Hawaii Holomua, Volume III, Number 2, 7 January 1892 — KA HOOKIPA HIWAHIWA A NA HOAHANAU KATOLIKA 0 KA APANA O KALAWAO I KA HAKU EPIKOPO O PANOPOLIS. [ARTICLE]

KA HOOKIPA HIWAHIWA A NA HOAHANAU KATOLIKA O KA APANA O KALAWAO I KA HAKU EPIKOPO O PANOPOLIS.

Mr. Lunahooponopono; Aloha maikai oe:—E oluolu mai kou lokomaikai e hookomo iho ma kahi kaawale o ke kino lahilahi o kau nupepa, i kela mau hua e kau ae la, a me na anoai o ka manawa, i ike like iho ai na tausani makamaka heluhelu, mai Hawaii ma ka hikina a ke komo ana a ka la i ka mole olu o Lehua. Ma ke kakahiaka nui o ka Poaha Okatoba 27, ua lohe ia aku la ka leo o ka bele [Uwekahone], e wawalo hele ana ma na paia lewa, ua kala'e na lani, aohe mau ao hakumakuma o ka ua a me ka pa ikaika ana o ka makani Kona a me ka ua nui i ike ia i ka po mamua iho o keia la hauoli a ko Kalawao poe e kau nui aku nei no ka malihini. Ua ike ia aku kela a me keia e hele ae ana ma ke kahua mawaho iho o Damiene, hale pule, nona hoi ka leo o ka bele e kani anoano ana maluna ae o na mea a pau e komo ana iloko o ka luakini. I ka akoakoa ana ae o ka poe hiki mua, ua hoonohonoho koke ia ka huakai, oiai ka la ke oili ae la maluna o ka moana kai uliuli, a pahola ae la kona malamalama ma na kihi eha o ka honua. He mau minute ko keia hoonohonoho ana i ke kulana makaukau o kela a me keia; a penei ke kulana o ka hoonohonoho ana: Ka pi’o e paa ia ana e na kanaka eono—ua hoowehiwehi ia ka pi'o i na lau nahele aala o ka uka, a me na lei hala aala onaona e luhe ana ma ka aoao o ka pi’o; ke keiki haiolelo ma kona kulana; ka papa himeni; na keiki o ka pa o Damiene; na hoahanau kane me na hoahanau wahine; ke keiki paa Hae Hawaii a me ka Makua Nui. I ka pau ana o keia hoonohono-

aku i kekahi himeni i haku ia no ka Epikobo, a penei ua himeni 'la: HUI:—Hauoli kakou No ka Makua Nui Kulekana Epikobo hou Hauoli mau hauoli e Hauoli a olioli pu. 1. —No ka Haku Epikobo Ko makou olioli pu Ko Iesu Vitalio O ko Hawaii Paeaina. 2. —Ua hala ka Makua Halemano Ma keia aupuni lani Hookuu ia i kona luhi Na hana a Iesu ka Hoola. 3. —Eia no makou Kau mau keiki E noho nei me ka ehaeha Ma nei aina malihini. I ka pau ana o keia himeni a na keiki i mele aku ai imua o ka Epikopo no ka manawa mua, ua wehe ae la ke keonimana haiolelo i kona papale a kunou haahaa aku la, a hoomaka aku la oia e kamailio imua o ka Epikopo i keia haiolelo: "O makou o na hoahanau o ka Ekalesia kumau a me na hoaloha e noho ana ma na kaiaulu o Kalawao, ka aina a ka ehaeha i haiamu mau ai. “Ke pahola aku nei makou i na hoomaikai mahiehie ana nou e ka Makua Kiaaina Ekalesia, ka mea hoi i hookiekie ia ae i alakai nui a puni Paemoku, oiai hoi oe i kipa mua mai nei e ike ia makou kau mau keiki e noho ana ma keia aina malihi, mamua ae hoi o kou kipa kaahele ana aku ma na Mokupuni e ae o Hawaii nei. Nolaila, ke hookipa mai nei makou ia oe me ka manao ohohia nui iloko o ko ka Haku alakai a hoohui pu ana ia kakou. “E ka makua aloha, e lawe aku kou kiekie ihikapu i ka makou hookipa aloha ana nou, a ke huipu nei na leo lokahi o ka makou pule ma ke kikeke ana aku i ka lokomaikai o ka Mana Kahi-kolu, e ninini iho maluna ou i na garatia i ikaika ai a holomua kau lawelawe pauaho ole ana i ka oihana kiekie laahia i kau iho maluna ou. “O makou me ka haahaa, kau mau keiki e noho ana iloko o ka ehaeha o keia ola ana.” I ka pau ana o ka haiolelo i ike ia ae la maluna, ua pii ae la ka pi’o a kiekie ma ka hapai ana ae a na kanaka e paa ana, o ka wa ia a ka Epikopo i hele mai ai me kona lio a komo mai la iloko o ka pi’o a huli hope ae la ka huakai me ka lakou malihini no St. Fillemen ka pahu hopu, he manawa ole aia ka huakai ke ku ala mawaho o ka pa halepule a ike ia aku la kela mau hua e kau ana ma ka pi’o maluna ae o ka puka pa, “E hoonani ia ke Akua ma na Lani Kiekie loa, he malu ma ka honua i na kanaka makemake pono,” a me keia mau hua. “God Save the Bisobo,” oia hoi, “E ola ka Epikopo i ke Akua.” Aole i pau.