ka waiwai io i ka $150,000. Ua manao na luna o ka Oihana Dute, ua makemake ka ona o ua wahi moku la, oia o Whaley, e hoopae i ka opiuma ma kekahi wahi o Amerika Huipuia, aka, e hoomakakiu ia aku ana ia e Luna Dute Phelps, a e hoounaia aku ana i elua mau mokuahi aupuni e kiai hele ai ma na kapakai. Ina e holopono ana ka Whaley hoopae ana i kana opiuma iloko o Amerika Huipuia nei, e nui ana ka waiwai loaa iaia, me ka nana ole ia ae o na poino i loohia ai kona moku no elua manawa ma ka ili ana ma kekahi wahi o lapana, a no ia mea i hoopaaia ai oia malalo o kekahi bona koikoi loa, aole oia e hoopae hou i ka opiuma maloko o lapana.” Ua manao wale ia oia no kela moku-kuna pahaohao i ikeia ai ma Lanai. O ke kumu i manaoia ai pela, ma ka Hotele Hawaii i noho iho nei kona ona no kekahi mau la mamua aku nei. Ma ka hora 10 o ka po Sabati i hala, ua haalele iho ka mokuahi C!audine i ke awa nei, me ka Ilamuku a me kekahi mau koa a he mau makai no ka imi ana i ua moku kuna la i ike mau ia mawaho o Lanai. Ua holo aku ka moku a hoopuni ia Lanai, a ua maalo ae ma na kapakai o Molokai, aole mea ike ia no kela kuna. Ua lele ka llamuku me kona mau ukali iuka o Lanai, a mahope o ka nana a hoomaopopo ana i kekahi mau mea e hiki ai ke hooholo ia ka manao no kekahi hana ma ko ke aupuni aoao, ua huli hoi mai la lakou, a ku i ke awa nei ma ke ahiahi Poakahi. Ua manaoia ua hoolele ia na ukana a pau o kela moku iuka o ka aina a oia ka apana hana a ka Ilamuku ma keia hope aku. He mea maopopo, he hana nui aku ana keia.