Ke Aloha Aina, Volume I, Number 1, 25 May 1895 — HE HAOHAO KO MAKOU. [ARTICLE]

HE HAOHAO KO MAKOU.

(Aole loa maluna o makou na koikoi o keia manao.) Ua ike iho au ma ka Awalakaika, i na hoakaka a C. J. Lyons e pili ana i ka uuku loa o na aina i lilo i na poe Misionari ma Hawaii nei, oia hoi, aole i lawa ae ka hookahi hapahaneri o na aina a pau loa i haawi ia no na kanaka ma Hawaii nei. Malia, ua oiaio paha ka hoike ana pela, aka, o ka makou e haohao nei, a ke hoopuka aku nei i ka ninau, penei: Pehea, a ma ke au hea la i hoolilo ia ai na aina a na alii o Hawaii i haawi mai ai i wahi kahua e kukulu ia ai na halepule hoomana no na poe Hawaii, a lilo ma ka inoa o ka Papa Amerika?

Ua olelo ae ka Awalakaika mamua aku nei, ua apono ka na hoa hanau o na ekalesia i ka haawi ana i ua mau aina la i na mikanele, a i ka Papa Amerika. Ma ka oiaio o na Lani, a me ko ka lahui Hawaii ike maka, aole loa e ninau i waiho ia i mua ona hoahanau o na ekalesia Hawaii, no ko lakou ae ana e hoolilo i na aina a na alii i haawi mai ai i kahua hale no kahi e hoomana ai o ka poe Hawaii. Nolaila, o ka ninau pololei ia C. J. Lyons, oia keia. Pehea, a nawai i hoolilo i ua mau kahua halepale la no ka mikanele, a i ole ia no ka Papa Amerika hoi? Ua noho makou a ua piha na makahiki he 50, ma kekahi o na ekalesia o Hawaii nei, aole nae he olelo a he manao i kuka ia e na kahu Misionari a me na hoahanau no ka hoolilo ana aku i kekahi o ia mau aina, no ke kahu misionari, a i ole ia, no ka Papa Amerika hoi. Ua ike makou i na kahua hale pule i hoolilo ia no ka Papa Amerika, aka, o ka ninau ia C. J. Lyons, nawai i haawi? Aole o'u manao hoino wale i na kumu mikanele i a'o mai ia makou i ka euanelio o ke ola, aka aole nae e hiki ia'u ke uumi a a huna wale i ka mea oiaio maoli, oiai au e ola nei. O ka oiaio o na mea a pau e hana ia ana, oia ko'u makemake, a oia ka'u mea e ake nui nei e ike pono ko'u lahui, aohe makemake i na olelo hoouhiuhi e huna ana i ka mea oiaio. Hoahanau o ka Ekalesia.