Hawaii Holomua, Volume III, Number 3, 14 January 1892 — NA MAKA! [ARTICLE]

NA MAKA!

Ma ka nana pono ana aku i na maka o ke kanaka, e ike pono ia ai ka hana a ka uhane iloko o kona kino. Ke ike aku oe i na maka o ke kino i noho ia e ka uhane hoopono, ua molale maoli kona nanaina, ua hoihoi, ua eleu, ua puka maoli mai no na hiohiona o ka oiaio iwaho, a ua ike ia e na kanaka a pau e nana aku ana iaia. Aole nae pela na maka, o ke kino i noho ia e ka uhane lawehala. Ua puiwa kona mau maka ua aloalo na maka, ua wiwo, ua hilahila maoli kona mau maka, no ka mea, ua noho ia kona kino e ka uhane eepa. He mea mau no, e loaa ana no keia mau ano maka i ke kanaka hookahi, ke hana pono oia a ke hana hewa no hoi. O ke ’lii hoopono a me ka lunamakaainana oiaio, ua hiehie ka nanaina aku o ko laua mau maka, ua eleu ka imoimo ana mai o na maka, a ua hoihoi maoli na maka o laua; no ka mea, ua hana ko laua mau uhane noonoo a ke Akua i hana mai ai i ka mea pono no ko laua lahui. O ke ’lii eepa a me ka lunamakaainana pelukua; ua wiwo ko laua mau maka, ua puiwa na maka, ua hilahila na maka o laua; no ka mea, ua hoahewa ka uhaue e noho ana iloko o ko laua kino, no ka nui o ka eepa a me ka hoopono ole j o ka laua mau hana no ka pono o ka lahui. Nolaila, ina e makemake ka lahui e ike pono i ka hana a ka uhane o na ’lii a me na lunamakaai-

nana a oukou i koho ai e noho nei iloko o ka Hale Ahaolelo; e pono e hele ae a nana pono aku i na maka o lakou i umi minute; alaila, pau kuhihewa ia Heeia.