Ka Hoku o ka Pakipika, Volume I, Number 9, 21 November 1861 — Ka make ana o Mrs. Louise Kukuilau. [ARTICLE]

Ka make ana o Mrs. Louise Kukuilau.

Ua make iho nei o Louise Kukuilau ma ka hora 11 o ka po oka la 9 o Novemaba nei, oia ka wahine mare mua a Kalema haole e noho la ma Wailua, Kauai, i oki iho nei. Ua hoomaka kona mai ana ma ka malama o Iulai mai, he anu, wela, kunu, nalulu, a ua mau no ia mai ana a hiki i kona la i make ai. He keiki kana e ola an ama Kauai i keia la a he mau kaikaina a kaikunane hoi e ola ana i keia wa. Kokoke kanakolu kona mau makahiki i keia wa mai kona hanau ana. Nui ke aloha o kona mau makamaka ia ia, a ua hele nui mai e uwe pu me kona mau kaikaina; a he nui hoi ke aloha o kona kaikaina ia ia, a ua kau iho i waih leo mele kanikau no ko laua noho ana ia Oahu, Kauai, a ia Hawaii hoi, ko laua onehanau. Auwe kuu kaikunane mai ka aina hanau, Mai ka la maka hooponiuniu ai ole o ka aina, A kaua e holo ai i ke kahakai, E nana aku ana o ka lau o ka ai i ka iho mai, Hoomaona aku ka la puloli i ka lau limu, I kahi hakina ki, hapuu, o ka Aina, I ka ia paili o ke kanaka, A Kaua e hoholo ai i ka uka mehameha, E waha ana oe i'au ma ke kua, E hahai ana i kaua mau makua, Aia i ka uka i ka nahele o Wail? I kai i ka malu niu a Keei o kana hale, E nana i ka lai malino a ke kai o Kona, I ka pa aheahe a ka makani he Eka, I ka paliulua a ke Kehau o na Napali. E pupue ana ka ili i ke anuanu, I pupuu a mahani i ka poli, Hoopumehana aku i ka poli o ke kaikuana, O kuu kaikuana i ka lai o Kona, A kaua e noho ai i kaua hale i Puaa, I ka pihe leo kanaka o Huliheo, E pi ana i ka wai o Kiope, E nana ana i ka piha kanaka o Kaiakekua i ke one, A kaua e pii ai i ka uka o Kuahewa, E huli i ko kaua mau makua, Aia i ka nahele i ke kilo ai, Noho au me na makua o kaua, Hele oe a noho i ka moku Oahu, Noho i ka hala o ke kane hanaukama, Ka makamaka o ka aina i noho ai, Imi mai au ia oa me na maku o kaua, O oe ke kuleana noho loa ai Oahu, Kamaaina ai kaua ia Honolulu, Na olua wau i malama me ka kaua kane, I hanai keikiia e olua i ko olua alo, Me na makua o kaua a pau, Noho ai i ka la o Ewa, Make na makua o kaua ilaila, Noho au i kau hale o ke kane aohe pono, Hoi ka pono ia oe i ka hanau mua, Hele ae ia kauai me ka kaua kane, Imi aku wai ia oe mahope, O oe ka makamaka ikeia ai o Kauai, Hoi mai nei kaua noho ia Honolulu, I Honolulu nei kaua haalele oe i'au, Hele oe me na makua o kaua, Noho au me ka u me ke kanikau, E uwe aku ana ia oe kuu kaikuaana, Hoa ohumu o ka po a me ke ao, Hoa noho hoolaukanaka o ka hale, Ka makua, ka mea nana e hoomaemae mai, E hoaahu mai ai i ke kino, E noho lia ai keia wahi makamaka ole, A kaua e alo aku ai i na lae ino, Na makani ino o ka aina, He ia ai ka nani o ka aina, Ka lai ana iho o ke kaona, A kaua e holoholo ai i ka po, a me ke ao, He no keia noho au la, O ka po hoi na la hele oe, hele oe, hele hoi ole mai, Auwe kuu kaikuaana e, O kii kaikuaana hoi ka mea 'loha, MRS. FANNY KAOIWI. Honolulu, Novemaba 11, 1861.