Hawaii Holomua, 2 May 1891 — KA MAKOU NUPEPA PUKA LA. [ARTICLE]

KA MAKOU NUPEPA PUKA LA.

Ma keia Poakahi ae, Mei 4, e puka aku ai ka helu mua loa o ka makou nupepa puka la, malalo no o ka inoa hookahi e o nei ma ka pepa o keia la. O kona nui ua like no ia me Ka Leo o ka Lahui e puka nei, o ia hoi ka akahi hapalua okoa o ka makou pepa e puka nei ma keia la. Ke lana nei ko makou manao, e apo lokahi mai ana no ko makou makamaka i ka makou nupepa puka la. E hoomau aku ana makou maloko o laila i na moolelo e puka nei ma ka pepa o keia la, a e hoonuanua aku ana no hoi makou me na manao naauao e ae he nui. E hoomanao ka lehulehu, ma kela pule keia pule e ukuia mai ai ke ola o ka makou nupepa puka la, oia hoi he 25 keneta no ka pule. A ke hooko ole ka makamaka heluhelu i keia rula, alaila e kaohi no makou i kana pepa, a mai hoahewa mai hoi ua makamaka'la ia mea, oiai o ke ola o ka pepa ka makou i makee nui. O ka poe hookaa mua mai i $1.00 no ka mahina holookoa e loaa no i ko lakou mau inoa he wahi hanohano ma ka papa hoohanohano o ka makou nupepa puka la no ka poe hookaa $1.00. He elima no la iloko o ka pule e hoolako aku ai makou i ka nupepa puka la, i ko makou poe lawe pepa e like no hoi me na nupepa Hawaii puka la e ae o Honolulu nei. E puka mau ana i ka hora 12, o kela a me keia la.