Ke Aloha Aina, Volume VI, Number 2, 13 January 1900 — HE LETA MAI AMERIKA MAI ME NA MANAO ANO NUI. Na ko Makou Hoaloha R W Wilikoki. Ma ka Hua Ikea ai ke Ano o ka Laau-Ma ka Hana Hoi e Ikeia ai ka Waiwai o ke Kanaka.—E ka Lahui e Heluhelu Akahele i Keia. [ARTICLE]

HE LETA MAI AMERIKA MAI ME NA MANAO ANO NUI.

Na ko Makou Hoaloha R W Wilikoki

Ma ka Hua e Ikea ai ke Ano o ka Laau —Ma ka Hana Hoi e Ikeia ai ka Waiwai o ke Kanaka. —E ka Lahui e Heluhelu Akahele i Keia.

WASINETONA, D.C., IANUARI 1, 1900. E KE ALOHA AINA, ALOHA HAPE NUIA OE:— Me ka awiwi au e kakau aku nei i keia la. I keia ahiahi, Poaono nei no ko maua hoea ana mai nei. Ua hui aku nei au me ka Moiwahine Liliuokalani i keia kakahiaha. Pumehana ko makou hui ana. E hoike aku i ka Lahui i keia:— 1. Aole no kakou i hui malalo o ka Olelo Hooholo a Newland ke ole e lilo i kanawai, ka bila kanawai a Hitt a me Cullom ma e hooikaika nei. 2. E hooikaika ana maua e hoopanee loa i keia bila, a ua nui ka lana o ko'u manao e make ana no keia bila i keia kau. 3. Ke haule keia bila, alaila, ua maopopo loa, e haule loa ana ka hoohuiaina, a e loaa hou ana ia Hawaii ke Kuokoa. 4. Mahope iho o keia e kauoha ia ana ka Lahui, e koho i ka lakou Aupuni i makemake ai, nolaila, @ aupuni Moi ke ko ana. Nolaila, e kupaa mau ka Lahui, a e kakoo pu mai ia maua, oiai, maua e hooikaika ana. E hoomau aku ana au i ka hai mau i na mea e pili ana ia kakou. Mahope au e hoakaka pono aku ai. E ko ana na mea a pau no Hawaii i keia 1900. Me ke aloha nui ia oukou a me ka Lahui, R.W. WILIKOKI Aole KE ALOHA AINA iloko o ka makani puahiohio. Aka, Aia no oia iloko o ke aheahe malie e naue nei. E ka Lahui e huai pau aku ana makou i na ai a ka ui imua o oukou i na mea ano nui a pau e loaa mai ana no kakou.