Hawaii Holomua, 2 May 1891 — KA MAKOU MAU MOOLELO. [ARTICLE]

KA MAKOU MAU MOOLELO.

O na moolelo a makou e hoopuka aku nei ma keia pepa a makou e panee aku nei imua o ko makou mau kini makamaka a me na hoaloha, e hoomau aku ana makou i ka hoopuka ana aku ia mau moolelo maloko o ka makou nupepa puka la, e oili aku ana ma ka Poakahi ae nei Mei 4. O keia mau moolelo a pau e kiliwehi mau ana lakou i na kolamu o ka makou nupepa puka la. A e hoomanao na makamaka puni moolelo i keia hoakaka. Ke hoea mai hoi ka wa e puka aku ai ka makou nupepa puka pule, aole no makou o hoihoi ae ana i na moolelo o ka nupepa puka la iloko o laila, aka, e hoonu’a aku ana no makou i kona mau kolamu me na moolelo okoa loa mai ko ka puka la aku, a e halihali kaawale ana no kela a me keia o laua i ka laua mau moolelo iho me ka maua'e ole o kekahi i kekahi, oiai he rula ia na makou i nene-ihi-kapu e hoomoamoa aku me ka naueue ole. A ke lana maikai nei ko makou manao, mamuli o keia “mahele ana o na opua Awalau,” oia hoi, ke kaawale ana o na moolelo o ka nupepa puka la mai ka nupepa puka pule mai, he mea ia e hooulumahiehie mau ia ai na manao hauoli mawaena o ko makou poe heluhelu.