Hawaii Holomua, Volume III, Number 217, 8 May 1893 — HE HIHIO OIAIO. [ARTICLE]

HE HIHIO OIAIO.

Moe iho la ka makou makapeni i ka po Poaono nei, a lawe mai la ke ahe kehau i ke ala o na pua a me ke onaona o ka waokele. E owe lai malie ana ka wai ma kela a me keia aoao, a he mea hoonanea ia i ka hiolani malie ana o ka makakila a ka HAWAII HOLOMUA. A iloko o ka hiolani ana, ua uhi iho na eheu o Niolopua a lawe ia aku la na noonoo ana iloko o ka liula a he hihio kai pahola ae. Ike aku la ka makou makakila i na huaolelo e kau ana i ka lewa, a penei ka heluhelu ana: "Honolulu, Iulai 31, 1843!" A ia manawa koke no i kani mai ai ka leo o kekahi moakane nui, ma ka Hikina, kahi hoi a ka la e pii ae ai, a penei kana puana ana mai: "Ua ao Hawaii eia ka Lamaku Honolulu, IUlai 31, 1893." A ia manawa i ike ia aku ai ka welo ana ae o ka Hae Kalaunu o ke Aliiaimoku, a malalo pono iho neia mau huaolelo i hilo ia me ka mokihana a me ka maile-- "Hapalua Keneturia!" A i ka puoho ana ae o ka makou makapeni--auwe! He kamahao ke ohohia.