Ka Hoku o ka Pakipika, Volume I, Number 12, 12 December 1861 — Kanikau aloha no Kelani. [ARTICLE]

Kanikau aloha no Kelani.

Kanikau la he aloha, Nou no e Kelani, Hiapo mua a Nawai, Hii alo a Piliwale, Hele palamimo ka Uhane, I ke ala hoi ole mai, Emi aku nei nalo oe, Kaa i ke alo lipolipo, Pono ole na makua, I ko nalu ana aku, Au anei ka manao, E ake o ka ike aku, He uku paha ka ike hou, I ko kino wailua, Anoai mai Poliwela, I ka alo hookahi mai, Hoohihi aku ka Uhane, E ike aku ia Kau, Kela aina pana, O Kau i ka palahemo, Hemo oe la kaawale, Kaawalem i ke kai loa, Hele hookahi ka Uhane, I ka luna o Leahi, Nana ia Waialae, I ka noho kahele mai, Oni ana o Kawaihoa, Noho ihiihii i ka lai, Kau nui aku ka Uhane, I ka noe o Molokai, I ka nee mai i ke kai, Lilo oe la ilaila, A Lahaina ka Uhane, Ike aku oe i ka nani, Ka waiho haaheo mai, A ka malu ulu o Lele, Lelu aku nei ka Uhane, Noho mai i Hiilawe, I ka wailele [illegible], Haaheo i na pali, Pali hemolele ko Neue, I ka linohau a ka hala, Hala aku nei no oe, Koe iho ko pokii, Ei aku nei paha oe, I ka pali o Kukii Kii mai nei oe, Kahi manu o Kaiona, I walea paha ka Uhane, I ke kui pua o ka hala, Ua hala aku no oe, I ka hora o ke awakea, Au iho nei makou, Aole oe i loaa, Ua lilo i ka enemi E kinai ana i ke ola, Hookahi mea minamina, Ko kiai i ka nalo ana, Ka Uhane ka mea aloha, I ka hele ku hookahi, Me oe a ke aloha, Ke huli hoi nei au, I ka la wela o Pohokikalalewa, D. W. Poliwela. Honolulu. Dec. 9, 1861.