Ka Leo o ka Lahui, Volume II, Number 528, 24 August 1892 — Page 1
| This text was transcribed by: | E K Soares |
| This work is dedicated to: | Lipeka Kapahunui |
KA LEO O KA LAHUI.
"E Mau ke Ea o ka Aina i ka Pono."
Buke II HONOLULU A U G A T E 24, 1892 Helu 528
HE MOOLELO KAILI PUUWAI
NO
SENIA LUTERA
Ka Ui Puuwai Mabala
o
ENELANI KAHIKO
He Nanea hooheno no kekahi Kauna Wahine Opio me kana mau Aloha Ekolu.
Mai ka pen@ mai a ka mea kakau o Avaresa, a pela aku.
MOKUNA VI.
Ua aloha au iaia me kuu ola a pau, aka nae, e kuu Senia, i ka manawa a'u i manao ole ai, wehe iho la o uahi.
Wahi a Senia i ninau mai ai, me na helehelena haikea elike me ko ka mea make.
Eia au ke manaoio nei ua make kuu makuahine aloha!
E hai mai, o, e hai mai ia'u i na inea a pau.
Mai hookoe aku i kekahi mea, oia ka'u noi ia oe.
O ka oiaio maoli ka'u e hoike aku nei ia oe.
Nolaila, o oe a owau, pau ae la keia, wahi a ua Haku nei i kamailio mai ai me ke akahele.
Ma na ano a pau, ua manao au ua make oia, aka nae i keia manawa, ke hopohopo nei au eia no oia ke ola nei, a e hoi hou mai auanei paha oia e koi hou ia oe, kau mea nui hookahi i ka po a me keao.
E kuu akua! he keu kela a kekahi puupuu lokoino ina e hookoia! Mahope iho o kou loaa hou ana ia'u iloko o keia mau makahiki loihi o ko kaua kaawale aua!
Me keia mau olelo, palulu ae la oia i kona mau helehelena me kona mau lima elua e hoao ana hoi e huna aku i ke kaumaha e alii ana maluna ona ia manawa mai kanu kaikamahine aku.
Mai hookaumaha oe ia oe ino e kuu makuakane, no ke mea aole loa au e haalele hou ia oe a hiki i kou make ana! wahi a Senia i kaailio aku ai me ka leo nahenahe, iaia i apo ae ai ma ka ai o kona luaui makuakane, a hoomaha aku la i kona poo maluna o kona umauma.
Aole loa au e haalele hou ia oe, ina he tausani makuahine e kii mai ana ia'u!
Aka, ina ua hana hewa mai oia ia oe, aole o'u manao eia no ia ke ola nei!
Ua lawehala mai oia ia'u a oi aku mamua o ka mea hiki ia'u ke hoomanawanui e kuu milimili, wahi a ka Haku kamailio mai ai ino ke kaumaha pilipu o ka naau.
A mawaho ae oia, ua lawehala, aku no hoi oia ia oe me ke aloha ole, no ka mea ua haalele mai oia ia oe a holo aku la me kekahi kanaka kuewa, a ke ole au e kuhihewa nana no oe @ kii hou mai e aihue aku me kuu ike ole!
Ma keia wahi, hoomaka iho la !a haku nei e uwe, a na ka makua hoi ka uwe, hookahi ko laua uwe pu ana, a no kekehi manawa loihi mahope iho kamailio aku la o Senia panai:
Haalele oia ia oe e kuu makuakane aloha a holo aku la me kekahi kanaka kuewa? Auwe, e kuu makuakane, he keu keia a ka mea weliweli!
Ua kamailio o Senia i na olelo maluna ae me ka noonoo ole, oia ka wahine mare a kekahi kanaka kuewa he mau hebedoma pokole wale no i hala hope ae.
E hele kaua ma o e noho ai, wahi a ua Haku Lutera i kamailio mai ai iaia i huki ak u ai i kekahi lima o kana kaikamahine no kekahi wahi noho uuku kupono no na mea elua e ku ana nalalo o kekahi mau kumu roke nunui a me kekahi mau kumu viou, a oiai laua maia wahi, ua hoolilo ae la ka malamalama o ka la e alohi ne i na maawe lauoho uluili o ua Senia nei, i mau maawe gula maoli e hulali anapa ana ia manawa o ke kakahiaka, oiai ka moani aala kupaoa o na pua roke he nui e hookaumaha ana i ka ea hanu, noho iho la na nohea nei hoolohe i ka moolelo o kona @aui makuahine.
Aole pau.
HE MOOLELO
NO KE KEIKIALII
AWAREDA!
a me
KA UI LEILA
o Noremadi.
(Kakauia no Ka Leo_
MOKUNA XIV.
Kue o Dulifa me Koma
Hahaki iho i a oia i kekahi mau wahi apana laau liilii a like ole ko laua loa, alaila me ka ike ole mai o Dulipa, hou iho la oia i kona kokoolua e huki i kekahi o laua iluna.
Ina oe e huki i ka mea loihi, alaila ia oe ka waapa, a o ka neo ka ia'u.. A ina hoi o kahi laau pokole kau e huki ai, o oe ke noho malie i keia wahi, a ia'u ka waapa. ke maopopo mai la ia oe?
Ae.
Ina oe e ao ia'u, aole oe e hamabaga, a pela no hoi au ia oe?
Ae.
Alaila, hookahi wale no hana i koe, oia kou hoao ana i kou laki.
Ma keia mau olelo, haalele pau iho la o Dulipa i ka nana ana a kona mau maka maluna o na laau nei e ku ana.
Iaia e nana ana, ua like loa ua mau laau nei elua ma kana ike iho, a ua like no hoi ko laua kiekie i puka maluna o ke one, nolaila olelo ae la oia, aole he maopopo ia'u ka'u mea e hopu ai, no ka mea hookahi wai o ka like.
Hala ae ia kekahi manawa loihi o ko Dulipa kuko ana e hopu i ka laau loihi, no ka mea ua makemake oia iaia ka waapa, aole nae ona hopu iki.
O kekahi manao i ulu ae iloko o Dulipa nei, i na e eo iaia ka waapa alaila e loaa pu ana iaia he manawa kupono e hoopakele ai ia Leila, ma ka paakai hou ana mai no Waimea a aihue i ua nohea nei i kekehi manawa o ka po.
He mau noonoo awaawa keia o ua Dulipa nei, aka he mau noonoo maikai loa ia i kona manao ana, nana i haawi aku i ka hauoli i kona uhane no kekahi manawa.
E aha ana ka hoi oe e apa nei; he mea makehewa ke kilohi wale ana no, wahi a Koma. he elua keia mau laau e ku nei, hookahi mea loihi a he hookahi mea pokole, nolaila e lalau oe i ka mea loihi ina e hiki ana ia oe.
Alaila lalau iho la o Dulipa i kekahi Isau a huki ae la.
Ia manawa, me na helehelena hauoli, olelo mai la o Koma, iaiai i lalau iho ai i ka lua o ka laau a hoike mai la ia Dulipa.
O ka laau pokole kena, eia ka laau loihi ke ike mai la oe?
Ae, ua ike mai la o Dulipa ia mea me ka hoohewahewa ole. A oiai ua huki oia i ka laau pokole, nolaila ua haule wale kana mau mea a pau i hoolaia, ai iloko ona.
Ia'u mua ka waapa o kaua, wahi a Koma i hoomau hou mai ai, iaia i kiloi aku ai i eana laau ilalo a ua manao au e haalele koke ana no maua ia olua e Dulipa ma i ke ia manawa; no ka mea mahe ka moana, aohe pupuhi o ka, ehu kai a ke pa mai nei no hoi ka makani ma ke kukulu kupono loa a'u i makemake ai no ke kokua ana mai ia'u ma ka onou ana i ka waapa imua, a ina e mau ka huli ana mai a ka makani pela, e pae ana maua me ka maalahi i kahi a'u e makemake nei mamua o ka napoo ana o ka la.
Aohe no he hihiu mai a lohe i ke ao o ka olua wahi e hele nei? I ka nana aku, o ka hele ana no keia haalele i Puna na hoaloha?
Aole olua e hele a make a hiki hou mai au me ka waapa? wahi a Koma.
Ihea olua e hele ne o Koma?
Mai noonoo oe no ia mea, a oiai aole o'u makemake e ike ia ka maua wahi e hele ai e kekahi mea, nolaila he mea huna ia na'u e Kulipa. Eia wale no, e kakali olua me ka hoomanawanui a hiki i kuu manawa e kii mai ai ia olua no ka lawe ana ia olua.
Aole i pau.
NA MAI O KE POO
KA MAKA, NA PEPEIAO,
KA WAHA, KA PUU AI,
A ME KA UMAUMA
-KA-
PUUWAI,
AKEMAMA,
OPU
KE AKIPAA
-A @ME-
PUUPAA;
I huipuia me na ma'i o ke koko a me ka ili, ua hiki loa ia
Dr. McLennan.
ke hoola ia mau pilikia a pau me ka hikiwawe i ike mua ole ia.
O kona wahi i hoonaauao ia ai ma ka ike lapaau, moloko no ia o na kula ao Kauka kaulana o Amerika Huipulu, a iloko o na makahiki he 14 i hala hope ae nei, ua ike la ka holopono o kana mau lawelawe lapaau ana ma na mahele mai i hoikeia ae nei maluna ma Kapalakiko, ma ke ola ana o kekahi poe mai i hooiloiloia e kekahi poe Kauka aole e ola. E nana i kekahi mau hoike e pili ana no kona makaukau, iloko o kona mau la pokole o ka hiki ana mai i Honolulu nei, o kekaui mau mai i hanaia e na Kauka no kekahi mau mahina a no na makahiki kekahi, aole nae he loaa o ka oluolu, elike me- Mr. Geo. Sherwood e noho nei ma Waikiki, i ike ia o na mea a pau nona ka Hale Auau o Waikiki, na
DR. McLENNAN,
i hoopakele ao iaia no kekahi mau pule pokole, mailoko ae o kona mai loihi. O Mr. J. T. Walakahauki, kekahi o na kalepa i kamaaina nui i ko ke kulanakauhale nei, ma keia.
DR. McLENNAN,
i hoola iaia mai ka Rumakika mai, oiai oia ma Kapalakiko he mau makahiki i hala ae nei, ka ma'i hoi nana i hoopilikia nui iaia ma Honolulu nei a holo ai no Eurpoa, aole nae i ola a e ole o
DR. McLENNAN,
ola ai, no na mea aku i koe, e hele e huipu me Mr. Walakahauki. O Mr. Thos. Newcastle e hana nei ma ka Hui Hana Hao Lokahi, he mau makahiki loihi ae nei kona loaa ana i ka mai eha o ka opu, ua imi i ke ola aole nae he loall, aka, he mea makehewa komakou kamailio ana aku no ia mea, e pono no e ninau laia, a nana e hoike mai. Na
DR. McLENNAN,
i hoola ia Thomas P. Spencer o ka Elele, W. Heilbron o ka Halekuai Bipi Metapolitana; Mrs. Mary Robinson, he wahine Hawaii mai Pala, Maui mai, mai kona ma'i Akepau mai, o Geo. Townsend o@@ginia o ke Kaawai Helu Elua, mai kona mai mai me ka ili a me ke koko ino, i hanala e kekahi poo kauka e ae a loaa ole keola, a na
DR. McLENNAN,
i lapaau a ola. He lehulehu wale ka poe Hawaii i hoolaia, e pau ole ai ma keia kolamu.
O ka poe mai e makemake ana ia Dr. McLENNAN e hele ae ma kona Keena Hana ma kona wahi noho, o ka poe o na ano ma'i a pau me ka ma'i hookaawale ohana, ma ke Alanui Alakea, ma ka aoao ma Waikiki o ka Hale Ahahui Opiopio o na haole, kahi hoi i noho hope loa ia iho nei e Dr. Luka.
Na Telepona
P@l@ Hela 197 Maia'a Helu 682.
june17tfd.