Ke Aloha Aina, Volume I, Number 11, 3 August 1895 — E HOOLANA I KA MANAO [ARTICLE]

E HOOLANA I KA MANAO

O ko makou kuleana keia o ka hoopiha aku i ko makou lahui me na manao hoolana no na pono o Hawaii. He mea maopopo loa, eia ko ke Akua lima ke haha mai nei maluna o Hawai nei iloko o keia mau la, a e hoike mai auanei Oia i Kona mana maluna o ka poe hoole i Kona mana. E hoolilo auanei ke Akua i na lako, a me na waiwai a pau loa a lakou i hao wale mai ai, mai ia hai mai, a kaili hou aku, a haawi aku i ka lima o ka poe a lakou i ike ole ai. E mau loa ana ko ke Akua ola ana, aka, e pau wale no ka poe pakaha i ka make me ko lakou waiwai. E hoonani kakou ia lehova, a e hauoli hoi iloko o ka hune, ka nele, a me ka nawaliwali, no ka mea, Oia ko kakou puuhonua, a me ko kakou palekana.