Hawaii Holomua, Volume III, Number 3, 14 January 1892 — MANAWAHUA. [ARTICLE]

MANAWAHUA.

I kekahi la i hala ae nei, ua kamailio aku makou no na mea e pili ana i na hana lokoino a kekahi makuahine Hawaii, nona hoi kekahi haawina dala i hooholo ia e ka Ahaolelo. Ano, ke makemake nei makou e hoike aku i kekahi o na hana hilahila a kekahi makuahine hapa-haole, i hoonaauao ia, a i hele mawaena o ka poe maikai, a i hele ma na aina e, me kana kane a ua make oia i keia manawa. He mau keiki lehulehu kana, aka, ua hookuu oia i kona kino e hele auwana, a e nanamaka i na hua i mohala mailoko ae o kona puhaka. Hookahi ana keiki aia iloko o ka Halemai, ua kokoke e pau ka ike o na maka, a me ia pilikia nui, aole loa keia makuahine i hele aku e ike a e haawi aku i ke aloha makua. O keia kekahi o na kumu poino o ko kakou lahui, a he mea pono e a’o ia ka poe a pau o keia ano. O ka ohana keiki i kauhale, na lakou no e malama ia lakou iho | —a he hana pono anei keia?