Ke Aloha Aina, Volume I, Number 3, 8 June 1895 — He Walohia Nui. Make o Kuhina W. O. Gresham. [ARTICLE]

He Walohia Nui.

Make o Kuhina W. Q. Gresham.

Ma ke ku ana mai o ka mokukaua Amerika Bennington i ka Poakolu nei mai Kapalakiko mai, ua loaa pu mai la ka lono kaumaha no ka make ana o ke Kakauolelo W. Q. Gresham o ke keena o ko na Aina E o ke aupunl o Amerika Huipuia ma ka la 28 aku nei o Mei aku nei, mamuli o na ulia a ke omaimai i kau iho maluna ona i na la mamua aku nei. He kanaka naauao oia, a ua noho oia ma kekahi o na Lunakanawai iloko o ka Aha Hookolokolo Kiekie o Amerika Huipuia kmamua, a i keia wa i noho Peresidena ae nei o Cleveland no Amerika, ua koho oia ia Mr. Gresham i Kuhina Nui nona a ma ia kulana oia i noho ai a hiki i kona make ana aku la. Ua nui kona mahaloia e ka poe hoopono, a ua hoinoia hoi e ka poe hana kolohe. No makou iho, a ma ka aoao o ka Lahui Hawaii, a me na lala a pau loa o ka Hui Aloha Aina o ko Hawaii Paeaina, ke haawi aku nei makou i ke aloha paumako no ke kanaka Amerika i ake mau e hooko i ka pono a me ka pololei no ke noi a ka lahui Hawaii a me ko lakou Moiwahine Liliuokalani e pili ana no Hawaii nei. A ke komo pu aku nei hoi iloko o na kumakena a me na hoomanao walohia ana me kona ohana ponoi a me ka lahui Amerika e kanikau ana nona.