Hawaii Holomua, Volume III, Number 2, 7 January 1892 — Page 4 Advertisements Column 1 [ADVERTISEMENT]

MA KE KAUOHA. HE KANAWAI E Hoololi ai i ke Kanawai i apono ia i Augate 17. M. H. 1892, i ka paia "He Kanawai e hoololi ai i ka Mokuna XXVIII, o na Kanawai o ke Kau o 1878, e pili ana i na Dute." E Hooholo ia e ka Moi a me ka Ahaolelo o ke Aupuni Hawaii: PAUKU 1. E kau ia a e ohi ia maluna o na kaa hehihehi wawae i hookomo ia mai iloko o keia Aupuni he umi pakeneta maluna o ka waiwai io, me ka nana ole ae i na mea maloko o ke Kanawai i olelo ia i apono ia ma ka la umikumamahiku o Augate, M H. 1892. PAUKU 2. E kau a e pili aku no na hoakaka ana o keia Kanawai i na waiwai a pau e paa ana ma ka bona ma ka manawa ona e hoomaka aku ai e hoohana ia. PAUKU 3. E hoomaka aku no ka mana ana o keia Kanawai mai a mahope iho o kona apono ia ana. Apono ia i keia la 19 o Dekemaba, M. H. 1892. LILIUOKALANI R Na ka Moi: G. N. WILCOX. Kuhina Kalaiaina. HE KANAWAl E Hooponopono ai no ka Lawelawe ana i ka Oihana Huki a Hana Niho iloko o ke Aupuni Hawaii. E Hooholo ia e ka Moi a me ka Ahaolelo o ke Aupuni Hawaii: PAUKU 1. Mai a mahope aku o ka hooholo ia ana o keia Kanawai aole e ku i ke kanawai ka lawelawe ana o kekahi mea a mau mea paha i ka oihana huki a hana niho iloko o ke Aupuni Hawaii, koe wale no me ka palapala hooia i hoopuka ia e kekahi Papa Ninaninau Oihana Kauka Niho. PAUKU 2. I ekolu lala o ka Papa Ninaninau Oihana Kauka Niho, oia hoi hookahi kauka lapaau a me elua kauka huki a hana niho i koho ia e ke Kuhina Kalaiaina, a e noho lakou ma ka oihana no ka manawa mua i hookahi, elua, a me ekolu makahiki a maia hope aku e noho lakou ma ka Oihana no ekolu makahiki. E lawelawe ka Papa i olelo ia i ka hana me ka uku ole. PAUKU 3. He hana na ka Papa Ninaninau Oihana Kauka Niho ka hoopuka ana aku i na palapala hooia no ka makaukau o kekahi mea a mau mea paha e lawelawe nei i ka oihana huki a hana niho i keia wa, a e waiho aku ana iloko o na la he kanaono mai ka la aku i hooholo ia ai o keia Kanawai i palapala noi imua o ka Papa i olelo ia malalo o ka hoohiki ana a me ka hoohikiki ia mai hoi e elua a oi aku paha mau kanaka inoa maikai e hoakaka ana ua lawelawe io no ka mea e noi ana i ka oihana huki a hana niho iloko o ke Aupuni Hawaii no elua a oi a e paha mau makahiki mamua aku o ka hooholo ia ana o keia Kanawai. PAUKU 4. He hana no na ka Papa i olelo ia ka hoopuka ana aku i na palapala hooia no ka makaukau i kekahi mea a mau mea paha e lawelawe nei i ka oihana huki a hana niho maloko o ke Aupuni Hawaii, i waiho aku he palapala noi i kakau ia, iloko o na la he kanaono mai ka la aku e hooholo ia ai keia Kanawai ke puka pono mai oia ma na ninaninau ia ana imua o ka Papa, maluna o na mea pili i na laau a me na lawelawe ana ma ka oihana huki a hana niho. PAUKU 5. He hana no na ka Papa i olelo ia ka hoopuka ana aku i na palapala hooia no ka makaukau i kekahi mea a mau mea paha e lawelawe ana i ka oihana huki a hana niho maloko nei o ke Aupuni Hawaii, ke waiho mai oia iloko o na la he kanaono mai ka wa aku e hooholo ia ai keia Kanawai, he palapala apono (diploma) mai kekahi Kulanui Ao Huki a Hana Niho i kaulana. PAUKU 6. Mai a mahope aku o kanaono la mahope iho o ka hooholo ia ana o keia Kanawai, e hoopuka aku no ka Papa i olelo ia i palapala hooia no ka makaukau i kekahi mea e hoike aku ana i kekahi palapala apono mai kekahi Kulanui Ao Huki a Hana Niho i kaulana, a i ole ia, e puka ana mai ka ninaninau kupono ia ana imua o ka papa e ku ai ka mahalo ia. PAUKU 7. O kekahi mea a mau mea paha e loaa ana he palapala hooia no ka makaukau mai ka Papa i olelo ia, e hoike ae lakou i na palapala hooia makaukau i olelo ia i ke Kuhina Kalaiaina, a nana e kope ia mea iloko o kekahi buke i malama ia no ia mea. PAUKU 8. O kekahi mea a mau mea paha e kue ana i na olelo o keia Kanawai, e hoopai ia no, ke ku ka hewa, e uku i na dala aole e emi malalo o Hookahi Haneri, a aole hoi e oi aku mamua o na dala he Elima Haneri. Aka nae, aole kekahi mea malalo o keia Kanawai e manao ia he mea ia e keakea ai i ka huki ia ana o na niho malalo o na haawina kui i ka pilikia. PAUKU 9. E mana keia Kanawai mai a mahope aku o kona la e apono ia ai. Apono ia i keia la 19 o Dekemaba, M. H. 1892. LILIUOKALANI R. Na ka Moi: G. N. WILCOX, Kuhina Kalaiaina. HE KANAWAI. E Hoololi ai i ka Pauku 16 o ke Kanawai i kapa ia “He Kanawai e hooponopono ai i ka Loaa ana mai, ka Malama ana, a me ka Hoolilo ana aku i na Dala o ke Aupuni a e hoomaopopo ai no ka Hooia ia i na Buke Helu o ke Aupuni,” i apono ia ma ka la 4 o Augate, M. H. 1882. E Hooholo ia e ka Moi a me ka Ahaolelo o ke Aupuni Hawaii: PAUKU 1. Ma keia ke hoololi ia nei ka Pauku 16 o ke Kanawai i kapa ia "He Kanawai e hooponopono ai i ka Loaa ana mai, ka Malama ana a me ka Hoolilo ana aku i na Dala o ke Aupuni, a e hoomaopopo ai no ka Hooia ia i na Buke Helu o ke Aupuni,” i apono ia ma ka la 4 o Augate M. H. 1882, ma ke kapae ana ae i na huaolelo “aole hoi e hoemi ia kela uku iloko o kona manawa e hoopaa ana i ka oihana,” a e heluhelu ia ka Pauku i olelo ia penei: "Pauku 16. Aole no e ae ia ka Luna Hooia e hapai a lawelawe paha i kekahi hana a oihana paha, oiai e paa ana i ka oihana Luna Hooia, a e uku ia oia i ka uku makahiki e like me ka mea a ka Ahaolelo e hookaawale ai.” PAUKU 2. E mana aku no keia Kanawai ma kona apono ia ana. Apono ia i keia la 22 o Dekemaba. M. H. 1892. LILIUOKALANI R. Na ka Moi: G. N. WILCOX, Kuhina Kalaiaina.