Ka Leo o ka Lahui, Volume II, Number 523, 17 August 1892 — Page 1

Page PDF (992.15 KB)
This text was transcribed by:  Na limahana a pau o ka ?Aha Punana Leo, ko Ka Haka
This work is dedicated to:  ?Anake Lolena Nicholas

KA LEO O KA LAHUI.

"E Mau ke Ea o ka Aina i ka Pono."

 

Buke II            HONOLULU, AUGATE 17. 1892   HELU 521

 

HE MOOLELO KAILI PUUWAI

NO

SENIA LUTERA

 

Ka Ui Puuwai Mabala

o

ENELANI KAHIKO

 

A I OLE

 

He Nanea Hooheno no kekahi Kauna Wahine Opio me kana mau Aloha Ekolu

 

Mai ka peni mai a ka mea kakau o Avared, a pela aku

 

MOKUNA V

Ua make oia ia oe! Auwe, e kuu makuakane, ua paumaele kou lima me ke koko o kekahi o kou mau hoa kanaka!

 

            Me keia mau noonoo iloko ona, hoohuli ae la oia i kona noonoo no na olelo a kona luaui makuakane i olelo mai ai iaia, oia wale no ka hua hookahi o kona puhaka, a o ka hooilina oiaio hoi o kona mau waiwai a pau; a no keaha la hoi oia i hahai ole aku ai iaia i na mea apau, oia hoi ua mareia oia i ka po mamua iho me ke kuewa i lilo i moepuu na ka make ma ka oi o kana pahikaua.

            Ae, o ka hoike aku iaia i na mea a pau oia ka nani maoli, a oiai ua make u Heneri nei, no laila aole he mea e ae e ike i keia meahuna a ua Senia neia, o kona luaui makuakane wale no, a aole auanei oia e hoonele ia me ka hauoli ke hoomaopopo iho, ua loaa i kana lei ka lanakila ma ia kakahiaka.

            Aka nae, aole pela na noonoo e niniu poahi ana iloko o ua Senia nei, o kana i hooholo ai oia keia, e kanu pu ia ua meahuna nei ana me kana kane kuewa iloko o ka luakupapau hookahi, me kona hoike ole aku ia mea imua o kona makuakane.

            Oiai ka la e iho ana ma kela huli o ka honua, hoea aku la laua me ka maalahi iloko o kekahi ululaau a ma kapa o kekahi wahi kahawai uuku me he lopi gula la e maoli aweawe ana iloko o ka ululaau, noho iho la laua ilalo e hoomaha ai.

            He ululaau mehameha a anoaano keia i na hora o ka po, wahi a ka makua i ke keiki. Akanae, ua oi loa aku ia mamua o ka make na iloko o na lima o ka poe kuewa, a ole auanei pela kou manao e kuulei?

            Ae, he pa tausani kona oi aku mamua o ka make ana, wahi a Senia. Aka, no keia wahi po hookahi wale no keia, no laila ua hiki no ia kaua ke hoomanawanui.

            Aole a kana nana pono e ae e kuu aloha, o ka moe poo wale aku no imua, wahi a ka makuakane me ka minoaka ana,  kahi lohi aku no hoi keia a puka kaua ma kela aoao, o ko kaua hoea no ia i ka hale.

            Ae, i ka halekakela! Aole anei he mea e ka momomana o keia mau huaolelo iloko o kou mau pepeiao e kuu Senia? Ka halekakela keokeo o Enelani aloha, ke kiekeina nani loa hoi o ke ao nei.

            O oe ka moiwahine o kona mau luhiehu e kuu lei, o oe koha la a me kona mahina, ka home hoi i luakahaia e kou mau kupuna i pau i ka make.

            Mahope iho o kekahi mau makahiki loihi o kou nele ana i ka loa a me ka laula o ka aina, e lilo ana ua kakela la a me kona mau luhiehu nani i home lani nou ma ka honua nei. Aka, ea, owai ka mea i hiki kekuailo mai i ka moohelu o kou mau la o ke ola na i piha me ka hauoli e waiho mai nei imua ou. Malia paha e lilo aku ana oe i kaikamahine alii no Enelani nei e kuu lei, aka owai ka mea i hiki ke hai mai ia mea i keia manawa?

            Aole ua Senia nei i pane mai no kela mau olelo a kona luaui makuakane e kamailio ana, oia hoi, e nalu ana oia no na helehelna maemae me na maka onaona o ka mea ana i ike ai ma moeuhane, me ka i ana iaia iho:

            Nani ka hauoli, una o kaʻu kane ia e mare hou aku ai.

 

Aole i pau

 

HE MOOLELO

NO KE KEIKIALII

 

AWAREDA!

 

a me

KAUI LEILA

o Noremadi

 

Kakauia no ka Leo

 

MOKUNA XIII

 

MOKUNA XIV

 

Kue o Dulifa me Koma

 

            Ua pololei oe e Diana. No ka mea aole au i poina i kela hoopakele ana ai iaʻu mai ka make mai; i ka manawa hoi aole oʻu wahi hoaloha hookahi o ke ao nei ma ia wahi, ua wahi oe i koʻu mau palapu me kou mau lima aloha, a ua hoihoi hoi i kou hale ponoi me ka malama maikai ana iaʻu me he keiki ponoi la nau.

            Nolaila, mamuli oia mau hana maikai au aʻu i ale nui ai i kuu ola ia oe, i makemake ai au e pani hakahaka aku ma koʻu hoopakele ana i iou oia.

            Ina oe e oluolu pono, hoihoi hou au ia oe i ke kulanakauhale o Wavelam a ua manao no hoi au, ua hiki no iaʻu ke malama ia oe a hiki kou oluolu mai ana.

            Alaila, e hookaawale aku ana anei oe ia Leila mai aʻu aku? wahi a ka mea poino i ninau mai ai me ka leo o ka mea hoopilihua ia kona naau.

            Aole keia nohea malalo o koʻu mana, wahi a Dulipa.

            Auhea oe, o oe kuu hoaloha mai hookaawale aku oe iaia mai aʻu aku. Ke hoomaikai aku nei au ia oe no kau mau hana ku i ke aloha, a ke aku pu aku nei no hoi i kou mau kokua ana mai, nolaila mai haalele mai oe iaʻu; aka no Leila, aole ola e pono e haalele mai iaʻu.

            No keia manwa ale i maopopo iaʻu, aka e hoomanawanui oe a hele aku au e nui me koʻu haku, wahi a Dulipa Mawaho ae nae o na mea a pau, e oluolu no anei oe e hoike mai iaʻu i na mea apau o pili ana i kou halawai na me keia poinoʻ a me kou hiki ana ma kela wahi i loaa aku ai oe iaʻu?

            Pili iho la na maka o na Diana nei, me ka hooholo naa o kekahi lima maluna o kona lae, a liuliu kani ailio mai la oia:

            Aole anei mailuna mai au o kekahi kipapali keikie i haule ai iloko o ka muliwai?

            Aka, peha kela mau moku maluna ou?

            Malia paha ua hookui au me kekahu mau pohaku nunui wanawana oia kela mau meku au i ike iho la i keia wa.

            Ke hoomanao nei au, he nui ka pohaku ma kela wahi aʻu i haule mai ai.

            Aole au e hoouluhua aku ia oe e Diana maikai.

            Aka nae, aole au e hewa ke hoike aku ia oe, ua okoa loa kau mea e kamailio mei nei i kaʻu e noonoo nei.

            Pehea kau i noonoo ai, i ninau mai ai ka mea poino.

            Me kona nana pono ana ae o kona mau maka ia Dulifa.

            Manao au, ua loaa keia poino ia oe mai kekahi enemi mai.

            Mai kekahi enemi mai?

            Ae.

            No ka mea, e noonoo oe, ina i loaa ia Leila ke kaikamahine a Kamila kekahi enemi, no keaha hoi e loaa ole ai ia oe ka makuahine o Elevira kekahi mea elike me ia ke ano?

            Nana hoomau mai la o Diana iloko o na maka o Dulifa ke Smaria maikai, me ke eueu pu ana ae o kona mau lehelehe no kekahi manawa.

            E kala mai iaʻu e Diana maikai, ina ua lilo keia mea e kamailioia nei i mea nou e hookaumahana ai o kou noonoo.

            Aka o ka mea i hala ua hale la, a aole au e hookikina hou aku ana ia oe.

 

Aole i pau.

NA MAI O KE POO

KA MAKA.    KA PEPEIAO

KA WAHA    KA PUU AI

A ME KA UMAUMA

 

KA PUUWAI, AKEMAMA, OPU;

KE AKEPAA A ME PUUPAA;

 

i huipuia me na maʻo o ke koke a me ka uli, ua hiki loa ia

 

            Dr. McLennan,

ke hoola ia mau pilikia a pau me ka hikiwawe i ike mua ole ia.

 

            O kona wahi i hoonaauao ia ai ma ka ike lapaau, maloko no ia o na kula ao Kauka kaulana o Amerika Huipuia, a iloko o na makahiki he 14 i hala hope ae nei, ua ike ia ka holopono o kana mau lawelawe apaau ana ma na mahele mai i hoikeia ae nei maluna ma Kapalakiko, ma ke ola ana o kekahi poe mai i hooiloiloia e kekahi poe Kauka aole e ola. E nana i kekahi mau hoike e pili ana no kona makaukau, iloko o kona mau la pokole o ka hiki ana mai i Honolulu nei, o kekahi mau mai i hanaia e na Kauka no kekahi mau mahina a no na makahiki kekahi, aole nae he loaa o ka oluolu, e like me- Mr. Geo Sherwood e noho nei ma Waikiki i ike ia e na mea a pau nona ka Hale Auau o Waikiki, na

            DR. Mr. McLENNEN

i hoopakele ae iaia no kekahi mau pule pokole, mailoko ae o kona mai loihi. O Mr J. T. Walakahauki, kekahi o na kalepa i kamaaina nui i ko ke kulanakauhale nei, na keia

            DR. Mr. McLENNEN

i hoola iaia mai ka Rumakika mai, oiai oia ma Kapalakiko he mau makahiki i hale ae nei, ka maʻi hoi nana i hoopilikia nui iaia ma Honolulu nei a holo ai no Europa, aole nae i ola a e ole o

            DR. McLENNAN

ola ai, no na mea aku i koe, e hele e haupu me Mr. Walakahauki. O Mr. Thos. Newcastle e hana nei ma ka Hui Hana Hao Lokahi e mau makahiki loihi ae nei kona loaa ana i ka mai eha o ka epu, ua i@i ke ola aole nae he loaa, aka, he mea makehewa ko makou kamailio ana aku no ia mea, e pono no e ninau iaia, a nana e hoike mai. na

            DR. McLENNAN

i hoola ia Thomas P. Spencer o ka Elele, W. Heilbron o ka Halekuai Pipi Metapolitana; Mrs. Mary Robinson, he wahine Hawaii mai Paia, Maui mai, mai kona maʻi Akepau mai, o Geo. Town@ eneginia o ke Kaawai Helu Elua, mai kona mai mai me ka ili a me koko ino, i hanaia e kekahi poe kauka e ae a @ ele ke ola, @

            DR. McLENNAN

i lapaau a ola. He lehulehu wale ka poe Hawaii i hoolaia, e pau ole ai  ma keia kolamu.

            O na poe mai e makemake ana ia  DR. McLENNAN, e hele ae ma kona Keena Hana ma kona wahi noho, o ka poe o na ano maʻi a pau me k@ maʻi hookaawale @ Alanui Aklakea, ma ka aoao ma Waikiki o ka Hale Ahahui Opiopio o na haole, kahi hei i noho hope loa ia iho nei e Dr. Luke.

            Na Telepona

@ Heliu 137                @

June 17 @