Hawaii Holomua, 2 May 1891 — ALOHA WALE. [ARTICLE]

ALOHA WALE.

Ua loaa ia makou ka ukana kaumaha e hoike aku, ua kaili kohana ia'ku la ke aho hope loa o kekahi o na makuahine hoopulapula o Hawaii, a ua hoi aku la ma o. Ua make o Mrs. Annie Dowsett, (ka wahine aloha a Kimo Pelekane) i ka aneane ana e kani ka hora 4 auwina la Poalua, Aperila 28, me ke kaa ma'i ole. Me ke kino ola maikai no oia i ke kakahiaka o ua la nei, a hiki i ka hora 2, ua loaa aku la iaia kekahi lono kaumaha mai na aina e mai e pili ana i kekahi o kana mau kaikamahine, a me he la, na ia mea i hookaumaha i kona noonoo a lilo loa i kumu e poino ai kona ola mamuli paha o ka poino o kekahi mea o loko o kona houpo. Ua waiho iho oia iloko o ka luuluu, he kane, he mau keiki lehulehu a me na moopuna he nui wale. A ka auwina la Sabati ae nei e hoolewa ia ai kona kino no kahi hoomaha hope loa. Aloha no.