Ke Aloha Aina, Volume III, Number 36, 4 September 1897 — HE HUAKAI HOOMAHA. [ARTICLE]

HE HUAKAI HOOMAHA.

Ua lono lauahea wale mai makou, mamuli o ka onawaliwali o ka Peresidena Nui o na wahine aloha aina a puni ka Paeaina, Mrs. Kuaihelani Campbell, nolaila, e holo hoomaha a hooluolu aku ana oia i ka aina Ua Lulehua o Hilo Hanakahi, no ka hanu ana i na ea huihui maikai oia wahi. Ma keia Kinau ae e haalele iho ana i ka la10 ae nei a me he mea la, e ukali ia ana kana huakai hele e ke kupa a kamaaina hoi oia aina kaulana ka wahinekanemake, Mrs. Nawahi, a e hala ana paha ia laua he mau pule e lualai aku ai malaila, no ka hooluolu ola kino ana, a e hala loa ana paha auanei e ike i ka home kaulana o ka wahine hookalakupua o ka lua Madame Pele. Nolaila, e na wahine aloha aina o Kauakanilehua eia mai he malihini nui a kiekie na oukou ke kipa aku la e ike kumaka i ka nani o ka aina a ke ala me ke onaona i noho ai a o ka mua loa paha keia o kona hehi ana aku i ke one laula o Hanakahi, a lei aku hoi i na lehua o Mokaulele me na hala onaona o Upeloa, na maile kupaona i ke ala o Panaewa. O ka makou e kalokalo ae nei e ukali ia ka olua huakai hele e ka oluolu, a e huli hoi mai me na ola kino maikai.