Ke Aloha Aina, Volume II, Number 47, 21 November 1896 — Na Palapala [ARTICLE]

Na Palapala

Aole e ili maluna o makou ke koikoi o na ahewa ana no keia mau manao i hoopukaia malalo o keia poo, aka, e ili no ia maluna o na poe na lakou i kakau mai.

OWAI KA MEA KUPONO?

(Hoomauia.) O Keo Kaaka oia no ka pili o Joseph Nawahi i kekahi Kau Ahaolelo a laua i komo pu ai. Malia paha, ma kekahi mau hoike manao o laua iloko o ka Hale, aole paha laua i like loa ma na mea a pau, aka, iloko oia manawa ke kau pu ala maluna o laua keia kulana hookahi. Oia hoi ka inoa i ala ia e ka lehulehu. Ua hala o Joseph Nawahi, a ua koe no o Joe. O. Carter me kona inoa maikai, mai ia manawa mai, a hiki mai no i keia manawa, o ka manao ikaika ana o na aoao kalaiaina, he inoa aala a maikai o J. O. Carter i ka aoao hoohui aina, a pela no hoi, he inoa aala a maikai oia ia kakou na "Aloha Aina." O Jeo. Carter, he kanaka kaokoa nona iho, mamuli o keia mahae ana o na aoao kalaiaina, ma o ka hookahuli aupuni Moi, ua koho koke oia i kona aoao kalaiaina, a oia no ke aloha aina, a o kona aoao no ia a hiki mai i keia la. Aole i hiki i kekahi ke alakai i kona manao kaokoa. Mamuli o ke kaokoa ana e kona manao kalaiaina, mai ka poai mai o na auna huli waiwai mai o lakou, nolaila, ua hookaawale mai la em iaia mai ia lakou mai, aole hoi e hiki i ka puu nui o na waiwai o ke ao nei, ke aua aku iaia me ka pohai o ka poe hookahuli aupuni. Nolaila, he aloha aina kaokoa oia, mailuna a lalo, a mai waho a loko. O Jeo O. Carter, he kanaka naauao, a haahaa oia, a ua kupono e lilo i alakai no ka lehulehu. O Jeo. O. Carter he kanaka manao oia i ka pono ohai. Ua akaka ia ia kakou ma o kona haalele ana i kona pomaikai, a koho e huipu me kakou ma ke aloha i ka aina, a e noho pu iloko o ka ilihune o keia mau la, a paa malaila a hiki i keia manawa. O Jeo. O. Carter, he kanaka ia i pili kona aloha i ka aina, ka lahui a me ka Moi, no ka mea, he iwi ia a me ka io nou e Hawaii Imi Loa. O Jeo. O Carter, he hoopono, a he makau i ke Akua. Hai mai kekahi makamaka ia'u. I kekahi la Sabati, e haiolelo ana ko lakou kahunapule mailuna mai o ka awai, a ua oili kekahi mau manao alakai, no na mea oili kalaiaina. I ka pau ana o ka pule, ua hele koke aku o Jeo. O. Carter, a pane aku i ke kahunapule. Ina i manao oe e noho makou (poe aloha aina), ma keia mau noho, e pono no ia oe e hai mai i na mea pili i ka ke Akua olelo, aole i na mea pili kalaiaina." Aohe ona makemake e hoehaia mai oia e na mea pili kalaina, aka, o kana i makemake ai e hanai ia mai oia i ka ai no kona uhane. Aole oia i haalele i ka hale o ke Akua a hele hoohuakeeo aku, e like me ka hana a kekahi poe aloha aina, aka, mamuli o kona manao hoopono a makau i ke Akua, ua kue aku oia i na mea i kue maoli aku i ka pono io maoli, ua apo a hoolehe aku oia i na mea pili i ka oiaio a me ka pono, ke kumu o ke aloha aina oiaio. I hookahi a'u mea e hoakaka iki aku ai, oia keia: O ka ili o ka mea a'u e hoakaka nei, he oiaio paha he keokeo kona ili, aka, e na makamaka, aohe mawaho ka'u e nana aku nei, aia no maloko, a ma ka hua i puka iwaho, ua

ikeia ko lakou, mai nana ma ka helehelena owaho, aka, ma ke kulana o ka manao o loko i ikeia mawaho. Eia ka Paulo ma Oihana 17:26: "A nana no i hana i na lahuikanaka a pau i ke koko hookahi, i noho lakou ma ka honua nei." Pela no o Jeo. O. Carter, he koko kona o ke aloha io i keia aina, ka lahui a me ka Moi. Owau iho no, he aloha aina oiaio. ALOHA AINA.