Ke Kumu Hawaii, Volume I, Number 23, 11 November 1835 — NO KA AWA. [ARTICLE]

NO KA AWA.

Ua kanuia ka awa mauka. O ka maauaua ka mea nana i kii ka awa i uka, a loaa, halihali aku la, ua maauaua la. Kuai aku la, i kanaka; hookahi koaka, hookahi puawa, pela na kane a me na wahine. Pakahi na koaka a lakou a pau, i lilo i ka awa; a loaa ia lakou, mama iho la a puai iloko o ke kanoa, hoka iho la a hahao hou iloko o ka waha, a moni iloko o ka opu. Like ke ano me ka ilio i ai hou ai i kona luai, pela ke ano o ka poe inu awa. O na mea ino i loaa i ka poe inu awa, eia no ia. O ka maio ana o ke kino, a me ka wiwi inoino, a me ka hauekaeka piapia nui. O na maka a me ka makole meomeo, a me ka pu o kikala, a me ka maee o na lima a me na wawae, a me ka pialu o ka maka a me ka lae. Ina loaa ia lakou keia mau mai, manao lakou he ku awa. He poe palaualelo; he poe hoomana kii; he poe hoomana i ka la a me na ia o ke kai. Eia ka lakou pule ana; "Na aumakua i ka po; O Wakea i ka po; O umi i ka po; O Liloa i ka po; o Tiha i ka po; pale ka po. Puke i ke ao, o mea i ke ao, a o mea i ke ao, a o mea i ke ao;" pela lakou e pule ai. A hokahokai iho la me ka weuweu. Olelo iho la penei - a - a - apue pau ka awa o na akua kane.

Pela hoi ua pule na aumakua wahine. Pau keia manao. Na Tito Kalauau. Ewa, Oahu, Oka. 3, 1835.