Hawaii Holomua, Volume III, Number 3, 14 January 1892 — NA LIMAHANA. [ARTICLE]

NA LIMAHANA.

Iloko o keia mau la, ua nui na hauwalaau mawaena o kekahi poe no na mea e pili ana i na limahana no na mahiko. No makou iho, he makemake e haawi ia na kokua i kekahi o na oihana ano nui o ka aina nei, aka, me ka noonoo a hoomanao pu i ka pono o ka lahui nona ka aina. Ina mamuli o ka hoopomaikai ana i na mahiko, he kumu hoopoino ia i ke kulana o ka lahui, alaila, aia makou ma ka aoao kue loa i ka lawe hou mai i na limahana Pake, a o ke kahua o ko makou kue, ua hoakaka piha ia e W. M. Kipikona i kona au e noho Kuhina ana no ka Moi Kalakaua, a mahope mai, ua hoakaka ia e ka Aha Kuhina i noho ai o L. A. Kakina me C. W. Akepoka ma—oia hoi—o ka oi loa ana o na kane mamua o na wahine iloko o kekahi lahui kakaikahi e like ’la me ko kakou, he kumu hoemi ia i ka ulu ana, a he poino ka hopena e loaa mai ana. Nolaila, aia makou ma ka aoao e kono ana e akahele kakou ma keia kumuhana. —