Ke Aloha Aina, Volume I, Number 3, 8 June 1895 — HE HAAWINA HOOHOIHOI. [ARTICLE]

HE HAAWINA HOOHOIHOI.

Ua hoikeia mai nei ma na moku i ku mai nei, ua hoouna aku ka Papa Kalepa o Ladana he palapala noi i ka Hale Ahaolelo, e ae ia e hookaawale ae i $375,000 uku hoohoihoi, no ka lawe ana i na leta mai ka Atelanita a e huipu ana me Canada a i Australia, a e olelo ana hoi kekahi, he $500,000 ka nui i manaoia e lawa ai no ia hana. O keia hoomakaukau nui ana o na hana hooholo mokumahu lawe leta, a me ke kukulu ana i ka uwea moe moana maluna o na aina i onaia e Beritania, he hoike ia no ko Enelani holomua me kona mau Panalaau ma na oihana pookela o ke ao nei. Piha pono keia mau la o kakou, i na keonimana mai na kuaaina mai. Aneane paa pono loa na kaupoku o ka luakini o Kawaiahao i kakia pili ia. Ua wehe ae nei o Edmund P. Dole, he keena loio nona ma ke alanui Papu, helu 318. Ua hoikeia mai nei ka lohe no ko Kuhina Gresham make ana. Oia no ke kuhina o ko na Aina E, o Amerika Huipuia. Ua lohe ia mai nei i keia la, ua paa i ka hopu ia o Manuela, kela kanaka maʻi lepera e noho nei malalo o na kuahiwi o Ewa. Nui wale na hale hoolimalima e hoolaha ia nei ma na nupepa namu, no ka poe e makemake ana i home noho, ma ka ninau ana aku ia Charles Hustace. I keia pule ae e wehe ia ai ke kau ahaolelo o ke aupuni Repubalika, a e pau mai ana na lunamakaainana i koho ia o na kuaaina i ka holo mai ianei.