Hawaii Holomua, Volume III, Number 142, 19 January 1893 — KA HAE KALAUNU O HAWAII. [ARTICLE]

KA HAE KALAUNU O HAWAII.

Iloko o ka moolelo o Hawaii nei. mai ka hoomaka ana mai e welo ka Hae Kalaunu o kona mau Aliiaimoku a hiki iho la i ka hora 10 o ke kakahiaka Poakolu. Ianuari 18, 1893, o ka makamua loa ia o ka huki ia ana iho ilalo o ua hae nani kaulana nei mamuli o kekahi mana okoa. aole hoi mamuli o ka mana o ke Aliiaimoku o ka aina. No ka mea, aia i ua hora la, i haalele iho ai ka Moiwahine LILIUONALANI i ka Noho Kalaunu, e like me Kaua i ae ai ma Kana Kuahaua Kue, a puanuanu aku la na keena o Iolani mai na hoopumehana ana a ke Aliikiekie hookahi o Hawaii i koe mai ka po mai, a me he 'la ke kaniuhu la kona mau paia i ka pio o kela leo heahea o ke aloha, a uwe hoi kona mau uhipapahele nolunolu i ka meha o ka nehe o na kapuai wawae Alii. Aloha! Aloha oe e Iolani i ke kapu ihiihi—o ko makou waimaka ke kulu pu nei me kou; aka. o ka mea a ke kanaka e hana ai, na hiki no i ke Akua ke hoololi.