Ke Aloha Aina, Volume I, Number 4, 15 June 1895 — Ka Ahahui Euanelio o Hawaii nei. [ARTICLE]

Ka Ahahui Euanelio o Hawaii nei.

Ua ike iho makou i ka manao ake nui o ia ahahui e komo kino maoli aku iloko o na hana hooko civila pili aupuni maoli, e pili ana i na poe i loaa ana i na ulia poino maoli o ka ma'i lepera ma Kalaupapa, Molokai, e koi ana i kanawai kaokoa no ke oki ana i na poe i mare ia, a e ae ana hoi e hoopau i ka noho mare ana. Heaha keia hana a ka Ahahui Euanelio o Hawaii? Heaha ko lakou kuleana e koi nei e hoole i ka olelo a ke Akua, a me ke alo ana a Karisto? O ka pono i na poe kahunapule e lawelawe ana i ka oihana laa a ke Akua i kauoha mai ai, e hoolohe, a e hooko i ka ke Akua kauoha, aole i ka ke kanaka. E mare aku oukou i na poe i e ia e mare, a e hooko oukou ia ka oukou oleloao i na mea i mare ia imua o ke Akua a me na anela.

O ka lawe ana o ke kahunapule i ka olelo hoohiki iua o ke Akua, e a'o ana i namea i mare ia e noho pu me ke aloha pilipaa o kekahi i kekahi a hiki i ka make ana, he hiki anei i ua kahunapule la ke pelukua iho, a olelo ae e hooholo ia i kanawai e ae ana e hookaawale ia laua no ka ma'i lepera, oiai no laua e ola ana? Lalau ke alakai ana a ka Ahahui Euanelio. E waiho aku ke kahunapule i ka hana oki mare a hookaawale berita mare, na ke aupuni, a na ka poe lolo. Mai hoohuikau na poe kahunapule, ia lakou ma ia mau hana elua. E waiho na ka poe kaukanawai e hana i na kanawai, aka, mai hoao na kahunapule e wawahi i na pouhana o ka Karisto kauoha hemolele, a me ka honua o ka ke Akua hana kahiko i hookomo ai iloko o ke kanaka.