Hawaii Holomua, Volume III, Number 2, 7 January 1892 — ALOHA NO PAHA. [ARTICLE]

ALOHA NO PAHA.

Aohe makou i hanau ia me ke kuakoko o ka inaina a me ka imihala wale aku, aka, o ke aloha ka mea i oi aku mamua o ka mohai. He oiaio, ua ulu ae no kekahi mau kumu e kuihe ai na makaainana i na hana a kekahi mau Hoa o ka Hale Ahaolelo, aka, he mea kupono i ka lunaikehala o kela a me keia e kaupaona a e noonoo akahele i ke kumu o ka ulu ana mai o na mea i hana ia. Malia paha, e like me na lono e lauahea nei, a me na kahoaka e ike ia aku nei, e hoea mai ana ka hoike oiaio—he aloha no ka o Hawaii ia Hawaii—a e ola ana no ka aina ia kakou. O ke kalahea wale ana i ke kipe ia me ka loaa pono ole o na hooiaio, he mau hana lapuwale ia, a o ka makou ia e hoomanawanui nei i ka nonohua, a hiki i ka loaa ana o ka mea oiaio, alaila, huaipau aku—ina he kipe io—e ino ana ia makou—a ina hoi aole—e maikai ana ia makou.