Ka Hoku o ka Pakipika, Volume II, Number 3, 30 October 1862 — He kanikau no Iosepa Kaahu. [ARTICLE]

He kanikau no Iosepa Kaahu.

Iosepa Kaahu, e aloha oe. Kuu kane mai ka halapeepoli o Maakua, He makua ka lehua he onaona ke nana aku, Nana aku au o ka hinalo, he ala ke honi la e, I honi e u i ka luna o Makalohi la, Ke kahiko a mai la e ka ohu, e ka olu o He-lemano, He manomano oe a ke ahonui, A nui ka leo o ka haole ila kaua, Kuu kane mai ka pohu o Mokuhala, Hala oe hee i ka nalu o Lonoaumai, Imi aku au e loaa i ka Paoaokini, He kini no oe nolaila, a he kupa no Lualii, He mea liilii ka nahele o Waikapu ia kaua, Kupu ka manao e noho i Maunahula, Ilalila kau i ike i ka haole o Waipuhi, Me he puhi la na wao i ke kai o Punaiki, He keiki oe a he nui na Kilia, He hiapo hui na Wahapoo, He pua he kama na Kalehua, He lehua no oe a ka lokomaikai, O oe o ke kane o ka mea aloha, Owau o ka wahine o ko lei hemo ole, Kuu kane mai ka ia hoike kanaka o ka aina, Aina hanau a ke aloha, Ua keekeehi kaulana ia Laepoko, Ike aku o i ka wai o Muliwai, Ua hooale i luna o Lanakila E ao ia Makahi, ua nohoo aloha laua mme La-niloa, E ole e loaa ka hana a ke kini o Waiapuko, Ua ae ia mai oe e Palau, E lilo mai na hala o Kahuku i ke kai, O oe e ke kane o ka mea aloha, Owau o ka wahine o ko lei hemo ole, Kuu kane mai ka ia a makani i lawe mai, Lawe kaua a oki i ke kula o Kailima. I hoa kui lei ilima no Waialee, Leo lea kaua i ke kula e Paumalu, Hoomahele loa i ke one o Pupukea, Kuene pono i na poe wai o Waimea, I miki a mai e Hapuu, Miki na lima o Kealia, Alia ia mai e Puaena, O oe o ke kane o ka mea aloha, owau o ka wahine o ko lei hemo ole, Kuu kane mai ka lai luahine o Akamanu i Waialua I ike aku kaua ia Kaala, I kuahiwi a Kamaoha, Ola i ka hale ohai huakai o Mikilua, Elua kaua a ka uka e Waikaolulu, U iho nei au o ko leo, I ko pane ana mai aloha ino oe i ka hoi kino hoi uhane aku paha wau Ke hoi uhane nei i ka lai o Hauula, Ke uwe helu nei na makua a pau, Me na hoa aloha a pau loa, Ke uwe aloha nei ka wahine, Kuu kane mai ka wailiula o Mokuleia, I hea ia mai kaua e Kaena, E hoi ka poe i Keau, Au ka manao a ike i ke Ahekaiaulu o Waianae I ka noenoe la kaua ike ia Puuokapolei, He lei aloha no maua me kuu kane la e, Kuu kane mai ka ua haaheo o Puuloa, Mai ka uka la e Honouliuli, Huli ae ke alo i ka luna e Kanehoa, He hoa no oe i ke kula o Kanoenoe, He noe aloha i ka luna o Kemoe, Moopuna oe na Kipapa, Ke hii ia mai la e Eweloa, Ua lono o Kalauao, ua ike o Aiea i ka luna o Halawa, Upai na hui o Moanalua kele oni i Kaiwiula Mai ka uka la e Kalihi, Kualii. Hauula, Koolauloa, Oct. 25, 1862.