Ke Aloha Aina, Volume II, Number 46, 14 November 1896 — MAI PULALELALE I KA IKE A KA MAKA. [ARTICLE]

MAI PULALELALE I KA IKE A KA MAKA.

Ae, he wahi olelo kau kanawai keia i lilo i mea mana, a i mea kaohi hoi i ka ono o ka puu, a me ka makahehi a na onohi maka. He olelo keia ua kuluma mai kahiko mai, i ka wa hoi o ko kakou mau kupuna, a hiki loa mai ia kakou i keia wa, he kakaikahi loa paha ka poe i hiki ole ke hoomaopopo i ke ano o keia olelo, oiai, aole ia he olelo malihini e hiki ai ke hoohewahewa ia kona ano io maoli. Ua pih paha keia olelo i ka poe pii ma na kuahiwi, a ike i ka pua o ka lehua, i ka pala o ka ohelo papa, a kupu ae ka manao e hele e ako, a e hoao hoi i ka ono o ka ohelo papa e like paha me na uka waokele o Puna, e pili la me Kaluaopele, a ke i mai nei hoi keia olelo, mai pulale i ka ike a ka maka, o aha ia hoi, wahi a makou? O poipu ia e ka ohu, a naku hele oe iloko o ka nahele a halawai oe, a o oukou paha me na pilikia he nui. Pela makou e kauleo aku nei i ko makou lahui aloha, ka lahui a makou i hilinai nui ai, aia ko lakou mau maka ke haka pono mai nei, o ko makou hoike aku i na mea e pili ana i ko kakou aina, ka mea hoi a kekahi poe e hapahapai mai nei, e hoao ae kakou e noi aku la lakou nei e koho balota

akea kakou, ma ka hoouna ana mai ia lakou nei i na palapala hoopii, i akaka ai ke aupuni kupono e hiki ai ke hoomalu ia me ka holopono. E manao ana anei ka lahui, he hana hiki ia ke apono ia mai, ina o ko lakou nei make ia a kakou e hoao aku ai e hana, e waiwai ana anei ia mau palapala hoopii a kakou e hoouna aku ai ia lakou nei e nana ia mai ko kakou pono? O ka makou malaila, aole loa lakou nei e ae mai ana ia mea. No ke aha ke kumu o ko kakou nele ilaila? Eia: O ko kakou hoao ana e hoonioni i ko lakou nei kahua i kukulu ia ai maluna o ka ikaika, ua like ia me ka puka ki e puka ana malalo, me ka ike ole ia, he wahi ia no ka pilikia, a ina e ike ana lakou nei he pilikia keia, manao anei kakou e hookuu laelae mal ana lakou nei e hana pela, elike me na hauwawa olelo o keia mau la, e hele nei imua? Aole loa lakou nei e ae ia mea; a o ka hua oia mau hana a kakou e hoao aku ai he nele ma na ano a pau. Oia ka KE ALOHA AINA e hoike aku nei me ka wiwo ole, a elike hoi me kona ano mai kinohi mai, i hookumu ia ai no ka pomaikai o ka lehulehu, a he nupepa na ka lahui Hawaii, ua ku oia e paio no ka pono o kona aina, ka lahui a me kona moi i hoopilikia wale ia, a o ke ao ana mai a kekahi poe i wahi e komo ai kakou iloko o ka poino, oia ka makou e kue nei. Mai hoolohe i ke ao lalau a kekahi poe, me ko kakou ike no, he hana hope ole ia, a eia no hoi makou ke ku mau nei ma ke ano he wahaolelo no ka pono a me ka pomaikai o ko kakou lahui. O ka makou keia e hoike e aku nei i ola honua, no ko makou ike maoli no, he hana poho a makehewa wale no ia, ua oi aku no ko kakou pono e noho malie pela, a na ka lokomalkai o ka Mea Mana Loa e hoohiolo i ka ikaika o ka poe pakaha a alunu.