Ke Aloha Aina, Volume I, Number 1, 25 May 1895 — Ka Mana o ka Mageneti. [ARTICLE]

Ka Mana o ka Mageneti.

Ina i hookokoke ia, kekahi kui hao, a kui kele paha i ka Hao Mageneti maoli, alaila, e ume mai ana oia ia mau mea e pili me ia; a ina hoi e anai ia ia mau mea maluna o ka Hao Mageneti; alaila, a lele mai no ka mana ume o ka mageneti iloko o laua, a lilo laua i mau mea e ume mai ana i kekahi @ kui hao e aku. Ina i waiho wale ia ua mau kui hao la no kekahi manawa loihi loa, alaila e mahia ae ana ka mana ume i loaa ia laua, a e like me ka loihi o ka manawa e waiho waleia @ me ka anai ole ia maluna o ka Hao Mageneti, pela no e haalele ia mai ai ka ikaika a me ka mana o ka ume ana iloko o laua, a mahope loa aku, e nele loa laua i ka mana ume Mageneti. Pela no na kanaka i piha i ke aloha no ko lakou Aina hanau ponoi. Ua hiki ia lakou ke hoolauna mai i na kanaka a me na keiki, a me na ohana o lakou; a ume mai ia lakou iloko o ka ume Mageneti o ke Aloha Aina. Ua hiki i na makua i piha i ke aloha i ka aina e anai aku i ka ume o ke aloha i ka aina iloko o ka lakou mau keiki, a lilo kela mau keiki i mau keiki kaulana no ko lakou aina makuahine. Ina i hanau ia ka hoonaauao maoli ana i na keiki maluna o ke aloha aina, alaila, e lilo auanei lakou he poe aloha aina oiaio ma keia mua aku. O ka anai mau ana i na naau palupalu o na opio Hawaii, maluna o ka makua i noho ia e ka mana o ke aloha aina, ua like loa ia me ka anai ana i ke Kuikele maluna o ka Hao Mageneti. Hookahi no mea e hoea mai ana, oia ka loaa ana o ka Mana Ume Mageneti iaia. Ina i hoopalalaha ia ke ao ana a me ke alakai ana i na keiki no ke aloha i ko lakou aina, alaila, e emi iho ana ko lakou aloha io maoli i ka aina hanau. A ina hoi ua hookuu haalele loa aku na makua i ka lakou mau keiki, e pio ana kela manao aloha aina i hoomaka @ e ulu iloko ona, a pela aku, a hiki i kona nele maoli ana i kona manao ana ae he Aloha koe no kona aina kulaiwi ponoi.