Ke Aloha Aina, Volume I, Number 1, 25 May 1895 — Ka Olowaa Auwai o Roma. [ARTICLE]

Ka Olowaa Auwai o Roma.

O na miliona kanaka e noho ana iloko o ke kulanakauhale o Roma i na la o ke au kahiko i hala wale aku la, aia no he mau olohe loea o ka noeau maloko o kona mau paia, a he mau pookoi hoi ma na hana hookumu noonoo a me na kilo aouli lani. O ka lakou hana akamai loa me ke kuhikuhi ole ia, oia no ko lakou imi ana a hoao i ka ikaika hoopii i ka wai e like me ke kiekie o ko lakou mau kumuwai, a ua ike ia ka holopono ma ia hana ana, a oia ka ke ao holookoa e aie nei i kela hana loea loa a ka lahui o Roma, he mea hiki loa i ka wai ke pii iluna o kekahi wahi kiekie e like me ke ana-kiekie o ke kaumaha o kona kumuwai e kau ai. He ewalu mau auwaha eli e lawe nei i ka wai no ka hoolawa ana i ke kulanakauhale o Roma mai ke kumuwai mai, nona ka ikaika hoohana mimilo i hiki aku i ke 40 miliona kapuai kupita wai i kela a me keia la. He elua mau mau auwaha wai no ka hoolawa ana i kekahi hapa o ke kulanakauhale e ku ana maluna o na puu i kapa ia o Kalaudia, nona ka loa he 47 mile ka loihi, a he 100 kapuai ke kiekie; maluna hoi o ke kahua aina o Maratia, he 37 mile ka loihi i kau ia maluna o na puoa he 7000, he 70 kapuai ke kiekie.