Ke Aloha Aina, Volume I, Number 2, 1 June 1895 — NO KEAHA LA I KIPAKU IA MAI AI? [ARTICLE]

NO KEAHA LA I KIPAKU IA MAI AI?

He nui na oleio a me na kamailio ana no ke kumu o ko Kuhina Kakina kipakuia ana mai ka noho ana aku ma ke alo Aupuni ma Wasinetona. Olelo kekahi poe, nana ia i hoi mai, mamuli o kona ano maamaalea, a he mea e hoopuhili ai paha i ka Aha Kuhina o Cleveland, a mahope hoi hou aku no oia i Wasinetona ma kekahi kulana e ae. Ma ko makou heluhelu maoli ana iho i ka olelo hoike a ke Kuhina Aina E Gresham, ua maopopo loa me ka hoohewahewa ole ia, ke kumu o kona hoopau ia mai, oia keia: O ko Kakina kupono ole ma ka oihana, mamuli o ka hoolako ana aku no ka hoolaha ana i na mea e pili ana i ka laua mea {me Gresham) i kamailio mua ai. Eia ka pane mihi a Kakina imua o Kuhina Gresham: "Eia wale no kaʻu makemake e kamailio aku ai ia oe, e Mr. Kakauolelo; oiai, ua ike maoli iho au, ua hewa au ma ke kupono ole i ka oihana, mamuli o ka haawi ana aku no ka hoolahaia, i na mea olelo ia ma ka kaua kamailio mua ana. Aole au i manao nui ia wa, aka, ano, ua ike au. Ke minamina

loa nei i kau mea i hana ai, a ke mihi aku nei no ia mea. O keia mau olelo ka Gresham i koi mai ai ia Kakina e kakau iho ma ka palapala, aka, hoole iho la o Kakina, a ma- ' hope mai, hoi loa mai no Hawaii nei. " Ke Kaua wahine ma Bolabola " (Lawe ia noloko mai o ka Nupepa "Ka Nonationa," lulai 8, 1844, o Lumaikaika ka mea hoopuka.) Ua lohe iho nei makou i kekahi hana a na wahine ma Bolabola. Eia ua hana ala. "I kekahi kaua o na kanaka maoli a me ko Farani poe koa malaila, hele pu aku la he mau wahine eha, e kokua i na kane a lakou ma ke kaua, a hele me ka pu, a me ka pauda, a me ka poka, a ua hana ikaika lakou, a ua nui na haole i make ia llakou. Makau ole no hoi, ea? "I ka ninau ana o kekahi mea ia lakou, no ko lakou hele ana i ke kaua, i mai la lakou penei: "No ko makou aloha i ke 'lii a me ka aina hanau," nolaila, hele ai makou i ke kaua." "Aloha lakou! Aloha ko laila poe pilikia i ko lakou poino nui; ua hana pono ole loa ka Adimarala Farani, nui ka make malaila, a me ka pilikia pu. "Aka, ua lohe iho nei makou, ua hoole ke alii nui o Farani i ka hana ana a ua Adimarala la. Olioli loa paha lakou, ke lohe ia mea, ua ola lakou mai ka make mai, e olioli pu kakou i ka lokomaikai o ke Akua ia lakou a me makou nei hoi, a e pule mau Iaia e malalma i keia mau Aupuni liilii.