Ke Aloha Aina, Volume I, Number 2, 1 June 1895 — KEKAHI HEMAHEMA [ARTICLE]

KEKAHI HEMAHEMA

O kekahi hemahema nui o kekahi poe o ka lahui Hawaii, oia no ka makemake ole e kokua aku i ka hana a kekahi hoa kanaka o kona lahui ponoi iho, a i ole, Hui paha o ka lahui ponoi. O keia ka makou mea minamina nui, a ke iini nei, e hoomaka ka lahui e noonoo a hoopau loa ia ano manao, a e hoopiha i ka naau me ka uhane piha i ke aloha, ka makemake, ka hauoli a me ke ake e kokua i kona hoa kanaka o kona lahui ponoi. O keia kekahi mea e pono ai na Hawaii, ma ka hana, a ma na kukulu hana kalepa ana, a maloko hoi o na kulana oihana aupuni iloko o keia lahui. E nana kakou i na lahui o na aina e mai, ua like ke kokua ana, ka hapai ana, a me ka hoohoihoi ana o lakou i ka hana a kekahi o lakou e kukulu ai. Ina kukulu kekahi i halekuai mea ai, kuai lole, kuai kamaa, kuai wati, kuai lako hale a pela aku; alaila, e haiamu ana na hoa lahui maloko oia mau hale i kukuluia e kekahi o ko lakou lahui like. Pela ka ike aku i na Pake, na Iapana, na Pukiki, a me na haole hoi. Ke hapai nei, ke huki like nei, ke kokua nei kela a me keia i ka hana a ke kanaka o kona lahui ponoi iho. Aole ae nei pela? Nolaila, olelo aku kakou he waiwai kela Pake, kela Iapana, keia Pukiki a me keia haole. A no ke aha la i waiwai ai, a i loaa ai he holomua ma kana hana? No ka mea, ua ala like mai na hoa kanaka ponoi o kona lahui a kokua iaia ma kana hana i hapai ai. O ka rula a lakou i lawe mau ai, oia keia: E kokua au i ka hana a koʻu hoa kanaka e kukulu nei. Ina e pii kekahi haole maloko o kekahi kulana oihana iwaena o lakou iho, alaila, e lalau mai ana kona lima a huki aku i kona hoa, ma ke kulana ana i haalele iho ai. Ina i hookuuia a i ole hoomaha paha kekahi o lakou no ka hele, a no ka hoomaha ana paha, alaila e waiho koke aku ana oia i kekahi inoa e pani ai no ia wahi, mai kekahi mai o kona poe hoaloha o kona lahui hookahi. Oia ka mea maa ia lakou, a ua maikai ia. O keia ano ka makou e olelo nei, oia kekahi hemahema i koe o kekahi poe o ka lahui Hawaii. Ina i pii kekahi kanaka Hawii ma kekahi kulana oihana kiekie loa, alaila, ua hukiku aku la kona ike ana i ka lani aole e nana wale ia iho ka poe o kona lahui ponoi e noho ana maluna o ka honua. Pau ae la ka ike ana mai i na hoa o ka wa ilihune, aia a he poe hanohano o ke kulana kiekie, oia na hoa olelo, na hoa kuka, ilaila aku la e kipa ai, pau iho la ka ike ana mai ia kakou. Nui ka hanohano nui pu me ka hookiekie a me ka hookano, a hookae iho la ia kakou, no ka mea he ilihune oe, a heaha hoi kou ano. O keia kekahi o na hemahema i koe o ka lahui Hawaii. Eia hoi kekahi; ina hoi e hoopii ia ae kekahi kanaka ma kekahi kulana, a i ole, e hapai ana paha oia i kekahi

hana lawelawe alaila, o ka hoomaka no ia o kekahi poe e eli malalo ae o ua kanaka la, i mea e haule mai oia, a hookahi ka nele like ana. O keia kekahi hemahema ino loa a makou e ao aku nei, he mea pono e hoopau loa ia ia mea mai ia kakou aku. O na manao lele, kuaki paha, kekeue, paonioni a huahua paha, he mea pono e kapae loa ia ia mau mea mai ia kakou aku. O ke aloha, ka lokahi, ke aho nui a me ke kokua o kekahi i kekahi, oia wale no ka mea e loaa like ai ia kakou o ka noho like ana i na hana imi pono o ko kakou aina. Aole anei pela? O ko makou manao pela no.