Ke Aloha Aina, Volume VI, Number 1, 6 January 1900 — UA HALA AKU LA. [ARTICLE]

UA HALA AKU LA.

O ka makahiki 1899, ua pauaho mai la oia iloko o na lea kuwo o na oeoe mokuahi a me na hale hana, na leo kumakena o na bele o na halepule, na mea hoopahupahu e kani kupinai ana a me na ahikaolele e lele ana i ka lewa, me ka hoohialaai nui ia, a aia hoi kela a me keia mea mai na ohana a na poe e ae e ku kiai ana me ka makaala no ke kupono ae o ka manamana kuhikuhi hola i ka 12, a pela hoi me ka manamana kuhikuhi minute. I ka wa i poha ae ai na leo wawalo o na oeoe me ka walohia, aia kekahi mau ohana e haawi ana i ka lakou mau leo pule nonoi i ka nohoalii o ka Mea Mana Loa, e lawe pu aku i na maewaewa oia makahiki ma kona alahele, me ka haawi ana mai hoi i na mea e noohauoli ai o ka manao ma keia makahiki hou, e like hoi me na poino i ike ia iloko o keia lahuikanaka ia makahiki a kakou e poina ole ai, ka manawa a me ka makahiki mua loa e hiki ole ai i ka kakou mau hanauna ma keia hope aku ke hoopoina ia, oiai, he weliweli kona ano ke kaana pono ia iho. He oiaio, o na ohana i hoomakaukau no ka haawi ana i ka lakou mau mohai mamua ae o ke aili a mauliawa ana mai o na makahiki kupanaha la, ua kono aku la lakou i na hoaloha e komo pu mai ma ka hauoli ana ma na mea i hoomakaukau ia e ko lakou lokomaikai, a ua ai a ua inu hoi na mea a pau i kono ia i ka lokomaikai o ko lakou mau hoaloha me ka hauoli. Ua hala a ua kunewa loa aku la ka 1899, a aole loa oia e kipa hou mai ana i o kakou nei, aka, o na hana nae iloko o kona au, oia ka kakou e hoomanao aku ai ma keia mua aku, me ko kakou makemake ole e ike ia mau mea iloko o keia makahiki ano nui o ka nee ana o ka manawa, ka manawa hoi i hoopiha pono ia kona keneturia 20, ka mea hoi i loaa na hoopomaikai ia a pau iloko o na ohana i hapupu ole e loaa ana ia lakou keia makahiki hou. O na hiohiona mua o keia makahiki, i kona wa i oili mai ai,

aole no ia i hoomamao loa aku i na ehahea o kela makahiki i hala aku la, oiai, aole i nalo aku na hana a me na ehaeha o kela makahiki, eia no ia ke ho@@@ mai nei, a ke hoikeike mai nei no i kona mau maewaewa me ka haawi ana mai i na haawina weliweli maluna o na mea a pau, me ka lana pu no hoi o ka manao, hala no la hoi ia makahiki, hala pu no hoi me kana mau hana ino, aka, aole nae pela, oiai, eia no ke ike ia aku nei na ouli ino o na la i hala, e hoalii ana maluna o na mea a pau. O ka hoea ana mai o ka la makahiki hou, ua malamaia ia me ka palanehe nui e na poe i hoomakaukau ia lakou iho no ka paina pu ana me na makamaka, a oiai, ia makou i kap aku ai ma na home like ole o ko makou mau hoaloha, ua malam ia ka maluhia o ka la, a ua ai ia na mea a pau i hoolako ia me ka pakiko ana ma ka mea hiki, a ke haawi ae nei ka makou makapeni i ka mahalo i na poe a pau i laulima iho iloko o ke akahele me ka hoolilo ole i ko lakou manawa maikai a oluolu i mea hoopau manawa ma ka uhauha wale ana ma na mea ano ole, ke hooia mai nei kei mau hana a kakou a pau i hana ai, i ko kakou hoolawa ana ma na mea pakiko e pono ai ka noho ana, a no ka wa hope loa, ke haawi aku nei makou i ke aloha oiaio no keia makahiki, a e lana hoi ko kakou manao, he makahiki paha keia e halihali mai ana i na pomaikai maluna o kakou a pau.