Ke Aloha Aina, Volume I, Number 1, 25 May 1895 — Ka Pono o na Kupa. [ARTICLE]

Ka Pono o na Kupa.

O keia Poaha ae (apopo no) oia ka la e noho ai ka Aha Kiekie no ka hoolohe ana i ke noi a ke Keiki Alii Kalanianaole ma ka Palapala Kuu Kino. I ka manawa i hoopii ia ai na poe Aloha Aina no kela hoeha kaua ana ma Leahi, o ke Keiki Alii pu kekahi i hoopii ia mawaena o kona mau hoa. O ke noi i waiho ia aku e Mr. Numana ma ka aoao o ke keiki Alii imua o ka Aha Hookolokolo Koa, oia keia: Aohe mana o keia Aha ma ke Kanawai e hoolohe ai i keia hihia. Ua hoo!e ka Aha Hookolokolo Koa i keia noi, a ua lawe ka mea hoopii ia i ka hoohalahala imua o ka Aha Kiekie e noho ai i ka la apopo. Ua ike makou i ka manao o ka Bihopa Enelanl Willis i hoolaha ia ma ko lakou Nupepa hoomana mamua aku nei, e hoole loa ana i ka mana o keia Aha Hookolokolo Koa malalo o ke Kumukanawai hou o ka Repubalika o Hawaii nei, e noho a hookolokolo i na poe i hoopii ia mamuli o kela uluaoa o lanuari 17 aku. He mea ano nui ka olele hooholo e puka mai ana ma keia koi ana a ke Keiki Alii e lilo auanei ia i kanawai maluna o na ano hihia e ulu mai ana ma keia mua aku. Ina i ae ia ke noi e ka Aha, alaila, e like ana ka pili ana o keia olelo hooholo i na poe a pau loa i hoopii ia ma ia ano hookahi. E kakali aku kakou i ka olelo hooholo a ka Aha.