Hawaii Holomua, Volume III, Number 2, 7 January 1892 — KA HOPE LUNA KIAI A WA O HILO. [ARTICLE]

KA HOPE LUNA KIAI AWA O HILO.

He lono kai lawe ia mai ia makou, no kekahi hana ino lapuwale i lawelawe ia ma ke taona o Hilo, a penei ua lono nei: O Mr. Geo. Nakapuahi, oia ka Hope Luna Kiai Awa o Hilo, he kanaka kuokoa nona iho, a he hooko pono i kana hana ma na ano a pau. Aia i ka manawa o ke koho balota ana mai nei, ua kuikawa o Mr. Nakapuahi, aole oia i ae wale aku e kaualako ia kona lunaikehala e na hoahanau Hikikoki a me ko lakou poai, aka, ua koho oia e like

me ke kuhikuhi a kona noonoo maikai. O ka hopena o kona ae ole ana e kaualako ia oia ma ka ihu me he puaa la, oia no kona imihala ia, a ua hele ia aku la kona hale e huli, me ka olelo ia he opiuma kana i huna, aka, i ke kuekaa ia ana o na wahi ukana a pau, na pahu a me na wahi a pau i ka lole ia, aole loa he hohono a he kulu a meheu opiuma i loaa aku. Mamuli o keia hoka ana o ua poe 'la, ua hoomaka nui e mihi, aka, ua hala ka manawa, oiai, ua hana mua lakou i ke ino, a kuhi aku kuhi mai i ka mea nana i hookumu i keia hana. He hana imihala maopopo keia o ke ano pelapela loa, a o ka mea pono wale no i ko Hilo kini, o ke kinai aku, me ka nana ole i ko lakou kulana, i ike ai keia poe a noonoo iho he koko makee pono no ko loko o na olona o ke kanaka Hawaii. Ua lohe mai makou ke nieniele ia nei keia mau hana apakee lapuwale e na Luna Nui o ka Oihana Dute.