Ke Aloha Aina, Volume III, Number 37, 11 September 1897 — HE MAU ILIO HANU MEHEU. [ARTICLE]

HE MAU ILIO HANU MEHEU.

Eia me Luna Paahao Low o Kawa, he eono ilio hanu meheu no ka hanu ana i ka meheu o na poe paahao mahuka. E haawi ana oia he hoikeike ana imua o ka Ilamuku a me kekahi poe kakaikahi i konoia, no ka hahai ana mahope o na holoholona. E hookuu ia ana he kanaka no ka holo e ana mamua ma ke alahele e hoea aku ai i Waianae ma ke kakahiaka, a i ka auina la e hookuu ia ai na ilio no ka hanu ana aku mahope o kona meheu, a ua manao o Low, aole e napoo ka la a loaa no ka mea mahuka. E hookuu mua ia ana lakou e hanuhanu i kahi a na kapuai wawae o ka mea mahuka i hehi ai, alaila lakou hookuu ia mai ko lakou mau kaula hao ae. Ma kekahi la o kela pule aku nei i hala, ua hookuu ia kekahi kanaka ma ke ano e holo mahuka ana, malalo ae nei o Puuloa, no hookahi hora kona kaawale ana, ua hookuu ia iho na ilio, a iloko wale no o 15 minute, ua loaa aku la oia i na ilio.